Bhagavata Purana · Chapter 08.06

BhP_08.06.001/0 śrīśuka uvāca
evaṃ stutaḥ suragaṇairbhagavān harirīśvaraḥ /
teṣāmāvirabhūdrājan sahasrārkodayadyutiḥ

tenaiva sahasā sarve devāḥ pratihatekṣaṇāḥ /
nāpaśyan khaṃ diśaḥ kṣauṇīmātmānaṃ ca kuto vibhum

viriñco bhagavān dṛṣṭvā saha śarveṇa tāṃ tanum /
svacchāṃ marakataśyāmāṃ kañjagarbhāruṇekṣaṇām

taptahemāvadātena lasatkauśeyavāsasā /
prasannacārusarvāṅgīṃ sumukhīṃ sundarabhruvam

mahāmaṇikirīṭena keyūrābhyāṃ ca bhūṣitām /
karṇābharaṇanirbhāta kapolaśrīmukhāmbujām

kāñcīkalāpavalaya hāranūpuraśobhitām /
kaustubhābharaṇāṃ lakṣmīṃ bibhratīṃ vanamālinīm

sudarśanādibhiḥ svāstrairmūrtimadbhirupāsitām /
tuṣṭāva devapravaraḥ saśarvaḥ puruṣaṃ param /
sarvāmaragaṇaiḥ sākaṃ sarvāṅgairavaniṃ gataiḥ

BhP_08.06.008/0 śrībrahmovāca
ajātajanmasthitisaṃyamāyā guṇāya nirvāṇasukhārṇavāya /
aṇoraṇimne 'parigaṇyadhāmne mahānubhāvāya namo namaste

rūpaṃ tavaitat puruṣarṣabhejyaṃ śreyo 'rthibhirvaidikatāntrikeṇa /
yogena dhātaḥ saha nastrilokān paśyāmy amuṣminnu ha viśvamūrtau

tvayy agra āsīt tvayi madhya āsīt tvayy anta āsīdidamātmatantre /
tvamādiranto jagato 'sya madhyaṃ ghaṭasya mṛtsneva paraḥ parasmāt

tvaṃ māyayātmāśrayayā svayedaṃ nirmāya viśvaṃ tadanupraviṣṭaḥ /
paśyanti yuktā manasā manīṣiṇo guṇavyavāye 'py aguṇaṃ vipaścitaḥ

yathāgnimedhasy amṛtaṃ ca goṣu bhuvy annamambūdyamane ca vṛttim /
yogairmanuṣyā adhiyanti hi tvāṃ guṇeṣu buddhyā kavayo vadanti

taṃ tvāṃ vayaṃ nātha samujjihānaṃ sarojanābhāticirepsitārtham /
dṛṣṭvā gatā nirvṛtamadya sarve gajā davārtā iva gāṅgamambhaḥ

sa tvaṃ vidhatsvākhilalokapālā vayaṃ yadarthāstava pādamūlam /
samāgatāste bahirantarātman kiṃ vānyavijñāpyamaśeṣasākṣiṇaḥ

ahaṃ giritraśca surādayo ye dakṣādayo 'gneriva ketavaste /
kiṃ vā vidāmeśa pṛthagvibhātā vidhatsva śaṃ no dvijadevamantram

BhP_08.06.016/0 śrīśuka uvāca
evaṃ viriñcādibhirīḍitastad vijñāya teṣāṃ hṛdayaṃ yathaiva /
jagāda jīmūtagabhīrayā girā baddhāñjalīn saṃvṛtasarvakārakān

eka eveśvarastasmin surakārye sureśvaraḥ /
vihartukāmastān āha samudronmathanādibhiḥ

BhP_08.06.018/0 śrībhagavān uvāca
hanta brahmannaho śambho he devā mama bhāṣitam /
śṛṇutāvahitāḥ sarve śreyo vaḥ syādyathā surāḥ

yāta dānavadaiteyaistāvat sandhirvidhīyatām /
kālenānugṛhītaistairyāvadvo bhava ātmanaḥ

arayo 'pi hi sandheyāḥ sati kāryārthagaurave /
ahimūṣikavaddevā hy arthasya padavīṃ gataiḥ

amṛtotpādane yatnaḥ kriyatāmavilambitam /
yasya pītasya vai janturmṛtyugrasto 'maro bhavet

kṣiptvā kṣīrodadhau sarvā vīruttṛṇalatauṣadhīḥ /
manthānaṃ mandaraṃ kṛtvā netraṃ kṛtvā tu vāsukim

sahāyena mayā devā nirmanthadhvamatandritāḥ /
kleśabhājo bhaviṣyanti daityā yūyaṃ phalagrahāḥ

yūyaṃ tadanumodadhvaṃ yadicchanty asurāḥ surāḥ /
na saṃrambheṇa sidhyanti sarvārthāḥ sāntvayā yathā

na bhetavyaṃ kālakūṭādviṣāj jaladhisambhavāt /
lobhaḥ kāryo na vo jātu roṣaḥ kāmastu vastuṣu

BhP_08.06.026/0 śrīśuka uvāca
iti devān samādiśya bhagavān puruṣottamaḥ /
teṣāmantardadhe rājan svacchandagatirīśvaraḥ

atha tasmai bhagavate namaskṛtya pitāmahaḥ /
bhavaśca jagmatuḥ svaṃ svaṃ dhāmopeyurbaliṃ surāḥ

dṛṣṭvārīn apy asaṃyattān jātakṣobhān svanāyakān /
nyaṣedhaddaityarāṭ ślokyaḥ sandhivigrahakālavit

te vairocanimāsīnaṃ guptaṃ cāsurayūthapaiḥ /
śriyā paramayā juṣṭaṃ jitāśeṣamupāgaman

mahendraḥ ślakṣṇayā vācā sāntvayitvā mahāmatiḥ /
abhyabhāṣata tat sarvaṃ śikṣitaṃ puruṣottamāt

tat tvarocata daityasya tatrānye ye 'surādhipāḥ /
śambaro 'riṣṭanemiśca ye ca tripuravāsinaḥ

tato devāsurāḥ kṛtvā saṃvidaṃ kṛtasauhṛdāḥ /
udyamaṃ paramaṃ cakruramṛtārthe parantapa

tataste mandaragirimojasotpāṭya durmadāḥ /
nadanta udadhiṃ ninyuḥ śaktāḥ parighabāhavaḥ

dūrabhārodvahaśrāntāḥ śakravairocanādayaḥ /
apārayantastaṃ voḍhuṃ vivaśā vijahuḥ pathi

nipatan sa giristatra bahūn amaradānavān /
cūrṇayāmāsa mahatā bhāreṇa kanakācalaḥ

tāṃstathā bhagnamanaso bhagnabāhūrukandharān /
vijñāya bhagavāṃstatra babhūva garuḍadhvajaḥ

giripātaviniṣpiṣṭān vilokyāmaradānavān /
īkṣayā jīvayāmāsa nirjarān nirvraṇān yathā

giriṃ cāropya garuḍe hastenaikena līlayā /
āruhya prayayāvabdhiṃ surāsuragaṇairvṛtaḥ

avaropya giriṃ skandhāt suparṇaḥ patatāṃ varaḥ /
yayau jalānta utsṛjya hariṇā sa visarjitaḥ