ભાગવત પુરાણ · અધ્યાય 08.06

ભ્પ્_08.06.001।0 શ્રીશુક ઉવાચ
એવં સ્તુતઃ સુરગણૈર્ભગવાન્ હરિરીશ્વરઃ ।
તેષામાવિરભૂદ્રાજન્ સહસ્રાર્કોદયદ્યુતિઃ

તેનૈવ સહસા સર્વે દેવાઃ પ્રતિહતેક્ષણાઃ ।
નાપશ્યન્ ખં દિશઃ ક્ષૌણીમાત્માનં ચ કુતો વિભુમ્

વિરિઞ્ચો ભગવાન્ દૃષ્ટ્વા સહ શર્વેણ તાં તનુમ્ ।
સ્વચ્છાં મરકતશ્યામાં કઞ્જગર્ભારુણેક્ષણામ્

તપ્તહેમાવદાતેન લસત્કૌશેયવાસસા ।
પ્રસન્નચારુસર્વાઙ્ગીં સુમુખીં સુન્દરભ્રુવમ્

મહામણિકિરીટેન કેયૂરાભ્યાં ચ ભૂષિતામ્ ।
કર્ણાભરણનિર્ભાત કપોલશ્રીમુખામ્બુજામ્

કાઞ્ચીકલાપવલય હારનૂપુરશોભિતામ્ ।
કૌસ્તુભાભરણાં લક્ષ્મીં બિભ્રતીં વનમાલિનીમ્

સુદર્શનાદિભિઃ સ્વાસ્ત્રૈર્મૂર્તિમદ્ભિરુપાસિતામ્ ।
તુષ્ટાવ દેવપ્રવરઃ સશર્વઃ પુરુષં પરમ્ ।
સર્વામરગણૈઃ સાકં સર્વાઙ્ગૈરવનિં ગતૈઃ

ભ્પ્_08.06.008।0 શ્રીબ્રહ્મોવાચ
અજાતજન્મસ્થિતિસંયમાયા ગુણાય નિર્વાણસુખાર્ણવાય ।
અણોરણિમ્ને ઽપરિગણ્યધામ્ને મહાનુભાવાય નમો નમસ્તે

રૂપં તવૈતત્ પુરુષર્ષભેજ્યં શ્રેયો ઽર્થિભિર્વૈદિકતાન્ત્રિકેણ ।
યોગેન ધાતઃ સહ નસ્ત્રિલોકાન્ પશ્યામ્ય્ અમુષ્મિન્નુ હ વિશ્વમૂર્તૌ

ત્વય્ય્ અગ્ર આસીત્ ત્વયિ મધ્ય આસીત્ ત્વય્ય્ અન્ત આસીદિદમાત્મતન્ત્રે ।
ત્વમાદિરન્તો જગતો ઽસ્ય મધ્યં ઘટસ્ય મૃત્સ્નેવ પરઃ પરસ્માત્

ત્વં માયયાત્માશ્રયયા સ્વયેદં નિર્માય વિશ્વં તદનુપ્રવિષ્ટઃ ।
પશ્યન્તિ યુક્તા મનસા મનીષિણો ગુણવ્યવાયે ઽપ્ય્ અગુણં વિપશ્ચિતઃ

યથાગ્નિમેધસ્ય્ અમૃતં ચ ગોષુ ભુવ્ય્ અન્નમમ્બૂદ્યમને ચ વૃત્તિમ્ ।
યોગૈર્મનુષ્યા અધિયન્તિ હિ ત્વાં ગુણેષુ બુદ્ધ્યા કવયો વદન્તિ

તં ત્વાં વયં નાથ સમુજ્જિહાનં સરોજનાભાતિચિરેપ્સિતાર્થમ્ ।
દૃષ્ટ્વા ગતા નિર્વૃતમદ્ય સર્વે ગજા દવાર્તા ઇવ ગાઙ્ગમમ્ભઃ

સ ત્વં વિધત્સ્વાખિલલોકપાલા વયં યદર્થાસ્તવ પાદમૂલમ્ ।
સમાગતાસ્તે બહિરન્તરાત્મન્ કિં વાન્યવિજ્ઞાપ્યમશેષસાક્ષિણઃ

અહં ગિરિત્રશ્ચ સુરાદયો યે દક્ષાદયો ઽગ્નેરિવ કેતવસ્તે ।
કિં વા વિદામેશ પૃથગ્વિભાતા વિધત્સ્વ શં નો દ્વિજદેવમન્ત્રમ્

ભ્પ્_08.06.016।0 શ્રીશુક ઉવાચ
એવં વિરિઞ્ચાદિભિરીડિતસ્તદ્ વિજ્ઞાય તેષાં હૃદયં યથૈવ ।
જગાદ જીમૂતગભીરયા ગિરા બદ્ધાઞ્જલીન્ સંવૃતસર્વકારકાન્

એક એવેશ્વરસ્તસ્મિન્ સુરકાર્યે સુરેશ્વરઃ ।
વિહર્તુકામસ્તાન્ આહ સમુદ્રોન્મથનાદિભિઃ

ભ્પ્_08.06.018।0 શ્રીભગવાન્ ઉવાચ
હન્ત બ્રહ્મન્નહો શમ્ભો હે દેવા મમ ભાષિતમ્ ।
શૃણુતાવહિતાઃ સર્વે શ્રેયો વઃ સ્યાદ્યથા સુરાઃ

યાત દાનવદૈતેયૈસ્તાવત્ સન્ધિર્વિધીયતામ્ ।
કાલેનાનુગૃહીતૈસ્તૈર્યાવદ્વો ભવ આત્મનઃ

અરયો ઽપિ હિ સન્ધેયાઃ સતિ કાર્યાર્થગૌરવે ।
અહિમૂષિકવદ્દેવા હ્ય્ અર્થસ્ય પદવીં ગતૈઃ

અમૃતોત્પાદને યત્નઃ ક્રિયતામવિલમ્બિતમ્ ।
યસ્ય પીતસ્ય વૈ જન્તુર્મૃત્યુગ્રસ્તો ઽમરો ભવેત્

ક્ષિપ્ત્વા ક્ષીરોદધૌ સર્વા વીરુત્તૃણલતૌષધીઃ ।
મન્થાનં મન્દરં કૃત્વા નેત્રં કૃત્વા તુ વાસુકિમ્

સહાયેન મયા દેવા નિર્મન્થધ્વમતન્દ્રિતાઃ ।
ક્લેશભાજો ભવિષ્યન્તિ દૈત્યા યૂયં ફલગ્રહાઃ

યૂયં તદનુમોદધ્વં યદિચ્છન્ત્ય્ અસુરાઃ સુરાઃ ।
ન સંરમ્ભેણ સિધ્યન્તિ સર્વાર્થાઃ સાન્ત્વયા યથા

ન ભેતવ્યં કાલકૂટાદ્વિષાજ્ જલધિસમ્ભવાત્ ।
લોભઃ કાર્યો ન વો જાતુ રોષઃ કામસ્તુ વસ્તુષુ

ભ્પ્_08.06.026।0 શ્રીશુક ઉવાચ
ઇતિ દેવાન્ સમાદિશ્ય ભગવાન્ પુરુષોત્તમઃ ।
તેષામન્તર્દધે રાજન્ સ્વચ્છન્દગતિરીશ્વરઃ

અથ તસ્મૈ ભગવતે નમસ્કૃત્ય પિતામહઃ ।
ભવશ્ચ જગ્મતુઃ સ્વં સ્વં ધામોપેયુર્બલિં સુરાઃ

દૃષ્ટ્વારીન્ અપ્ય્ અસંયત્તાન્ જાતક્ષોભાન્ સ્વનાયકાન્ ।
ન્યષેધદ્દૈત્યરાટ્ શ્લોક્યઃ સન્ધિવિગ્રહકાલવિત્

તે વૈરોચનિમાસીનં ગુપ્તં ચાસુરયૂથપૈઃ ।
શ્રિયા પરમયા જુષ્ટં જિતાશેષમુપાગમન્

મહેન્દ્રઃ શ્લક્ષ્ણયા વાચા સાન્ત્વયિત્વા મહામતિઃ ।
અભ્યભાષત તત્ સર્વં શિક્ષિતં પુરુષોત્તમાત્

તત્ ત્વરોચત દૈત્યસ્ય તત્રાન્યે યે ઽસુરાધિપાઃ ।
શમ્બરો ઽરિષ્ટનેમિશ્ચ યે ચ ત્રિપુરવાસિનઃ

તતો દેવાસુરાઃ કૃત્વા સંવિદં કૃતસૌહૃદાઃ ।
ઉદ્યમં પરમં ચક્રુરમૃતાર્થે પરન્તપ

તતસ્તે મન્દરગિરિમોજસોત્પાટ્ય દુર્મદાઃ ।
નદન્ત ઉદધિં નિન્યુઃ શક્તાઃ પરિઘબાહવઃ

દૂરભારોદ્વહશ્રાન્તાઃ શક્રવૈરોચનાદયઃ ।
અપારયન્તસ્તં વોઢું વિવશા વિજહુઃ પથિ

નિપતન્ સ ગિરિસ્તત્ર બહૂન્ અમરદાનવાન્ ।
ચૂર્ણયામાસ મહતા ભારેણ કનકાચલઃ

તાંસ્તથા ભગ્નમનસો ભગ્નબાહૂરુકન્ધરાન્ ।
વિજ્ઞાય ભગવાંસ્તત્ર બભૂવ ગરુડધ્વજઃ

ગિરિપાતવિનિષ્પિષ્ટાન્ વિલોક્યામરદાનવાન્ ।
ઈક્ષયા જીવયામાસ નિર્જરાન્ નિર્વ્રણાન્ યથા

ગિરિં ચારોપ્ય ગરુડે હસ્તેનૈકેન લીલયા ।
આરુહ્ય પ્રયયાવબ્ધિં સુરાસુરગણૈર્વૃતઃ

અવરોપ્ય ગિરિં સ્કન્ધાત્ સુપર્ણઃ પતતાં વરઃ ।
યયૌ જલાન્ત ઉત્સૃજ્ય હરિણા સ વિસર્જિતઃ