Bhagavata Purana · Chapter 07.13

BhP_07.13.001/0 śrīnārada uvāca
kalpastvevaṃ parivrajya dehamātrāvaśeṣitaḥ /
grāmaikarātravidhinā nirapekṣaścaren mahīm

bibhṛyādyadyasau vāsaḥ kaupīnācchādanaṃ param /
tyaktaṃ na liṅgāddaṇḍāderanyat kiñcidanāpadi

eka eva caredbhikṣurātmārāmo 'napāśrayaḥ /
sarvabhūtasuhṛcchānto nārāyaṇaparāyaṇaḥ

paśyedātmanyado viśvaṃ pare sadasato 'vyaye /
ātmānaṃ ca paraṃ brahma sarvatra sadasanmaye

suptiprabodhayoḥ sandhāvātmano gatimātmadṛk /
paśyan bandhaṃ ca mokṣaṃ ca māyāmātraṃ na vastutaḥ

nābhinandeddhruvaṃ mṛtyumadhruvaṃ vāsya jīvitam /
kālaṃ paraṃ pratīkṣeta bhūtānāṃ prabhavāpyayam

nāsacchāstreṣu sajjeta nopajīveta jīvikām /
vādavādāṃstyajet tarkān pakṣaṃ kaṃca na saṃśrayet

na śiṣyān anubadhnīta granthān naivābhyasedbahūn /
na vyākhyāmupayuñjīta nārambhān ārabhet kvacit

na yaterāśramaḥ prāyo dharmaheturmahātmanaḥ /
śāntasya samacittasya bibhṛyāduta vā tyajet

avyaktaliṅgo vyaktārtho manīṣyunmattabālavat /
kavirmūkavadātmānaṃ sa dṛṣṭyā darśayen nṛṇām

atrāpyudāharantīmamitihāsaṃ purātanam /
prahrādasya ca saṃvādaṃ munerājagarasya ca

taṃ śayānaṃ dharopasthe kāveryāṃ sahyasānuni /
rajasvalaistanūdeśairnigūḍhāmalatejasam

dadarśa lokān vicaran lokatattvavivitsayā /
vṛto 'mātyaiḥ katipayaiḥ prahrādo bhagavatpriyaḥ

karmaṇākṛtibhirvācā liṅgairvarṇāśramādibhiḥ /
na vidanti janā yaṃ vai so 'sāviti na veti ca

taṃ natvābhyarcya vidhivat pādayoḥ śirasā spṛśan /
vivitsuridamaprākṣīn mahābhāgavato 'suraḥ

bibharṣi kāyaṃ pīvānaṃ sodyamo bhogavān yathā /
vittaṃ caivodyamavatāṃ bhogo vittavatāmiha /
bhogināṃ khalu deho 'yaṃ pīvā bhavati nānyathā

na te śayānasya nirudyamasya brahman nu hārtho yata eva bhogaḥ /
abhogino 'yaṃ tava vipra dehaḥ pīvā yatastadvada naḥ kṣamaṃ cet

kaviḥ kalpo nipuṇadṛk citrapriyakathaḥ samaḥ /
lokasya kurvataḥ karma śeṣe tadvīkṣitāpi vā

BhP_07.13.019/0 śrīnārada uvāca
sa itthaṃ daityapatinā paripṛṣṭo mahāmuniḥ /
smayamānastamabhyāha tadvāgamṛtayantritaḥ

BhP_07.13.020/0 śrībrāhmaṇa uvāca
vededamasuraśreṣṭha bhavān nanvāryasammataḥ /
īhoparamayornṝṇāṃ padānyadhyātmacakṣuṣā

yasya nārāyaṇo devo bhagavān hṛdgataḥ sadā /
bhaktyā kevalayājñānaṃ dhunoti dhvāntamarkavat

tathāpi brūmahe praśnāṃstava rājan yathāśrutam /
sambhāṣaṇīyo hi bhavān ātmanaḥ śuddhimicchatā

tṛṣṇayā bhavavāhinyā yogyaiḥ kāmairapūryayā /
karmāṇi kāryamāṇo 'haṃ nānāyoniṣu yojitaḥ

yadṛcchayā lokamimaṃ prāpitaḥ karmabhirbhraman /
svargāpavargayordvāraṃ tiraścāṃ punarasya ca

tatrāpi dampatīnāṃ ca sukhāyānyāpanuttaye /
karmāṇi kurvatāṃ dṛṣṭvā nivṛtto 'smi viparyayam

sukhamasyātmano rūpaṃ sarvehoparatistanuḥ /
manaḥsaṃsparśajān dṛṣṭvā bhogān svapsyāmi saṃviśan

ityetadātmanaḥ svārthaṃ santaṃ vismṛtya vai pumān /
vicitrāmasati dvaite ghorāmāpnoti saṃsṛtim

jalaṃ tadudbhavaiśchannaṃ hitvājño jalakāmyayā /
mṛgatṛṣṇāmupādhāvet tathānyatrārthadṛk svataḥ

dehādibhirdaivatantrairātmanaḥ sukhamīhataḥ /
duḥkhātyayaṃ cānīśasya kriyā moghāḥ kṛtāḥ kṛtāḥ

ādhyātmikādibhirduḥkhairavimuktasya karhicit /
martyasya kṛcchropanatairarthaiḥ kāmaiḥ kriyeta kim

paśyāmi dhanināṃ kleśaṃ lubdhānāmajitātmanām /
bhayādalabdhanidrāṇāṃ sarvato 'bhiviśaṅkinām

rājataścaurataḥ śatroḥ svajanāt paśupakṣitaḥ /
arthibhyaḥ kālataḥ svasmān nityaṃ prāṇārthavadbhayam

śokamohabhayakrodha rāgaklaibyaśramādayaḥ /
yanmūlāḥ syurnṛṇāṃ jahyāt spṛhāṃ prāṇārthayorbudhaḥ

madhukāramahāsarpau loke 'smin no gurūttamau /
vairāgyaṃ paritoṣaṃ ca prāptā yacchikṣayā vayam

virāgaḥ sarvakāmebhyaḥ śikṣito me madhuvratāt /
kṛcchrāptaṃ madhuvadvittaṃ hatvāpyanyo haret patim

anīhaḥ parituṣṭātmā yadṛcchopanatādaham /
no cec chaye bahvahāni mahāhiriva sattvavān

kvacidalpaṃ kvacidbhūri bhuñje 'nnaṃ svādvasvādu vā /
kvacidbhūri guṇopetaṃ guṇahīnamuta kvacit

śraddhayopahṛtaṃ kvāpi kadācin mānavarjitam /
bhuñje bhuktvātha kasmiṃściddivā naktaṃ yadṛcchayā

kṣaumaṃ dukūlamajinaṃ cīraṃ valkalameva vā /
vase 'nyadapi samprāptaṃ diṣṭabhuk tuṣṭadhīraham

kvacic chaye dharopasthe tṛṇaparṇāśmabhasmasu /
kvacit prāsādaparyaṅke kaśipau vā parecchayā

kvacit snāto 'nuliptāṅgaḥ suvāsāḥ sragvyalaṅkṛtaḥ /
rathebhāśvaiścare kvāpi digvāsā grahavadvibho

nāhaṃ ninde na ca staumi svabhāvaviṣamaṃ janam /
eteṣāṃ śreya āśāse utaikātmyaṃ mahātmani

vikalpaṃ juhuyāc cittau tāṃ manasyarthavibhrame /
mano vaikārike hutvā taṃ māyāyāṃ juhotyanu

ātmānubhūtau tāṃ māyāṃ juhuyāt satyadṛṅ muniḥ /
tato nirīho viramet svānubhūtyātmani sthitaḥ

svātmavṛttaṃ mayetthaṃ te suguptamapi varṇitam /
vyapetaṃ lokaśāstrābhyāṃ bhavān hi bhagavatparaḥ

BhP_07.13.046/0 śrīnārada uvāca
dharmaṃ pāramahaṃsyaṃ vai muneḥ śrutvāsureśvaraḥ /
pūjayitvā tataḥ prīta āmantrya prayayau gṛham