Āyurvedamahodadhau annapānavidhi · Chapter 2

ity āyur vedamahodadhau śrīsuṣeṇakṛtau pānīyaguṇāḥ samāptāḥ //
atha kāṣṭhataptodakavargaḥ /
gandharvahastakāṣṭhaiś ca taptaṃ vāri prapūjitam
alakṣmīraktapittaghnaṃ doṣāṇāṃ ca prasādanam

bhallātakaiś ca kāṣṭhaiś ca taptaṃ vāri śubhodakam /
vātaśleṣmaharaṃ pathyaṃ vīryatejovivardhanam

pālāśodumbarodbhūtakāṣṭhataptaṃ śubhaṃ jalam /
vraṇakaṇḍūharaṃ cāsṛkbalavīryavivardhanam

jambūkapitthāmrajaiḥ kāṣṭhaiḥ taptaṃ vāri taḍāgajam /
medhābalapradaṃ vīryakṛmidoṣavināśanam

dumbarīkāṣṭhajais toyaṃ tāpyaṃ vāpīsamudbhavam /
kaphahṛt tac ca nirdiṣṭaṃ doṣāṇāṃ ca vināśanam

kāṣṭhaiḥ khadirajais taptaṃ raktapittavināśanam /
āpyāyanakaraṃ grīṣme śreṣṭham uktam idaṃ jalam

kadambanimbajais taptaṃ saritsamudrajaṃ jalam /
pathyaṃ doṣaharaṃ kaṇḍūraktapittavināśanam

dhātrīdāruśṛtaṃ taptaṃ malakṣālanayodakam /
vātapittaharaṃ śreṣṭhaṃ rasāyanakaraṃ param

puṣkarassa (madhukasya) ca kāṣṭhaiś ca taptaṃ kūpodbhavodakam /
vātapittaharaṃ śreṣṭhaṃ rasāyanakaraṃ param

(grahaṇīpāṇḍuhṛtkāsaśvāsahṛtparamaṃ hitaṃ /)
karpūra (karkandhu) dārusaṃbhūtataptam uṣṇodakaṃ śubham (nādeyam udakottamam /)
jaṭharāgneś ca sadanaṃ suśrutena pradarśitam

sallakīśākaniryāsakāṣṭhaiś cāpi pṛthak pṛthak /
taptaṃ nirjharajaṃ vāri nāmayān janayed varam (rogān saṃjanaded bahūn)

vaṭaiś cārjunakāṣṭhaiś ca saṃtataṃ tāpitaṃ jalam /
balamedhāprajananaṃ (ā) maitreyeṇa pradarśitam

tarkārī vātahaṃtrī ca kaṇḍūtvagdoṣavardhanam /
vano (navo)dakaṃ susaṃtaptaṃ malānāṃ kṣālane hitam