Avadānakalpalatā · Chapter 44

iti kṣemandraviracitāyāṃ bodhisattvāvadānakalpalatāyāṃ hiraṇyapāṇyavadānaṃ tricatvāriṃśaḥ pallavaḥ //
44. ajātaśatrupitṛdrohāvadānam /
durjanaduḥsahaviṣadharabhīṣaṇataratimirapatitānām /
ālambanajananaṃ bhavabhayaharaṇaṃ jinasmaraṇam

pure rājagṛhābhikhye bhagavān bhūbhṛtaḥ purā /
kaṭake gṛdhrakūṭasya vijahāra tathāgataḥ

tasminnavasare rājā bimbisāraḥ sutapriyaḥ /
ajātaśatruṇā tatra putreṇa krūrakāriṇā

suhṛdaḥ pāvakasyeva devadattasya saṃmatam /
ghorāndhabandhanāgāraṃ niḥsaṃcāraṃ praveśitaḥ

patnyā praveśitaṃ tasya bandhane gūḍhabhojanam /
jñātvā sa tatkṣayākāṅkṣī kṣutkṣāmasya nyavārayat

rūkṣaḥ kṛśo 'timalinaḥ so 'bhavat pṛthivīpatiḥ /
akālakālameghārtaḥ kṛṣṇapakṣa ivoḍupaḥ

saṃkīrṇavāsasaṃtāpātprāyaḥ peśalacetasām /
karotyāliṅganaṃ prauḍhā gāḍhapraṇayinī vipat

sa samuddhiśya śokārtaḥ sugatādhyuṣitāṃ diśam /
kṛtāñjalirnataśirāḥ kṣāmasvaramabhāṣata

nāmastubhyaṃ bhagavate mahārhāya mahārhate /
dīnoddharaṇasaṃnaddhasamyaksaṃbodhibodhicetase

namaste ghorasaṃsāramakarākarasetave /
jināya janatājanmakleśapraśamahetave

namo nityaprabuddhāya sarvasattvaikabandhave /
viśuddhadhānme buddhāya karuṇāmṛtasindhave

iti bhaktisudhāṃ śiktvā sugataśravaṇocitām /
puṇyapuṣpaprasavinīṃ sa cakre stutimañjarīm

sarvajñastasya vijñāya kāyakleśaśamayīṃ daśām /
bandhanāgāravivarālokairāpyāyanam vyadhāt

ajātaśatrustadvṛttaṃ jñātvā śaṅkākulaḥ pituḥ /
nyavārayadbandhagṛhe susūkṣmavivarāṇyapi

tatastasya tadādeśāt cakrurbandhanarakṣiṇaḥ /
kṣureṇa gāḍhabaddhasya pādayostadvikartanam

sa tīvravaiśasakleśavyathitah pārthivaḥ param /
namo buddhāya buddhāyetyārtasaṃkrandanaṃ vyadhāt

bhagavānatha sarvajñaḥ puraḥ pratyakṣatāṃ gataḥ /
śakradattāsanāsīnaḥ kāruṇyāttamabhāṣataḥ

rājan kiṃ kriyate krūrakarmaṇāṃ gatirīdṛśī /
śubhāśubhasamudbhūtaṃ na bhuktaṃ kṣiyate phalam

rāgadveṣaviṣāsakte nānāvyasanaduḥsahe /
evaṃvidhaiva niḥsāre saṃsāre duḥkhasāratā

saṃkleśakalile kāle vipatsaṃpadvisaṃkaṭe /
dhairyameva paritrāṇaṃ vairāgyaṃ ca nirākulam

saṃsāraghoragahanāntaravardhamānaiḥ duḥkhānalavyatikaraprasṛtairasiktāḥ /
dhūmodgamairiva punaḥ sukṛtocitānāṃ bāṣpāmbubindukalilā na dṛśo bhavanti

bhajasva dhairyaṃ duḥkhe 'smin bhogāśāṃ tyaja bhūpate /
pariṇāmavirodhinyaḥ sarvāḥ saṃsāravṛttayaḥ

adhunaiva tavāsannā dehātte kuśalasthitiḥ /
ityuktvā taṃ samāśvasya bhagavān svapadaṃ yayau

bimbisāro 'pi dehānte tasminneva kṣaṇe divi /
abhūjjinarṣabho nāma śrīmān vaiśravaṇātmajaḥ

ajātaśatrurjanakaṃ jñātvā vigatajīvitam /
śarīramasya satkṛtya nininda nijaduṣkṛtam

tasyātitīvrapāpārtaṃ cittaṃ durvṛttadūṣitam /
paścāttāpāgnipatanaṃ prāyaścittamivākarot

so 'vadadbata saṃmohādaiśvaryamadalubdhadhīḥ /
durvṛttapātakaśvabhre patito 'hamadhomukhaḥ

śrutaprajñādaridrāṇāṃ nijanidrāsukhāpahā /
cintā dahati gātrāṇi khalamantrānuvartinām

patitasyāvasannasya pāpapaṅke pramādinah /
anālambasya saṃtrāṇaṃ jinasaṃsmaraṇaṃ mama

iti saṃcintya suciraṃ sa gatvā sugatāntikam /
jugupsamānaḥ kukṛtātparaṃ saṃkocamāyayau

tatrāpavitramātmānaṃ manyamānaḥ sapatrapaḥ /
praṇanāma jinaṃ dūrāt pāpasparśabhayādiva

sāśrunetraḥ paritrāṇaṃ sa sarvajñaṃ vyajijñapat /
sakampaḥ kāyasaṃsaktaṃ vidhunvanniva duṣkṛtam

bhagavan kṛtapāyo 'hamāsannanarakānalaḥ /
uttaptaḥ karuṇāsindhuṃ tvāmeva śaraṇaṃ gataḥ

māmiyaṃ śoṇaparyantā dṛṣṭiste puṣkaraprabhā

khalamantrapravṛttena durvṛttena pramādinā /
mayā vibhavalubdhena pāpena nihataḥ pitā

iti pralāpinastasya vacaḥ śrutvā tathāgataḥ /
sasarha tatpāparajaḥśuddhyai puṇyasarasvatīm

rājanna cintitaḥ pāpaḥ khaleneva svakarmaṇā /
preritastvaṃ pitṛvadhe patitaḥ pāpasaṃkaṭe

duḥkhaṃ tattena bhoktavyaṃ prāptavyaṃ kilbiṣaṃ tvayā /
tava tasya ca bhūpāla tulyaiṣā bhavitavyatā

nijakaṇṭhasamutkīrṇāṃ lalāṭapaṭavartinī /
śilāśakalalekheva niścalā niyatirnṛṇām

kurvatā kaluṣaṃ karma khalapreraṇayā tvayā /
pratyāsannāmṛtaśreyaḥ svahastena tiraskṛtam

adyāpi yadi te pāpaṃ hantuṃ prāptuṃ ca saṃpadam /
vāñchāsti tatkuru matiṃ puṇye pāpaśamātmani

dīpavṛttyā sukhaṃ sūte jīvayatyujjvalaṃ yaśah /
amṛtasya prakāro 'yaṃ suvṛttaḥ satsamāgamaḥ

paścāttāpāgnupātena sādhunā saṃgamena ca /
saṃkīrtanena dānena pāpaṃ naśyati dehinām

pātraṃ pavitrayati naiva guṇān kṣiṇoti snehaṃ na saṃharati naiva malaṃ prasūte /
doṣāvasānaruciraścalatāṃ na dhatte satsaṃgamaḥ sukṛtasadmani ko 'pi dīpaḥ

guṇigaṇavipaddīkṣādakṣaḥ kṣapākṣaṇasaṃnibhaḥ
sakalanayanavyāpārāṇāṃ janeṣu nirodhakaḥ /
asamaviṣamāyāsāvāsaḥ prakāśaparikṣayāt
sṛjati hi mahāmohāgdāḍhaṃ tamaḥ khalasaṃgamaḥ

pratyekabuddhastvaṃ rājan kālena kṣīṇakilbiṣaḥ /
bhaviṣyasi vivekena kṛtālekaḥ śanaiḥ śanaiḥ

iti tasya dayāśvāsaṃ cakāra bahgavān jinah /
patiteṣvadhikaṃ santaḥ karuṇāsnigdhalocanāḥ

tataḥ praṇamya sugataṃ prayātaḥ svapadaṃ nṛpaḥ /
mahataḥ pāpabhārasya viveda laghutāmiva

tasmin prayāte sarvajñaḥ pṛṣṭastatkarma kautukāt /
bhikṣubhiḥ kṣitipālasya pūrvavṛttamabhāṣata

vārāṇasyāṃ nirāyāsavilāsavyavasāyinaḥ /
catvāraḥ śreṣṭhitanayā babhūvuḥ śrīviśṛṅkhalāḥ

te kadācit sukhakṣībā mithaḥ kalikathāsthitāḥ /
pratyekabuddhamāyāntaṃ dadṛśuryauvanoddhatāḥ

taṃ dṛṣṭvā jātavidveṣāḥ śamasaṃyamanindakāḥ /
jyeṣṭhaḥ sundarako nāma bhrātṝn provāca sasmitaḥ

ayaṃ cīvarapātrāṅkaḥ pānena gatajīvitaḥ /
kṣibo vidhīyate bhikṣurityayaṃ me manorathaḥ

ityukte cāpalāt tena dvitīyaḥ kundarābhidhaḥ /
uvāca bhikṣuṃ kṣiptvemaṃ hantumicchāmyahaṃ jale

tatastṛtīyo 'pyavadat pāpaḥ sundarakābhidhaḥ (?) /
eṣa bhikṣurvaraṃ tasyāṃ vīthyāṃ nikṣipyate javāt

caturtho 'pyavadat krūramatiḥ kandarakābhidhaḥ /
bhikṣoḥ kṣureṇa kriyate niścarma caraṇadvayam

iti teṣāṃ bruvāṇānāṃ kaluṣo 'bhūnmanorathaḥ /
yena janmāntare prāpuste svecchāsadṛśaṃ phalam

dhanaṃ paśyati lobhāndhaḥ kridhāndhaḥ śatrumeva ca /
kāmāndhah kāminīmeva darpāndhastu na kiṃcana

dhanidbhūtavikārāṇāṃ prayātyaniyatātmanām /
madamandavicārāṇāmānandaḥ kleśabandhatām

krudhyantyakāraṇamakāraṇamutpatanti snihyantyakāraṇamakāraṇamāmananti /
mohāhatāḥ khalu hitāhitanirvicārāḥ tṛptāḥ paraṃ nṛpaśavaḥ samadā bhavanti

jyeṣṭhaḥ śreṣṭhisutaḥ pāpātsa evāparajanmani /
śāriryānābhidhaḥ śākyaḥ pītvā madyaṃ vyapadyata

dvitīyo 'pi mahānnāma śākyastoye kṣayaṃ gataḥ /
tṛtīyaśca svaputreṇa vyasto rājā prasenajit

bimbisāraścaturtho 'sau dhṛtaḥ putreṇa bandhane /
prayuktaṃ dhanavatkarma bhujyate hi savṛddhikam

mohāhatairiha hi sadbhirasadbhireṣāṃ niḥśarma karma sahasaiva viḍambyate yat /
bāṣpāmbupūrṇanayanairanayopanītaḥmastokaśokavivaśairanubhūyate 'tra

sugatakathitametat pūrvajanmapravṛttaṃ viṣaviṣamavipākaṃ bimbisārasya vṛttam /
vibudhasadasi bhikṣuḥ spaṣṭamākarṇya mene vyasanaśatanimittaṃ dūṣitaṃ cittameva