Atharva Veda · Chapter 10.9

aghāyatāmapi nahyā mukhāni sapatneṣu vajramarpayaitam /
indreṇa dattā prathamā śataudanā bhrātṛvyaghnī yajamānasya gātuḥ

vediṣṭe carma bhavatu barhirlomāni yāni te /
eṣā tvā raśanāgrabhīdgrāvā tvaiṣo'dhi nṛtyatu

bālāste prokṣaṇīḥ santu jihvā saṃ mārṣṭu aghnye /
śuddhā tvaṃ yajñiyā bhūtvā divaṃ prehi śataudane

yaḥ śataudanāṃ pacati kāmapreṇa sa kalpate /
prītā hyasya ṛtvijaḥ sarve yanti yathāyatham

sa svargamā rohati yatrādastridivaṃ divaḥ /
apūpanābhiṃ kṛtvā yo dadāti śataudanām

sa tāṃllokāntsamāpnoti ye divyā ye ca pārthivāḥ /
hiraṇyajyotiṣaṃ kṛtvā yo dadāti śataudanām

ye te devi śamitāraḥ paktāro ye ca te janāḥ /
te tvā sarve gopsyanti maibhyo bhaiṣīḥ śataudane

vasavastvā dakṣiṇata uttarān marutastvā /
ādityāḥ paścādgopsyanti sāgniṣṭomamati drava

devāḥ pitaro manuṣyā gandharvāpsarasaśca ye /
te tvā sarve gopsyanti sātirātramati drava

antarikṣaṃ divaṃ bhūmimādityān maruto diśaḥ /
lokāntsa sarvān āpnoti yo dadāti śataudanām

ghṛtaṃ prokṣantī subhagā devī devān gamiṣyati /
paktāramaghnye mā hiṃsīrdivaṃ prehi śataudane

ye devā diviṣado antarikṣasadaśca ye ye ceme bhūmyāmadhi /
tebhyastvaṃ dhukṣva sarvadā kṣīraṃ sarpiratho madhu

yatte śiro yatte mukhaṃ yau karṇau ye ca te hanū /
āmikṣāṃ duhratāṃ dātre kṣīraṃ sarpiratho madhu

yau ta oṣṭhau ye nāsike ye śṛṅge ye ca te'kṣiṇī /
āmikṣāṃ duhratāṃ dātre kṣīraṃ sarpiratho madhu

yatte klomā yaddhṛdayaṃ purītatsahakaṇṭhikā /
āmikṣāṃ duhratāṃ dātre kṣīraṃ sarpiratho madhu

yatte yakṛdye matasne yadāntraṃ yāśca te gudāḥ /
āmikṣāṃ duhratāṃ dātre kṣīraṃ sarpiratho madhu

yaste plāśiryo vaniṣṭhuryau kukṣī yacca carma te /
āmikṣāṃ duhratāṃ dātre kṣīraṃ sarpiratho madhu

yatte majjā yadasthi yan maṃsaṃ yacca lohitam /
āmikṣāṃ duhratāṃ dātre kṣīraṃ sarpiratho madhu

yau te bāhū ye doṣaṇī yāvaṃsau yā ca te kakut/
āmikṣāṃ duhratāṃ dātre kṣīraṃ sarpiratho madhu

yāste grīvā ye skandhā yāḥ pṛṣṭīryāśca parśavaḥ /
āmikṣāṃ duhratāṃ dātre kṣīraṃ sarpiratho madhu

yau ta urū aṣṭhīvantau ye śroṇī yā ca te bhasat/
āmikṣāṃ duhratāṃ dātre kṣīraṃ sarpiratho madhu

yatte pucchaṃ ye te bālā yadūdho ye ca te stanāḥ /
āmikṣāṃ duhratāṃ dātre kṣīraṃ sarpiratho madhu

yāste jaṅghāḥ yāḥ kuṣṭhikā ṛccharā ye ca te śaphāḥ /
āmikṣāṃ duhratāṃ dātre kṣīraṃ sarpiratho madhu

yatte carma śataudane yāni lomānyaghnye /
āmikṣāṃ duhratāṃ dātre kṣīraṃ sarpiratho madhu

kroḍau te stāṃ puroḍāśāvājyenābhighāritau /
tau pakṣau devi kṛtvā sā paktāraṃ divaṃ vaha

ulūkhale musale yaśca carmaṇi yo vā śūrpe taṇḍulaḥ kaṇaḥ /
yaṃ vā vāto mātariśvā pavamāno mamāthāgniṣṭaddhotā suhutaṃ kṛṇotu

apo devīrmadhumatīrghṛtaścuto brahmaṇāṃ hasteṣu prapṛthaksādayāmi /
yatkāma idamabhiṣiñcāmi vo'haṃ tan me sarvaṃ saṃ padyatāṃ vayaṃ syāma patayo rayīṇām