Atharva Veda · Chapter 10.10

namaste jāyamānāyai jātāyā uta te namaḥ /
bālebhyaḥ śaphebhyo rūpāyāghnye te namaḥ

yo vidyātsapta pravataḥ sapta vidyātparāvataḥ /
śiro yajñasya yo vidyātsa vaśāṃ prati gṛhṇīyāt

vedāhaṃ sapta pravataḥ sapta veda parāvataḥ /
śiro yajñasyāhaṃ veda somaṃ cāsyāṃ vicakṣaṇam

yayā dyauryayā pṛthivī yayāpo gupitā imāḥ /
vaśāṃ sahasradhārāṃ brahmaṇācchāvadāmasi

śataṃ kaṃsāḥ śataṃ dogdhāraḥ śataṃ goptāro adhi pṛṣṭhe asyāḥ /
ye devāstasyāṃ prāṇanti te vaśāṃ vidurekadhā

yajñapadīrākṣīrā svadhāprāṇā mahīlukā /
vaśā parjanyapatnī devām̐ apyeti brahmaṇā

anu tvāgniḥ prāviśadanu somo vaśe tvā /
ūdhaste bhadre parjanyo vidyutaste stanā vaśe

apastvaṃ dhukṣe prathamā urvarā aparā vaśe /
tṛtīyaṃ rāṣṭraṃ dhukṣe'nnaṃ kṣīraṃ vaśe tvam

yadādityairhūyamānopātiṣṭha ṛtavari /
indraḥ sahasraṃ pātrāntsomaṃ tvāpāyayadvaśe

yadanūcīndramairāttvā ṛṣabho'hvayat/
tasmātte vṛtrahā payaḥ kṣīraṃ kruddho'haradvaśe

yatte kruddho dhanapatirā kṣīramaharadvaśe /
idaṃ tadadya nākastriṣu pātreṣu rakṣati

triṣu pātreṣu taṃ somamā devyaharadvaśā /
atharvā yatra dīkṣito barhiṣyāsta hiraṇyaye

saṃ hi somenāgata samu sarveṇa padvatā /
vaśā samudramadhyaṣṭhadgandharvaiḥ kalibhiḥ saha

saṃ hi vātenāgata samu sarvaiḥ patatribhiḥ /
vaśā samudre prānṛtyadṛcaḥ sāmāni bibhratī

saṃ hi sūryeṇāgata samu sarveṇa cakṣuṣā /
vaśā samudramatyakhyadbhadrā jyotīṃṣi bibhratī

abhīvṛtā hiraṇyena yadatiṣṭha ṛtāvari /
aśvaḥ samudro bhūtvādhyaskandadvaśe tvā

tadbhadrāḥ samagacchanta vaśā deṣṭryatho svadhā /
atharvā yatra dīkṣito barhiṣyāsta hiraṇyaye

vaśā mātā rājanyasya vaśā mātā svadhe tava /
vaśāyā yajña āyudhaṃ tataścittamajāyata

ūrdhvo bindurudacaradbrahmaṇaḥ kakudādadhi /
tatastvaṃ jajñiṣe vaśe tato hotājāyata

āsnaste gāthā abhavann uṣṇihābhyo balaṃ vaśe /
pājasyājjajñe yajña stanebhyo raśmayastava

īrmābhyāmayanaṃ jātaṃ sakthibhyāṃ ca vaśe tava /
āntrebhyo jajñire atrā udarādadhi vīrudhaḥ

yadudaraṃ varuṇasyānuprāviśathā vaśe /
tatastvā brahmodahvayatsa hi netramavettava

sarve garbhādavepanta jāyamānādasūsvaḥ /
sasūva hi tāmāhu vaśeti brahmabhiḥ kḷptaḥ sa hyasyā bandhuḥ

yudha ekaḥ saṃ sṛjati yo asyā eka idvaśī /
tarāṃsi yajñā abhavan tarasāṃ cakṣurabhavadvaśā

vaśā yajñaṃ pratyagṛhṇādvaśā sūryamadhārayat/
vaśāyāmantaraviśadodano brahmaṇā saha

vaśāmevāmṛtamāhurvaśāṃ mṛtyumupāsate /
vaśedaṃ sarvamabhavaddevā manuṣyā asurāḥ pitara ṛṣayaḥ

ya evaṃ vidyātsa vaśāṃ prati gṛhṇīyāt/
tathā hi yajñaḥ sarvapādduhe dātre'napasphuran

tisro jihvā varuṇasyāntardīdyatyāsani /
tāsāṃ yā madhye rājati sā vaśā duṣpratigrahā

caturdhā reto abhavadvaśāyāḥ /
āpasturīyamamṛtaṃ turīyaṃ yajñasturīyaṃ paśavasturīyam

vaśā dyaurvaśā pṛthivī vaśā viṣṇuḥ prajāpatiḥ /
vaśāyā dugdhamapibantsādhyā vasavaśca ye

vaśāyā dugdhaṃ pītvā sādhyā vasavaśca ye /
te vai bradhnasya viṣṭapi payo asyā upāsate

somamenāmeke duhre ghṛtameka upāsate /
ya evaṃ viduṣe vaśāṃ daduste gatāstridivaṃ divaḥ

brāhmaṇebhyo vaśāṃ dattvā sarvāṃllokāntsamaśnute /
ṛtaṃ hyasyāmārpitamapi brahmātho tapaḥ

vaśāṃ devā upa jīvanti vaśāṃ manuṣyā uta /
vaśedaṃ sarvamabhavadyāvatsūryo vipaśyati