અથર્વવેદ · અધ્યાય 10.10

નમસ્તે જાયમાનાયૈ જાતાયા ઉત તે નમઃ ।
બાલેભ્યઃ શફેભ્યો રૂપાયાઘ્ન્યે તે નમઃ

યો વિદ્યાત્સપ્ત પ્રવતઃ સપ્ત વિદ્યાત્પરાવતઃ ।
શિરો યજ્ઞસ્ય યો વિદ્યાત્સ વશાં પ્રતિ ગૃહ્ણીયાત્

વેદાહં સપ્ત પ્રવતઃ સપ્ત વેદ પરાવતઃ ।
શિરો યજ્ઞસ્યાહં વેદ સોમં ચાસ્યાં વિચક્ષણમ્

યયા દ્યૌર્યયા પૃથિવી યયાપો ગુપિતા ઇમાઃ ।
વશાં સહસ્રધારાં બ્રહ્મણાચ્છાવદામસિ

શતં કંસાઃ શતં દોગ્ધારઃ શતં ગોપ્તારો અધિ પૃષ્ઠે અસ્યાઃ ।
યે દેવાસ્તસ્યાં પ્રાણન્તિ તે વશાં વિદુરેકધા

યજ્ઞપદીરાક્ષીરા સ્વધાપ્રાણા મહીલુકા ।
વશા પર્જન્યપત્ની દેવાઁ અપ્યેતિ બ્રહ્મણા

અનુ ત્વાગ્નિઃ પ્રાવિશદનુ સોમો વશે ત્વા ।
ઊધસ્તે ભદ્રે પર્જન્યો વિદ્યુતસ્તે સ્તના વશે

અપસ્ત્વં ધુક્ષે પ્રથમા ઉર્વરા અપરા વશે ।
તૃતીયં રાષ્ટ્રં ધુક્ષેઽન્નં ક્ષીરં વશે ત્વમ્

યદાદિત્યૈર્હૂયમાનોપાતિષ્ઠ ઋતવરિ ।
ઇન્દ્રઃ સહસ્રં પાત્રાન્ત્સોમં ત્વાપાયયદ્વશે

યદનૂચીન્દ્રમૈરાત્ત્વા ઋષભોઽહ્વયત્।
તસ્માત્તે વૃત્રહા પયઃ ક્ષીરં ક્રુદ્ધોઽહરદ્વશે

યત્તે ક્રુદ્ધો ધનપતિરા ક્ષીરમહરદ્વશે ।
ઇદં તદદ્ય નાકસ્ત્રિષુ પાત્રેષુ રક્ષતિ

ત્રિષુ પાત્રેષુ તં સોમમા દેવ્યહરદ્વશા ।
અથર્વા યત્ર દીક્ષિતો બર્હિષ્યાસ્ત હિરણ્યયે

સં હિ સોમેનાગત સમુ સર્વેણ પદ્વતા ।
વશા સમુદ્રમધ્યષ્ઠદ્ગન્ધર્વૈઃ કલિભિઃ સહ

સં હિ વાતેનાગત સમુ સર્વૈઃ પતત્રિભિઃ ।
વશા સમુદ્રે પ્રાનૃત્યદૃચઃ સામાનિ બિભ્રતી

સં હિ સૂર્યેણાગત સમુ સર્વેણ ચક્ષુષા ।
વશા સમુદ્રમત્યખ્યદ્ભદ્રા જ્યોતીંષિ બિભ્રતી

અભીવૃતા હિરણ્યેન યદતિષ્ઠ ઋતાવરિ ।
અશ્વઃ સમુદ્રો ભૂત્વાધ્યસ્કન્દદ્વશે ત્વા

તદ્ભદ્રાઃ સમગચ્છન્ત વશા દેષ્ટ્ર્યથો સ્વધા ।
અથર્વા યત્ર દીક્ષિતો બર્હિષ્યાસ્ત હિરણ્યયે

વશા માતા રાજન્યસ્ય વશા માતા સ્વધે તવ ।
વશાયા યજ્ઞ આયુધં તતશ્ચિત્તમજાયત

ઊર્ધ્વો બિન્દુરુદચરદ્બ્રહ્મણઃ કકુદાદધિ ।
તતસ્ત્વં જજ્ઞિષે વશે તતો હોતાજાયત

આસ્નસ્તે ગાથા અભવન્ન્ ઉષ્ણિહાભ્યો બલં વશે ।
પાજસ્યાજ્જજ્ઞે યજ્ઞ સ્તનેભ્યો રશ્મયસ્તવ

ઈર્માભ્યામયનં જાતં સક્થિભ્યાં ચ વશે તવ ।
આન્ત્રેભ્યો જજ્ઞિરે અત્રા ઉદરાદધિ વીરુધઃ

યદુદરં વરુણસ્યાનુપ્રાવિશથા વશે ।
તતસ્ત્વા બ્રહ્મોદહ્વયત્સ હિ નેત્રમવેત્તવ

સર્વે ગર્ભાદવેપન્ત જાયમાનાદસૂસ્વઃ ।
સસૂવ હિ તામાહુ વશેતિ બ્રહ્મભિઃ કૢપ્તઃ સ હ્યસ્યા બન્ધુઃ

યુધ એકઃ સં સૃજતિ યો અસ્યા એક ઇદ્વશી ।
તરાંસિ યજ્ઞા અભવન્ તરસાં ચક્ષુરભવદ્વશા

વશા યજ્ઞં પ્રત્યગૃહ્ણાદ્વશા સૂર્યમધારયત્।
વશાયામન્તરવિશદોદનો બ્રહ્મણા સહ

વશામેવામૃતમાહુર્વશાં મૃત્યુમુપાસતે ।
વશેદં સર્વમભવદ્દેવા મનુષ્યા અસુરાઃ પિતર ઋષયઃ

ય એવં વિદ્યાત્સ વશાં પ્રતિ ગૃહ્ણીયાત્।
તથા હિ યજ્ઞઃ સર્વપાદ્દુહે દાત્રેઽનપસ્ફુરન્

તિસ્રો જિહ્વા વરુણસ્યાન્તર્દીદ્યત્યાસનિ ।
તાસાં યા મધ્યે રાજતિ સા વશા દુષ્પ્રતિગ્રહા

ચતુર્ધા રેતો અભવદ્વશાયાઃ ।
આપસ્તુરીયમમૃતં તુરીયં યજ્ઞસ્તુરીયં પશવસ્તુરીયમ્

વશા દ્યૌર્વશા પૃથિવી વશા વિષ્ણુઃ પ્રજાપતિઃ ।
વશાયા દુગ્ધમપિબન્ત્સાધ્યા વસવશ્ચ યે

વશાયા દુગ્ધં પીત્વા સાધ્યા વસવશ્ચ યે ।
તે વૈ બ્રધ્નસ્ય વિષ્ટપિ પયો અસ્યા ઉપાસતે

સોમમેનામેકે દુહ્રે ઘૃતમેક ઉપાસતે ।
ય એવં વિદુષે વશાં દદુસ્તે ગતાસ્ત્રિદિવં દિવઃ

બ્રાહ્મણેભ્યો વશાં દત્ત્વા સર્વાંલ્લોકાન્ત્સમશ્નુતે ।
ઋતં હ્યસ્યામાર્પિતમપિ બ્રહ્માથો તપઃ

વશાં દેવા ઉપ જીવન્તિ વશાં મનુષ્યા ઉત ।
વશેદં સર્વમભવદ્યાવત્સૂર્યો વિપશ્યતિ