આર્યાસપ્તશતી · શ્લોક 664-683

સત્યં પતિર્ અવિદગ્ધઃ સા તુ સ્વ-ધિયૈવ નિધુવને નિપુણા ।
માર્ત્તિકમ્ આધાય ગુરું ધનુર્ અધિગતમ્ એકલવ્યેન

સૌભાગ્ય-માનવાન્ સ ત્વયાવધીર્યાપમાનમ્ આનીતઃ ।
સ્વં વિરહ-પાણ્ડિમાનં ભસ્મ-સ્નાનોપમં તનુતે

સખિ મમ કરઞ્જ-તૈલં બહુ-સન્દેશં પ્રહેષ્યસીત્ય્ ઉદિતા ।
શ્વશુર-ગૃહ-ગમન-મિલિતં બાષ્પ-જલં સંવૃણોત્ય્ અસતી

સન્દર્શયન્તિ સુન્દરિ કુલટાનાં તમસિ વિતતમ્ અવિકલ્પે ।
મૌલિમણિદીપ-કલિકા વર્તિ-નિભા ભોગિનો ઽધ્વાનમ્

સર્વં વનં તૃણાલ્યા પિહિતં પીતાઃ સિતાંશુ-રવિ-તારાઃ ।
પ્રધ્વંસાઃ પન્થાનો મલિનેનોદ્ગમ્ય મેઘેન

સમ્યગ્ અનિષ્પન્નઃ સન્ યો ઽર્થસ્ ત્વરયા સ્વયં સ્ફુટીક્રિયતે ।
સ વ્યઙ્ગ એવ ભવતિ પ્રથમો વિનતા-તનૂજ ઇવ

સજ્જન એવ હિ વિદ્યા શોભનાયૈ ભવતિ દુર્જને મોઘા ।
ન વિદૂર-દર્શનતયા કૈશ્ચિદ્ ઉપાદીયતે ગૃધ્રઃ

સુભગં વદતિ જનસ્ તં નિજ-પતિર્ ઇતિ નૈષ રોચતે મહ્યમ્ ।
પીયૂષેઽપિ હિ ભેષજ-ભાવોપનતે ભવત્ય્ અરુચિઃ

સૌધ-ગવાક્ષ-ગતાપિ હિ દૃષ્ટિસ્ તં સ્થિતિ-કૃત-પ્રયત્નમ્ અપિ ।
હિમ-ગિરિ-શિખર-સ્ખલિતા ગઙ્ગેવૈરાવતં હરતિ

સહ-ઘર્મ-ચારિણી મમ પરિચ્છદઃ સુતનુ નેહ સન્દેહઃ ।
ન તુ સુખયતિ તુહિન-દિન-ચ્છત્ર-ચ્છાયેવ સજ્જન્તી

સકલ-ગુણૈક-નિકેતન દાનવ-વાસેન ઘરણિરુહરાજઃ ।
જાતો ઽસિ ભૂતલે ત્વં સતામ્ અનાદેય-ફલ-કુસુમઃ

સુન્દરિ તાટઙ્કમયં ચક્રમ્ ઇવોદ્વહતિ તાવકે કર્ણે ।
નિપતતિ નિકામ-તીક્ષ્ણં કટાક્ષ-બાણો ઽર્જુન-પ્રણયી

સ્વાધીનૈવ ફલ-ર્દ્ધિર્ જનોપજીવ્યત્વમ્ ઉચ્છ્રય-ચ્છાયા ।
સત્-પુંસો મરુ-ભૂરુહ ઇવ જીવન-માત્રમ્ આશાસ્યમ્

સન્તાપ-મોહ-કમ્પાન્ સમ્પાદયિતું નિહન્તુમ્ અપિ જન્તૂન્ ।
સખિ દુર્જનસ્ય ભૂતિઃ પ્રસરતિ દૂરં જ્વરસ્યેવ

સુખયિતતરાં ન રક્ષતિ પરિચય-લેશં ગણાઙ્ગનેવ શ્રીઃ ।
કુક-કામિનીવ નોજ્ઝતિ વાગ્-દેવી જન્મ-જન્માપિ

સ્વ-સદન-નિકટે નલિનીમ્ અભિનવ-જાત-ચ્છદાં નિરીક્ષ્યૈવ ।
હા ગૃહિણીતિ પ્રલપંશ્ ચિરાગતઃ સખિ પતિઃ પતિતઃ

સચિ ચતુરાનન-ભાવાદ્ વૈમુખ્યં ક્વાપિ નૈવ દર્શયતિ ।
અયમ્ એક-હૃદય એવ દ્રુહિણ ઇવ પ્રિયતમસ્ તદ્ અપિ

સત્યં મધુરો નિયતં વક્રો નૂનં કલાધરો દયિતઃ ।
સ તુ વેદ ન દ્વિતીયામ્ અકલઙ્કઃ પ્રતિપદ્-ઇન્દુર્ ઇવ

સ્વ-સ્થાનાદ્ અપિ વિચલતિ મજ્જતિ જલધૌ ચ નીચમ્ અપિ ભજતે ।
નિજ-પક્ષ-રક્ષણ-મનાઃ સુજનો મૈનાક-શૈલ ઇવ

સંવૃણુ બાષ્પ-જલં સખિ દૃશમ્ ઉપરજ્યાઞ્જનેન વલયૈનામ્ ।
દયિતઃ પશ્યતુ પલ્લવ-પઙ્કજયોર્ યુગપદ્ એવ રુચમ્