આર્યાસપ્તશતી · શ્લોક 604-623

સ-વ્રીડ-સ્મિત-સુભગે સ્પૃષ્ટાસ્પૃષ્ટેવ કિંચિદ્ અપયાન્તી ।
અપસરસિ સુન્દરિ યથા યથા તથા સ્પૃશસિ મમ હૃદયમ્

સખિ સુખયત્ય્ અવકાશ-પ્રાપ્તઃ પ્રેયાન્ યથા તથા ન ગૃહી ।
વાતાદ્ અવારિતાદ્ અપિ ભવતિ ગવાક્ષાનિલઃ શીતઃ

સતતમ્ અરુણિત-મુખે સખિ નિગિરન્તી ગરલમ્ ઇવ ગિરાં ગુમ્ફમ્ ।
અવગણિતૌષધિ-મન્ત્રા ભુજઙ્ગિ રક્તં વિરઞ્જયસિ

સ્થલ-કમલ-મુગ્ધ-વપુષા સાતઙ્કાઙ્ક-સ્થિતૈક-ચરણેન ।
આશ્વાસયતિ વિસિન્યાઃ કૂલે વિસ-કણ્ઠિકા શફરમ્

સ-નખ-પદમ્ અધિક-ગૌરં નાભી-મૂલં નિરંશુકં કૃત્વા ।
અનયા સેવિત પવન ત્વં કિં કૃત-મલય-ભૃગુપાતઃ

સર્વાઙ્ગમ્ અર્પયન્તી લોલા સુપ્તં શ્રમેણ શય્યાયામ્ ।
અલસમ્ અપિ ભાગ્યવન્તં ભજતે પુરુષયિતેવ શ્રીઃ

સુદિતં તદ્ એવ યત્ર સ્મારં સ્મારં વિયોગ-દુઃખાનિ ।
આલિઙ્ગતિ સા ગાઢં પુનઃ પુનર્ યામિની-પ્રથમે

સાન્તર્-ભયં ભુજિષ્યા યથા યથાચરતિ સમધિકાં સેવામ્ ।
સાશઙ્ક-સેર્ષ્ય-સભયા તથા તથા ગેહિની તસ્ય

સુન્દરિ દર્શયતિ યથા ભવદ્-વિપક્ષસ્ય તત્-સખી કાન્તિમ્ ।
પતતિ તથા મમ દૃષ્ટિસ્ ત્વદ્-એક-દાસસ્ય સાસૂયા

સ્વાધીનૈર્ અધર-વ્રણ-નખાઙ્ક-પત્રાવલોપ-દિન-શયનૈઃ ।
સુભગા સુભગેત્ય્ અનયા સખિ નિખિલા મુખરિતા પલ્લી

સરિત ઇવ યસ્ય ગેહે શુષ્યન્તિ વિશાલ-ગોત્રજા નાર્યઃ ।
ક્ષારાસ્વ્ એવ સ તૃપ્યતિ જલ-નિધિ-લહરીષુ જલદ ઇવ

સકલ-કટકૈક-મણ્ડનિ કઠિની-ભૂતાશયે શિખર-દન્તિ ।
ગિરિભુવ ઇવ તવ મન્યે મનઃ શિલા સમભવચ્ ચણ્ડિ

સખિ દુરવગાહ-ગહનો વિદધાનો વિપ્રિયં પ્રિય-જનેઽપિ ।
ખલ ઇવ દુર્લક્ષ્યસ્ તવ વિનત-મુખસ્યોપરિ સ્થિતઃ કોપઃ

સ્વેદ-સચેલ-સ્નાતા સપ્ત-પદી સપ્ત મણ્ડલીર્ યાન્તી ।
સ-મદન-દહન-વિકારા મનોહરા વ્રીડિતા નમતિ

સુરસ-પ્રવર્તમાનઃ સઙ્ઘાટો ઽયં સમાન-વૃત્તાનામ્ ।
એત્યૈવ ભિન્ન-વૃત્તૈર્ ભઙ્ગુરિતઃ કાવ્ય-સર્ગ ઇવ

સર્વાસામ્ એવ સખે પય ઇવ સુરતં મનોહારિ ।
તસ્યા એવ પુનઃ પુનર્ આવૃત્તૌ દુગ્ધમ્ ઇવ મધુરમ્

સ્વપ્નેઽપિ યાં ન મુઞ્ચસિ યા તેઽનુગ્રાહિણી હૃદિ-સ્થાપિ ।
દુષ્ટાં ન બુદ્ધિમ્ ઇવ તાં ગૂઢ-વ્યભિચારિણીં વેત્સિ

સપરાવૃતિ ચરન્તી વાત્ય્ એવ તૃણં મનો ઽનવદ્યાઙ્ગિ ।
હરસિ ક્ષિપસિ તરલયસિ ભ્રમયસિ તોલયસિ પાતયસિ

સા બહુ-લક્ષણ-ભાવા સ્ત્રી-માત્રં વેતિ કિતવ તવ તુલ્યમ્ ।
કોટિર્ વરાટિકા વા દ્યૂત-વિધેઃ સર્વ એવ પણઃ

સા વિરહ-દહન-દૂના મૃત્વા મૃત્વાપિ જીવતિ વરાકી ।
શારીવ કિતવ ભવતાનુકૂલિતા પાતિતાક્ષેણ