Āryāsaptaśatī · Verses 523-543

vakṣasi vijṛmbhamāṇe stana-bhinnaṃ truṭati kañcukaṃ tasyāḥ |
pūrva-dayitānurāgas tava hṛdi na manāg api truṭati

vyaktim avekṣya tad anyāṃ tasyām eveti viditam adhunā tu |
harmya-hari-mukham iva tvām ubhayoḥ sādhāraṇaṃ vedmi

vyajanasyeva samīpe gatāgatais tāpa-hāriṇo bhavataḥ |
añcalam iva cañcalatāṃ mama sakhyāḥ prāpitaṃ cetaḥ

vitarantī rasam antar mamārdra-bhāvaṃ tanoṣi tanu-gātri |
antaḥ-salilā sarid iva yan nivasasi bahir adṛśyāpi

vihita-vividhānubandho mānonnatayāvadhīrito mānī |
labhate kutaḥ prabodhaṃ sa jāgaritvaiva nidrāṇaḥ

vrīḍā-vimukhīṃ vīta-snehām āśaṅkya kāku-vāṅ-madhuraḥ |
premārdra-sāparādhāṃ diśati dṛśaṃ vallabhe bālā

vakṣaḥ-praṇayini sāndra-śvāse vāṅ-mātra-subhaṭi ghana-gharme |
sutanu lalāṭa-niveśita-lalāṭike tiṣṭha vijitāsi

vicarati paritaḥ kṛṣṇe rādhāyāṃ rāga-capala-nayanāyām |
daśa-dig-vedha-viśuddhaṃ viśikhaṃ vidadhāti viṣameṣuḥ

vimukhe caturmukhe śritavati cānīśa-bhāvam īśe'pi |
magna-mahī-nistāre hariḥ paraṃ stabdha-romābhūt

vāpī-kacche vāsaḥ kaṇṭaka-vṛtayaḥ sajāgarā bhramarāḥ |
ketaka-viṭapa kim etair nanu vāraya mañjarī-gandham

vicalasi mugdhe vidhṛtā yathā tathā viśasi hṛdaya-madaye me |
śaktiḥ prasūna-dhanuṣaḥ prakampa-lakṣyaṃ spṛśantīva

vihitaāsama-śara-samaro jita-gāṅgeya-cchaviḥ kṛtāṭopaḥ |
puruṣāyite virājati dehas tava sakhi śikhaṇḍīva

vṛti-vivara-nirgatasya pramadā-bimbādharasya madhu pibate |
avadhīrita-pīyūṣaḥ spṛhayati devādhirājo 'pi

vāsita-madhuni vadhūnām avataṃse mauli-maṇḍane yūnām |
vilasati sā puru-kusume madhupīva vana-prasūneṣu

vrīḍā-prasaraḥ prathamaṃ tad anu ca rasa-bhāva-puṣṭa-ceṣṭeyam |
javanī-vinirgamād anu naṭīva dayitā mano harati

vāsasi haridrayeva tvayi gaurāṅgyā niveśito rāgaḥ |
piśunena so 'panītaḥ sahasā patatā jaleneva

viṣvag-vikāsi-saurabha-rāgāndha-vyāgha-bādhanīyasya |
kvacid api kuraṅga bhavato nābhīm ādāya na sthānam

vaṭa-kuṭaja-śāla-śālmali-rasāla-bahu-sāra-sindhu-vārāṇām |
asti bhidā malayācala-sambhava-saurabhya-sāmye'pi

vinihita-kaparda-koṭiṃ cāpala-doṣeṇa śaṅkaraṃ tyaktvā |
vaṭam ekam anusarantī jāhnavi luṭhasi prayāga-taṭe

veda caturṇāṃ kṣaṇadā praharāṇāṃ saṅgamaṃ viyogaṃ ca |
caraṇānām iva kūrmī saṅkocam api prasāram api