આર્યાસપ્તશતી · શ્લોક 523-543

વક્ષસિ વિજૃમ્ભમાણે સ્તન-ભિન્નં ત્રુટતિ કઞ્ચુકં તસ્યાઃ ।
પૂર્વ-દયિતાનુરાગસ્ તવ હૃદિ ન મનાગ્ અપિ ત્રુટતિ

વ્યક્તિમ્ અવેક્ષ્ય તદ્ અન્યાં તસ્યામ્ એવેતિ વિદિતમ્ અધુના તુ ।
હર્મ્ય-હરિ-મુખમ્ ઇવ ત્વામ્ ઉભયોઃ સાધારણં વેદ્મિ

વ્યજનસ્યેવ સમીપે ગતાગતૈસ્ તાપ-હારિણો ભવતઃ ।
અઞ્ચલમ્ ઇવ ચઞ્ચલતાં મમ સખ્યાઃ પ્રાપિતં ચેતઃ

વિતરન્તી રસમ્ અન્તર્ મમાર્દ્ર-ભાવં તનોષિ તનુ-ગાત્રિ ।
અન્તઃ-સલિલા સરિદ્ ઇવ યન્ નિવસસિ બહિર્ અદૃશ્યાપિ

વિહિત-વિવિધાનુબન્ધો માનોન્નતયાવધીરિતો માની ।
લભતે કુતઃ પ્રબોધં સ જાગરિત્વૈવ નિદ્રાણઃ

વ્રીડા-વિમુખીં વીત-સ્નેહામ્ આશઙ્ક્ય કાકુ-વાઙ્-મધુરઃ ।
પ્રેમાર્દ્ર-સાપરાધાં દિશતિ દૃશં વલ્લભે બાલા

વક્ષઃ-પ્રણયિનિ સાન્દ્ર-શ્વાસે વાઙ્-માત્ર-સુભટિ ઘન-ઘર્મે ।
સુતનુ લલાટ-નિવેશિત-લલાટિકે તિષ્ઠ વિજિતાસિ

વિચરતિ પરિતઃ કૃષ્ણે રાધાયાં રાગ-ચપલ-નયનાયામ્ ।
દશ-દિગ્-વેધ-વિશુદ્ધં વિશિખં વિદધાતિ વિષમેષુઃ

વિમુખે ચતુર્મુખે શ્રિતવતિ ચાનીશ-ભાવમ્ ઈશેઽપિ ।
મગ્ન-મહી-નિસ્તારે હરિઃ પરં સ્તબ્ધ-રોમાભૂત્

વાપી-કચ્છે વાસઃ કણ્ટક-વૃતયઃ સજાગરા ભ્રમરાઃ ।
કેતક-વિટપ કિમ્ એતૈર્ નનુ વારય મઞ્જરી-ગન્ધમ્

વિચલસિ મુગ્ધે વિધૃતા યથા તથા વિશસિ હૃદય-મદયે મે ।
શક્તિઃ પ્રસૂન-ધનુષઃ પ્રકમ્પ-લક્ષ્યં સ્પૃશન્તીવ

વિહિતઆસમ-શર-સમરો જિત-ગાઙ્ગેય-ચ્છવિઃ કૃતાટોપઃ ।
પુરુષાયિતે વિરાજતિ દેહસ્ તવ સખિ શિખણ્ડીવ

વૃતિ-વિવર-નિર્ગતસ્ય પ્રમદા-બિમ્બાધરસ્ય મધુ પિબતે ।
અવધીરિત-પીયૂષઃ સ્પૃહયતિ દેવાધિરાજો ઽપિ

વાસિત-મધુનિ વધૂનામ્ અવતંસે મૌલિ-મણ્ડને યૂનામ્ ।
વિલસતિ સા પુરુ-કુસુમે મધુપીવ વન-પ્રસૂનેષુ

વ્રીડા-પ્રસરઃ પ્રથમં તદ્ અનુ ચ રસ-ભાવ-પુષ્ટ-ચેષ્ટેયમ્ ।
જવની-વિનિર્ગમાદ્ અનુ નટીવ દયિતા મનો હરતિ

વાસસિ હરિદ્રયેવ ત્વયિ ગૌરાઙ્ગ્યા નિવેશિતો રાગઃ ।
પિશુનેન સો ઽપનીતઃ સહસા પતતા જલેનેવ

વિષ્વગ્-વિકાસિ-સૌરભ-રાગાન્ધ-વ્યાઘ-બાધનીયસ્ય ।
ક્વચિદ્ અપિ કુરઙ્ગ ભવતો નાભીમ્ આદાય ન સ્થાનમ્

વટ-કુટજ-શાલ-શાલ્મલિ-રસાલ-બહુ-સાર-સિન્ધુ-વારાણામ્ ।
અસ્તિ ભિદા મલયાચલ-સમ્ભવ-સૌરભ્ય-સામ્યેઽપિ

વિનિહિત-કપર્દ-કોટિં ચાપલ-દોષેણ શઙ્કરં ત્યક્ત્વા ।
વટમ્ એકમ્ અનુસરન્તી જાહ્નવિ લુઠસિ પ્રયાગ-તટે

વેદ ચતુર્ણાં ક્ષણદા પ્રહરાણાં સઙ્ગમં વિયોગં ચ ।
ચરણાનામ્ ઇવ કૂર્મી સઙ્કોચમ્ અપિ પ્રસારમ્ અપિ