Āryāsaptaśatī · Verses 469-498

yan nāvadhim arthayate pātheyārthaṃ dadāti sarvasvam |
tenānayāti-dāruṇa-śaṅkām āropitaṃ cetaḥ

yūnām īrṣyā-vairaṃ vitanvatā taruṇi cakra-rucireṇa |
tava jagahnenākulitā nikhilā pallī khaleneva

yāvaj jīvana-bhāvī tulyāśayoyor nitānta-nirbhedaḥ |
nadayor ivaiṣa yuvayoḥ saṅgo rasam adhikam āvahatu

yan nihitāṃ śekharayasi mālāṃ sā yātu śaṭha bhavantam iti |
praharantīṃ śirasi padā smarāmi tāṃ garva-guru-kopām

yauvana-guptiṃ patyau bandhuṣu mugdhatvam ārjavaṃ guruṣu |
kurvāṇā halika-vadhūḥ praśasyate vyājato yuvabhiḥ

yo na gurubhir na mitrair na vivekenāpi naiva ripu-hasitaiḥ |
niyamita-pūrvaḥ sundari sa vinītatvaṃ tvayā nītaḥ

yan-mūlam ārdram udakaiḥ kusumaṃ pratiparva phala-bharaḥ paritaḥ |
druma tan mādyasi vīcī-paricaya-pariṇāmam avicintya

yasyāṅke smara-saṅgara-viśrānti-prāñjalā sakhī svapiti |
sa vahatu guṇābhimānaṃ madana-dhanur-valli-cola iva

yadi dāna-gandha-mātrād vasanti sapta-cchade'pi dantinyaḥ |
kim iti mada-paṅka-malināṃ karī kapola-sthalīṃ vahati

yad-avadhi vivṛddha-mātrā vikasita-kusumotkarā śaṇa-śreṇī |
pītāṃśuka-priyeyaṃ tadavadhi pallī-pateḥ putrī

yamunā-taraṅga-taralaṃ na kuvalayaṃ kusuma-lāvi tava sulabham |
yadi saurabhānusārī jhaṅkārī bhramati na bhramaraḥ

iti vibhāvyākhyā-sametā ya-kāra-vrajyā ||
ra--kāra-vrajyā
rājyābhiṣeka-salila-kṣālita-mauleḥ kathāsu kṛṣṇasya |
garva-bhara-mantharākṣī paśyati pada-paṅkajaṃ rādhā

rati-kalaha-kupita-kāntā-kara-cikurākarṣa-mudita-gṛha-nātham |
bhavati bhavanaṃ tad anyat prāg-vaṃśaḥ parṇa-śālā vā

rogo rājāyata iti janavādaṃ satyam adya kalayāmi |
ārogya-pūrvakaṃ tvayi talpa-prāntāgate subhaga

ruddha-svarasa-prasarasyālibhir agre nataṃ priyaṃ prati me |
srotasa iva nimnaṃ prati rāgasya dviguṇa āvegaḥ

rūpam idaṃ kāntir asāv ayam utkarṣaḥ suvarṇa-racaneyam |
durgata-militā lalite bhramasi pratimandira-dvāram

racite nikuñja-patrair bhikṣuka-pātre dadāti sāvajñam |
paryuṣitam api sutīkṣṇa-śvāsa-kaduṣṇaṃ vadhūr annam

rakṣati na khalu nija-sthitim alaghuḥ sthāpayati nāyakaḥ sa yathā |
tiṣṭhati tathaiva tad-guṇa-viddheyaṃ hāra-yaṣṭhir iva

rājasi kṛśāṅgi maṅgala-kalaśī sahakāra-pallaveneva |
tenaiva cumbita-mukhī prathamāvirbhūta-rāgeṇa

rūpa-guṇa-hīna-hāryā bhavati laghur dhūlir anila-capaleva |
prathayati pṛghu-guṇa-neyā taruṇī taraṇir iva garimāṇam