Āryāsaptaśatī · Verses 449-468

mama kupitāyāś chāyāṃ bhūmāv āliṅgya sakhi milat-pulakaḥ |
snehamayatvam anujjhan karoti kiṃ naiṣa mām aruṣam

muṣita iva kṣaṇa-virahe ripur iva kusumeṣu-keli-saṅgrāme |
dāsa iva śrama-samaye bhajan natāṅgīṃ na tṛpyāmi

muñcasi kiṃ mānavatīṃ vyavasāyād dviguṇa-manyu-vegeti |
sneha-bhavaḥ payasāgniḥ sāntvena ca roṣa unmiṣati

malayajam apasārya ghanaṃ vījana-vighnaṃ vidhāya bāhubhyām |
smara-santāpād agaṇita-nidāgham āliṅgate mithunam

mahato 'pi hi viśvāsān mahāśayā dadhati nālpam api laghavaḥ |
saṃvṛṇute'drī-nudadhir nidāgha-nadyo na bhekam api

madhu-dhāreva na muñcasi mānini rūkṣāpi mādhurīṃ sahajām |
kṛta-mukha-bhaṅgāpi rasaṃ dadāsi mama sarid ivāmbhodheḥ

madanākṛṣṭa-nurjyā-ghātair iva gṛhiṇi pathika-taruṇānām |
vīṇā-tantrī-kvāṇaiḥ keṣāṃ na vikampate cetaḥ

mama bhayam asyāḥ kopo nirvedo 'syā mamāpi mandākṣam |
jātaṃ kva cāntarikṣe smita-saṃvṛti-namita-kandharayoḥ

muktāmbaraiva dhāvatu nipatatu sahasā trimārgagā vāstu |
iyam eva narmadā mama vaṃśa-prabhavānurūpa-rasā

mṛgamada-lepanam enaṃ nīla-nicolaiva niśi niṣeva tvam |
kālindyām indīvaram indindira-sundarīva sakhi

mama sakhyā nayana-pathe militaḥ śakto na kaścid api calitum |
patito 'si pathika viṣame ghaṭṭa-kuṭīyaṃ kusuma-ketoḥ

mahatā priyeṇa nirmitam apriyam api subhaga sahyatāṃ yāti |
suta-sambhavena yauvana-vināśanaṃ na khalu khedāya

māna-graha-guru-kopād anu dayitāty eva rocate mahyam |
kāñcanamayī vibhūṣā dāhāñcita-śuddha-bhāveva

iti vibhāvyākhyā-sametā ma-kāra-vrajyā ||
ya-kāra-vrajyā
yūnaḥ kaṇṭaka-viṭapāni viāñcala-grāhiṇas tyajantī sā |
vana iva pure'pi vicarati puruṣaṃ tvām eva jānantī

yuṣmāsūpagatāḥ smo vibudhā vāṅ-mātra-pāṭavena vayam |
antarbhavati bhavatsv api nābhaktas tan na vijñātam

yatra na dūtī yatra snigdhā na dṛśo 'pi nipuṇayā nihitāḥ |
na giro 'dyāpi vyaktīkṛtaḥ sa bhāvo 'nurāgeṇa

yā nīyate sapatny praviśya yāvarjitā bhujaṅgena |
yamunāyā iva tasyāḥ sakhi malinaṃ jīvanaṃ manye

yasminn ayaśo 'pi yaśo hrīr vighno māna eva dauḥśīlyam |
laghutā guṇajñatā kiṃ navo yuvā sakhi na te dṛṣṭaḥ

yad vīkṣyate khalānāṃ māhātmyaṃ kvāpi daiva-yogena |
kākānām iva śauklyaṃ tad api hi na cirād anarthāya

yat khalu khala-mukha-huta-vaha-vinihitam api śuddhim eva parameti |
tad anala-śaucam ivāṃśukam iha loke durlabhaṃ prema