Āryāsaptaśatī · Verses 389-408

priya āyāto dūrād iti yā prītir babhūva gehinyāḥ |
pathikebhyaḥ pūrvāgata iti garvāt sāpi śata-śikharā

pṛṣṭhaṃ prayaccha mā spṛśa dūrād apasarpa vihita-vaimukhya |
tvām anudhāvati taraṇis tad api guṇākarṣa-taraleyam

priyayā kuṅkuma-piñjara-pāṇi-dvaya-yojanāṅkitaṃ vāsaḥ |
prahitaṃ māṃ yācñāñjali-sahasra-karaṇāya śikṣayati

prācīrāntariteyaṃ priyasya vadane'dharaṃ samarpayati |
prāg-giri-pihitā rātriḥ sandhyā-rāgaṃ dinasyeva

para-pati-nirdaya-kulaṭāśoṣita śaṭha neṣyatā na kopena |
dagdha-mamatopataptā rodimi tava tānavaṃ vīkṣya

prāṅgaṇa eva kadā māṃ śliṣyantī many-kampi-kuca-kalaśā |
aṃsa-niṣaṇṇa-mukhī sā snapayati bāṣpeṇa mama pṛṣṭham

pretaiḥ praśasta-sattvā sāśru vṛkair vīkṣitā skhalad-grāsaiḥ |
cumbati mṛtasya vadanaṃ bhūta-mukholkekṣitaṃ bālā

piśunaḥ khalu sujanānāṃ khalam eva puro vidhāya jetavyaḥ |
kṛtvā jvaram ātmīyaṃ jigāya bāṇaṃ raṇe viṣṇuḥ

piba madhupa bakula-kalikāṃ dūre rasanāgra-mātram ādhāya |
adhara-vilepa-samāpye madhuni mudhā vadanam arpayasi

prāyeṇaiva hi malinā malinānām āśrayatvam upayānti |
kālindī-puṭa-bhedaḥ kāliya-puṭa-bhedanaṃ bhavati

paśya priya-tanu-vighaṭana-bhayena śaśi-mauli-deha-saṃlagnā |
subhagaika-daivatam umā śirasā bhāgīrathīṃ vahati

pathika-vadhū-jana-locana-nīra-nadī-mātṛka-pradeśeṣu |
dhana-maṇḍalam ākhaṇḍala-dhanuṣā kuṇḍalitam iva vidhinā

prativeśi-mitra-bandhuṣu dūrāt kṛcchrāgato 'pi gehinyā |
atikeli-lampaṭayā dinam ekam agopi geha-patiḥ

para-paṭa iva rajakībhir malino bhuktvāpi nirdayaṃ tābhiḥ |
artha-grahaṇena vinā jaghanya mukto 'si kulaṭābhiḥ

iti vibhāvyākhyā-sametā pa-kāra-vrajyā ||
ba-kāra-vrajyā
bahu-yoṣiti lākṣāruṇa-śirasi vayasyena dayita upahasite |
tat-kāla-kalita-lajjā piśunayati sakhīṣu saubhāgyam

bandhana-bhājo 'muṣyāś cikura-kalāpasya muktamānasya |
sindūrita-sīmanta-cchalena hṛdayaṃ vidīrṇam iva

balam api vasati mayīti śreṣṭhini guru-garva-gadgadaṃ vadati |
taj-jāyayā janānāṃ mukham īkṣitam āvṛta-smitayā

balavad anilopanīta-sphuṭita-navāmbhoja-saurabho madhupaḥ |
ākṛṣyate nalinyā nāsā-nikṣipta-baḍiśa-rajjur iva

bāṇaṃ harir iva kurute sujano bahudoṣam apy adoṣam iva |
yāvad doṣaṃ jāgrati malimlucā iva punaḥ piśunāḥ

bauddhasyeva kṣaṇiko yadyapi bahu-vallabhasya tava bhāvaḥ |
bhagnā bhagnā bhrūr iva na tu tasyā vighaṭate maitrī