આર્યાસપ્તશતી · શ્લોક 389-408

પ્રિય આયાતો દૂરાદ્ ઇતિ યા પ્રીતિર્ બભૂવ ગેહિન્યાઃ ।
પથિકેભ્યઃ પૂર્વાગત ઇતિ ગર્વાત્ સાપિ શત-શિખરા

પૃષ્ઠં પ્રયચ્છ મા સ્પૃશ દૂરાદ્ અપસર્પ વિહિત-વૈમુખ્ય ।
ત્વામ્ અનુધાવતિ તરણિસ્ તદ્ અપિ ગુણાકર્ષ-તરલેયમ્

પ્રિયયા કુઙ્કુમ-પિઞ્જર-પાણિ-દ્વય-યોજનાઙ્કિતં વાસઃ ।
પ્રહિતં માં યાચ્ઞાઞ્જલિ-સહસ્ર-કરણાય શિક્ષયતિ

પ્રાચીરાન્તરિતેયં પ્રિયસ્ય વદનેઽધરં સમર્પયતિ ।
પ્રાગ્-ગિરિ-પિહિતા રાત્રિઃ સન્ધ્યા-રાગં દિનસ્યેવ

પર-પતિ-નિર્દય-કુલટાશોષિત શઠ નેષ્યતા ન કોપેન ।
દગ્ધ-મમતોપતપ્તા રોદિમિ તવ તાનવં વીક્ષ્ય

પ્રાઙ્ગણ એવ કદા માં શ્લિષ્યન્તી મન્ય્-કમ્પિ-કુચ-કલશા ।
અંસ-નિષણ્ણ-મુખી સા સ્નપયતિ બાષ્પેણ મમ પૃષ્ઠમ્

પ્રેતૈઃ પ્રશસ્ત-સત્ત્વા સાશ્રુ વૃકૈર્ વીક્ષિતા સ્ખલદ્-ગ્રાસૈઃ ।
ચુમ્બતિ મૃતસ્ય વદનં ભૂત-મુખોલ્કેક્ષિતં બાલા

પિશુનઃ ખલુ સુજનાનાં ખલમ્ એવ પુરો વિધાય જેતવ્યઃ ।
કૃત્વા જ્વરમ્ આત્મીયં જિગાય બાણં રણે વિષ્ણુઃ

પિબ મધુપ બકુલ-કલિકાં દૂરે રસનાગ્ર-માત્રમ્ આધાય ।
અધર-વિલેપ-સમાપ્યે મધુનિ મુધા વદનમ્ અર્પયસિ

પ્રાયેણૈવ હિ મલિના મલિનાનામ્ આશ્રયત્વમ્ ઉપયાન્તિ ।
કાલિન્દી-પુટ-ભેદઃ કાલિય-પુટ-ભેદનં ભવતિ

પશ્ય પ્રિય-તનુ-વિઘટન-ભયેન શશિ-મૌલિ-દેહ-સંલગ્ના ।
સુભગૈક-દૈવતમ્ ઉમા શિરસા ભાગીરથીં વહતિ

પથિક-વધૂ-જન-લોચન-નીર-નદી-માતૃક-પ્રદેશેષુ ।
ધન-મણ્ડલમ્ આખણ્ડલ-ધનુષા કુણ્ડલિતમ્ ઇવ વિધિના

પ્રતિવેશિ-મિત્ર-બન્ધુષુ દૂરાત્ કૃચ્છ્રાગતો ઽપિ ગેહિન્યા ।
અતિકેલિ-લમ્પટયા દિનમ્ એકમ્ અગોપિ ગેહ-પતિઃ

પર-પટ ઇવ રજકીભિર્ મલિનો ભુક્ત્વાપિ નિર્દયં તાભિઃ ।
અર્થ-ગ્રહણેન વિના જઘન્ય મુક્તો ઽસિ કુલટાભિઃ

ઇતિ વિભાવ્યાખ્યા-સમેતા પ-કાર-વ્રજ્યા ॥
બ-કાર-વ્રજ્યા
બહુ-યોષિતિ લાક્ષારુણ-શિરસિ વયસ્યેન દયિત ઉપહસિતે ।
તત્-કાલ-કલિત-લજ્જા પિશુનયતિ સખીષુ સૌભાગ્યમ્

બન્ધન-ભાજો ઽમુષ્યાશ્ ચિકુર-કલાપસ્ય મુક્તમાનસ્ય ।
સિન્દૂરિત-સીમન્ત-ચ્છલેન હૃદયં વિદીર્ણમ્ ઇવ

બલમ્ અપિ વસતિ મયીતિ શ્રેષ્ઠિનિ ગુરુ-ગર્વ-ગદ્ગદં વદતિ ।
તજ્-જાયયા જનાનાં મુખમ્ ઈક્ષિતમ્ આવૃત-સ્મિતયા

બલવદ્ અનિલોપનીત-સ્ફુટિત-નવામ્ભોજ-સૌરભો મધુપઃ ।
આકૃષ્યતે નલિન્યા નાસા-નિક્ષિપ્ત-બડિશ-રજ્જુર્ ઇવ

બાણં હરિર્ ઇવ કુરુતે સુજનો બહુદોષમ્ અપ્ય્ અદોષમ્ ઇવ ।
યાવદ્ દોષં જાગ્રતિ મલિમ્લુચા ઇવ પુનઃ પિશુનાઃ

બૌદ્ધસ્યેવ ક્ષણિકો યદ્યપિ બહુ-વલ્લભસ્ય તવ ભાવઃ ।
ભગ્ના ભગ્ના ભ્રૂર્ ઇવ ન તુ તસ્યા વિઘટતે મૈત્રી