આર્યાસપ્તશતી · શ્લોક 329-348

નૃત્ય-શ્રમ-ઘર્માર્દ્રં મુઞ્ચસિ કૃચ્છ્રેણ કઞ્ચુકં સુતનુ ।
મકરન્દોદક-જુષ્ટં મદન-ધનુર્-વલ્લિર્ ઇવ ચોલમ્

નાહં વદામિ સુતનુ ત્વમ્ અશીલા વા પ્રચણ્ડ-ચરિતા વા ।
પ્રેમ-સ્વભાવ-સુલભં ભયમ્ ઉદયતિ મમ તુ હૃદયસ્ય

ન નિરૂપિતો ઽસિ સખ્યા નિયતં નેત્ર-ત્રિભાગ-માત્રેણ ।
હારયતિ યેન કુસુમં વિમુખે ત્વયિ કણ્ઠ ઇવ દેવે

નખ-દશન-મુષ્ટિ-પાતૈર્ અદયૈર્ આલિઙ્ગનૈશ્ ચ સુભગસ્ય ।
અપરાધં શંસન્ત્યઃ શાન્તિં રચયન્તિ રાગિણ્યઃ

ન ગુણે ન લક્ષણેઽપિ ચ વયસિ ચ રૂપે ચ નાદરો વિહિતઃ ।
ત્વયિ સૌરભેયિ ઘણ્ટા કપિલા-પુત્રીતિ બદ્ધેયમ્

નિષ્કારણાપરાધં નિષ્કારણ-કલહ-રોષ-પરિતોષમ્ ।
સામાન્ય-મરણ-જીવન-સુખ-દુઃખં જયતિ દામ્પત્યમ્

ન પ્રાપ્યસે કરાભ્યાં હૃદયાન્ નાપૈષિ વિતનુષે બાધામ્ ।
ત્વં મમ ભગ્નાવસ્તિત-કુસુમાયુધ-વિશિખ-ફલિકેવ

નાથેતિ પરુષમ્ ઉચિતં પ્રિયેતિ દાસેત્ય્ અનુગ્રહો યત્ર ।
તદ્-દામ્પત્યમ્ ઇતો ઽન્યન્ નારી રજ્જુઃ પશુઃ પુરુષઃ

નિહિતાયામ્ અસ્યામ્ અપિ સૈવૈકા મનસિ મે સ્ફુરતિ ।
રેખાન્તરોપધાનાત્ પત્ત્રાક્ષર-રાજિર્ ઇવ દયિતા

નિધિ-નિક્ષેપ-સ્થાનસ્યોપરિ ચિહ્નાર્થમ્ ઇવ લતા નિહિતા ।
લોભયતિ તવ તનૂદરિ જઘન-તટાદ્ ઉપરિ રોમાલી

નિહિતાર્ધ-લોચનાયાસ્ ત્વં તસ્યા હરસિ હૃદય-પર્યન્તમ્ ।
ન સુભગ સમુચિતમ્ ઈદૃશમ્ અઙ્ગુલિ-દાને ભુજં ગિલસિ

નીત્વાગારં રજની-જાગરમ્ એકં ચ સાદરં દત્ત્વા ।
અચિરેણ કૈર્ ન તરુણૈર્ દુર્ગા-પત્ત્રીવ મુક્તાસિ

નક્ષત્રેઽગ્નાવ્ ઇન્દાવ્ ઉદરે કનકે મણૌ દૃશિ સમુદ્રે ।
યત્ ખલુ તેજસ્ તદ્ અખિલમ્ ઓજાયિતમ્ અબ્જ-મિત્રસ્ય

ન સવર્ણો ન ચ રૂપં ન સંસ્ક્રિયા કાપિ નૈવ સા પ્રકૃતિઃ ।
બાલા ત્વદ્-વિરહાપદિ જાતાપભ્રંશ-ભાષેવ

ન વિભૂષણે તવાસ્થા વપુર્ ગુણેનૈવ જયસિ સખિ યૂનઃ ।
અવધીરિતાસ્ત્ર-શસ્ત્રા કુસુમેષોર્ મલ્લ-વિદ્યેવ

નેત્રાકૃષ્ટો ભ્રામં ભ્રામં પ્રેયાન્ યથા યથાસ્તિ તથા ।
સખિ મન્થયતિ મનો મમ દધિ-ભાણ્ડં મન્થ-દણ્ડ ઇવ

નાના-વર્ણક-રૂપં પ્રકલ્પયન્તી મનોહરં તન્વી ।
ચિત્રકર-તૂલિકેવ ત્વાં સા પ્રતિભિત્તિ ભાવયતિ

ઇતિ વિભાવ્યાખ્યા-સમેતા ન-કાર-વ્રજ્યા ॥
પ-કાર-વ્રજ્યા
પથિકાસક્તા કિંચિન્ ન વેદ ઘન-કલમ્ અગોપિતા ગોપી ।
કેલિ-કલા-હુઙ્કારૈઃ કીરાવલિ મોઘમ્ અપસરસિ

પ્રણમતિ પશ્યતિ ચુમ્બતિ સંશ્લિષ્યતિ પુલક-મુકુલિતૈર્ અઙ્ગૈઃ ।
પ્રિય-સઙ્ગાય સ્ફુરિતાં વિયોગિની વામ-બાહુલતામ્

પ્રવિશસિ ન ચ નિર્ગન્તું જાનાસિ વ્યાકુલત્વમ્ આતનુષે ।
બાલક ચેતસિ તસ્યાશ્ ચક્ર-વ્યૂહેઽભિમન્યુર્ ઇવ