Arthashastra · Chapter 01.15

kṛta.sva.pakṣa.para.pakṣa.upagrahaḥ kārya.ārambhāṃś cintayet //

mantra.pūrvāḥ sarva.ārambhāḥ //

tad.uddeśaḥ saṃvṛtaḥ kathānām anihśrāvī pakṣibhir apy anālokyaḥ syāt /

śrūyate hi śuka.sārikābhir mantro bhinnaḥ, śvabhir apy anyaiś ca tiryag.yonibhir iti //

tasmān mantra.uddeśam anāyukto na^upagacchet //

ucchidyeta mantra.bhedī //

mantra.bhedo hi dūta.amātya.svāminām iṅgita.ākārābhyām //

iṅgitam anyathā.vṛttiḥ //

ākṛti.grahaṇam ākāraḥ //

tasya saṃvaraṇam āyukta.puruṣa.rakṣaṇam ā.kārya.kālād iti //

teṣāṃ hi pramāda.mada.supta.pralāpāḥ, kāma.ādir utsekaḥ, pracchanno^avamato vā mantraṃ bhinatti //

tasmād ādrakṣen mantram //

"mantra.bhedo hy ayoga.kṣema.karo rājñas tad.āyukta.puruṣāṇāṃ ca //

tasmād guhyam eko mantrayeta" iti bhāradvājaḥ //

"mantriṇām api hi mantriṇo bhavanti, teṣām apy anye //

sā^eṣā mantri.paramparā mantraṃ bhinatti //
KAZ01.15.17ab/ "tasmān na^asya pare vidyuḥ karma kiṃcic cikīrṣitam /
KAZ01.15.17cd/ ārabdhāras tu jānīyur ārabdhaṃ kṛtam eva vā //

"na^ekasya mantra.siddhir asti" iti viśāla.akṣaḥ //

"pratyakṣa.parokṣa.anumeyā hi rāja.vṛttiḥ //

anupalabdhasya jñānam upalabdhasya niścita.bala.ādhānam artha.dvaidhasya saṃśayac.chedanam eka.deśa.dṛṣṭasya śeṣa.upalabdhir iti mantri.sādhyam etat //

tasmād buddhi.vṛddhaiḥ sārdham adhyāsīta mantram //
KAZ01.15.22ab/ "na kaṃcid avamanyeta sarvasya śṛṇuyān matam /
KAZ01.15.22cd/ bālasya^apy arthavad.vākyam upayuñjīta paṇḍitaḥ //"

"etan mantra.jñānam, na^etan mantra.rakṣaṇam" iti pārāśarāḥ //

"yad asya kāryam abhipretaṃ tat.pratirūpakaṃ mantriṇaḥ pṛcchet - "kāryam idam evam āsīt, evaṃ vā yadi bhavet, tat kathaṃ kartavyam" iti //

te yathā brūyus tat kuryāt //

evaṃ mantra.upalabdhiḥ saṃvṛtiś ca bhavati" iti //

na^iti piśunaḥ //

"mantriṇo hi vyavahitam arthaṃ vṛttam avṛttaṃ vā pṛṣṭā anādareṇa bruvanti prakāśayanti vā //

sa doṣaḥ //

tasmāt karmasu ye yeṣv abhipretās taiḥ saha mantrayeta //

tair mantrayamāṇo hi mantra.siddhiṃ guptiṃ ca labhate" iti //

na^iti kauṭilyaḥ //

anavasthā hy eṣā //

mantribhis tribhiś caturbhir vā saha mantrayeta //

mantrayamāṇo hy ekena^artha.kṛcchreṣu niścayaṃ na^adhigacchet //

ekaś ca mantrī yathā.iṣṭam anavagrahaś carati //

dvābhyāṃ mantrayamāṇo dvābhyāṃ saṃhatābhyām avagṛhyate, vigṛhītābhyāṃ vināśyate //

tat triṣu catuṣu vā kṛcchreṇa^upapadyate //

mahā.doṣam upapannaṃ tu bhavati //

tataḥ pareṣu kṛcchreṇa^artha.niścayo gamyate, mantro vā rakṣyate //

deśa.kāla.kārya.vaśena tv ekena saha dvābhyām eko vā yathā.sāmarthyaṃ mantrayeta //(alterṇative views approved)

karmaṇām ārambha.upāyaḥ puruṣa.dravya.sampad deśa.kāla.vibhāgo vinipāta.pratīkāraḥ kārya.siddhir iti pañca.aṅgo mantraḥ //

tān ekaikaśaḥ pṛcchet samastāṃś ca //

hetubhiś ca^eṣāṃ mati.pravivekān vidyāt //

avāpta.arthaḥ kālaṃ na^atikrāmayet //

na dīrgha.kālaṃ mantrayeta, na teṣāṃ pakṣīyair yeṣām apakuryāt //

"mantri.pariṣadaṃ dvādaśa.amātyān kurvīta" iti mānavāḥ //

"ṣoḍaśa" iti bārhaspatyāḥ //

"viṃśatim" ity auśanasāḥ //

yathā.sāmarthyam iti kauṭilyaḥ //

te hy asya sva.pakṣaṃ para.pakṣaṃ ca cintayeyuḥ //

akṛta.ārambham ārabdha.anuṣṭhānam anuṣṭhita.viśeṣaṃ niyoga.sampadaṃ ca karmaṇāṃ kuryuḥ //

āsannaiḥ saha karmāṇi paśyet //

anāsannaiḥ saha pattra.sampreṣaṇena mantrayeta //

indrasya hi mantri.pariṣad.ṛṣīṇāṃ sahasram //

sa tac cakṣuḥ //

tasmād imaṃ dvy.akṣaṃ sahasra.akṣam āhuḥ //

ātyayike kārye mantriṇo mantri.pariṣadaṃ ca^āhūya brūyāt //

tatra yad.bhūyiṣṭhā brūyuḥ kārya.siddhi.karaṃ vā tat kuryāt //

kurvataś ca --
KAZ01.15.60ab/ na^asya guhyaṃ pare vidyuś chidraṃ vidyāt parasya ca /
KAZ01.15.60cd/ gūhet kūrma^iva^aṅgāni yat syād vivṛtam ātmanaḥ //
KAZ01.15.61ab/ yathā hy aśrotriyaḥ śrāddhaṃ na satāṃ bhoktum arhati /
KAZ01.15.61cd/ evam aśruta.śāstra.artho na mantraṃ śrotum arhati //E
(ṛules for the envoy)