Aniruddha Samhita · Chapter 9

atha navāmo'dhyāyaḥ
śrībhagavān---
abhiṣekamatho vakṣye ācāryāṇāṃ viśeṣataḥ/
kṣatriyāṇāṃ viśeṣeṇa sādhakānāṃ viśeṣataḥ

viṣṇvālaye viśeṣeṇa maṇḍapaṃ kārayedbudhaḥ/
maṇḍapaṃ samalaṃkṛtya toraṇādyairalaṃkṛtam

vitānādyairalaṃkṛtya darbhamālyaiśca śobhayet/
aṅkurānarpayitvā tu pūrvedyuḥ karmavāsare

saptame pañcame vāpi tṛtīye'hani vā bhavet/
pūrve dvārānvite paścāt sadyo vā sakalaṃ caret

kautukaṃ bandhayeddhīmān pūrvedyuśca niśāmukhe/
catuḥ sthānārcanaṃ vipra kārayedvidhicoditam

abhiṣekavidhiṃ brahman iṣṭasiddhipradaṃ yajet/
cakrābjamaṇḍalaṃ vāpi kārayecchāstravittamaḥ

kumbhādhivāsanaṃ rātrau śayane sannivāsayet/
pañjarasthasya devasya paścime śayanaṃ caret

pañcabhārapramāṇena dhānyena paripūjayet/
tadardhaṃtaṇḍulañcaiva tadardhaṃ tilameva ca

navavastre vinikṣipya vyāghracarma tathopari/
tadūrdhve kaṃbalaṃ nyasya pīṭhasyopari sādhakaḥ

tadūrdhve'ṅgulikāṃ nyasya citravastraṃ tathaiva ca/
pañcopadhānasaṃyuktaṃ pracchādanapaṭaṃ tathā

mṛdvāstaraṇasaṃyuktaṃ śayanaṃ parikalpayet/
kṣīrodārṇavasaṃsthitaṃ anantaṃ paripūjayet

kumbhamaṇḍalavahnau tu pūjanaṃ pūrvavaccaret/
baliṃ ca sarvato dadyāt purāṇaṃ śrāvayetsudhīḥ

prabhātakāle cotthāya snānaṃ pūrvavadācaret/
dvārādīni samabhyarcya kumbhādīn paripūjayet

kumbhānuddhṛtya tān sarvān dvādaśān caturo'pi vā/
catuṣkummaṃ tu tanmadhye aṣṭadikṣvaṣṭakaṃ nyaset

vrīhikopari saṃsthāpya sūtravastrādiveṣṭitam/
śarāvaṃ kūrcasaṃyuktaṃ śuddhadravyasamanvitam

pūrve puṣpaṃ pradadyāttu āgneye patrasañcayam/
yāmye phalodakañcaiva naiṛte pañcagavyakam

vāruṇe tīrthatoyañca vāyavye gandhatoyakam/
saumye cākṣatatoyaṃ tu īśānye bhūtisaṃjñakam

madhye catuṣṭaye vipra āgneye ratnatoyakam/
naiṛte lohatoyaṃ ca vāyavye vrīhitoyakam

īśānye sarvavastūni kramād‌dravyaṃ niveśayet/
utpalatritayañcaiva ketakīdvitayaṃ tathā

śatapatraṃ jātiyugmaṃ nandyāvartadvayaṃ tathā/
etāni daśa puṣpāṇi nikṣipet kumbhamadhyataḥ

?puṣpālābhe tu jātisyātpatrapūramathocyate/
tulasīdvitayañcaiva damanidvitayaṃ tathā

saṭābhadrā ca dūrvā ca sahadevī tathaiva ca/
bilvapatrañca ityete nikṣipet pāvakodake

patrāṇāmapyabhāve tu tulasīdalamuttamam/
kadalī panasañcāmraṃ bilvamāmalakaṃ tathā

nālikerañca havyañca likucaṃ dāḍimaṃ bhavet/
etāni nikṣipedyāmye phalābhāve tu dāḍimam

gomūtraṃ gomayaṃ kṣīraṃ dadhisarpiśca pañcamam/
gavyānāmapyalābhe tu ghṛtamekaṃ praśasyate

nādeyaṃ nairjharaṃ hrādaṃ sāmudraṃ pauṣkaraṃ tathā/
haimañca vārṣikañcaiva karpūrāgarukaṃ tathā

elālavaṅgatakkolavacākarpūrameva ca/
etāni gandhatoye tu nikṣipettantrapāragaḥ

elādīnāmalābhetu karpūraṃ saṃpracakṣate/
vrīhitaṇḍulakañcaiva priyaṅguṃ kambusaṃjñakam

kalamāṃ raktaśāliñca veṇuṃ caiva yavaṃ tathā/
akṣatānāmabhāve tu kalamāparicakṣate

tretāgnibhūtikaṃ caiva nityahomāgnibhūtikam/
yāgāgnibhūtikaṃ caiva utsavāgni vibhūtikam

bhūtīnāmapyalābhe tu nityakuṇjavibhūtikam/
maṇiṃ marakatañcaiva vaiḍūryaṃ puṣparāgakam

gomedhañcendranīlañca vajraṃ mauktikameva ca/
pravālaṃ sphaṭīkañcaiva puṣpagaṃ brahmarāgakam

ratnānāmapyalābhe tu mauktamekaṃ praśasyate/
suvarṇaṃ rajataṃ tāmramāyasaṃ trapukaṃ tathā

rajīndra? mārakūṭañca lohānyetāni nikṣipet/
śāliṃ vrīhiṃ tathācaiva ṣaṣṭikaṃ yavaveṇukam

godhūmatilamudgaṃ ca śimbamāṣakulatthakam/
etāni mārute kumbhe nikṣipenmunisattama

īśāne sarvavastūni nikṣipettantrapāragaḥ/
yantranyāsakrameṇaiva uddhārakrama iṣyate

keśavādyaiśca mantraiśca sthāpayedvidhipūrvakam/
snānaṃ puruṣasūktena viṣṇusūktena vā bhavet

antarāntarayogena snānānāṃ ca mahāmate/
ardhyaṃ gandhaṃ ca puṣpaṃ ca dhūpaṃ caiva nivedayet

āsane tu samāropya abhiṣekaṃ samācaret/
śuddhasnānaṃ tataḥ kṛtvā nīrājanamathācaret

alaṃkṛtya yathā nyāyaṃ yāgabhūmiṃ samāviśet/
āsane sanniveśyātha paṭṭabandhamathācaret

bhaṭṭamācāryabhūyañca tadagreṇa jagadgurum/
ācāryaṃ dṛṣṭamātreṇa devavatpratibhāvayet

āsanaṃ pādukecaiva chatraṃ cāmarameva ca/
vāhanaṃ ketudaṇḍañca cihnaṃ kāhalameva ca

śaṅkhabherīnirādañca dvārapālañca bhūṣaṇam/
kāṃsyatālaṃ ca cihnaṃ ca pradadyādviṣṇusannidhau

kālacihnaṃ kalaṃcaiva pradadyāt viṣṇusannidhau/
rājā cātra viśeṣeṇa abhiṣekaṃ samācaret

aṣṭottaraśate niṣke abhiṣekaṃ prakalpayet/
navaratnasamāyuktaṃ trapukāñcanaṃ saṃyutam

iti pūrvakriyāsarvaṃ dvijavatsarvamācaret/
muhūrte śobhane prāpte abhiṣekaṃ samācaret

brāhmaṇaḥ kṣatriyaścaiva vaiśyaśūdraivamādikaiḥ?/
nṛttagītasamāyuktaṃ jayaśabdasamanvitam

vedaghoṣasamāyuktaṃ śaṅkhanādasamanvitam/
abhiṣekaṃ tataḥ kṛtvā dadyādacajamanaṃ tathā

netrabandhaṃ tataḥ kṛtvā āyudhāni ca saṃspṛśet/
udasthānāni bhāṇḍāni maṅgalāni ca darśayet

rājacihnāni sarvāṇi uttamāsanapūrvakam/
praṇameddaṇḍavadbhūmau janaissarvairatandritaḥ

vaiśyaścettu viśeṣeṇa abhiṣekādikaṃ vinā/
pālaśabdaṃ vadedvipra śūdraścet dāsyakaṃ vadet

brāhmaṇaḥ sarvavarṇānāṃ rājā rāṣṭrasya kāraṇam//
iti śrīpāñcarātre mahopaniṣadi aniruddhasaṃhitāyāṃ
abhiṣekavidhairnāma navamo'dhyāyaḥ
-----------***************-----------------