Aniruddha Samhita · Chapter 8

atha aṣṭamo'dhyāyaḥ
bhagavān--
kuṇ‍ḍānāṃ lakṣaṇaṃ vakṣye śṛṇu guhyaṃ mahāmune/
vṛttātsaṃjāyate sarvaṃ vṛttaṃ madhyātprajāyate

maṇḍalasyeśakoṇe tu kumbhavediṃ prakalpayet/
tasya pāvakadigbhāge kuṇḍavediṃ prakalpayet

daṇḍake tu viśeṣeṇa kumbhavediṃ tu pūrvake/
maṇḍalaṃ madhyame bhāge paścime kumbhasaṃjñakam

saumyālābhe tadā vipra dakṣiṇādi prakalpayet/
bimbaṃtu paścime bhāge sarvatraiva niveśayet

dakṣiṇāyāntake vipra uttare bimbasaṃsthitaṃ
yoninābhisamāyuktamabjamekhalakai ryutam

ṣaṇṇavatyaṅgulaṃ mānaṃ sarvakuṇḍamakaṇṭakam/
aśraṃ cāpaṃ tathā vṛttaṃ śaṅkhaṃ cakraṃ ca paṅkajam

tryaśraṃ pañcāśramuditaṃ ṣaḍaśraṃ saptakoṇakam/
aṣṭāśraṃ ca navāśraṃ ca gadā yonimataḥ param

evaṃ caturdaśaṃ kuṇḍaṃ tantre'smin parameṣṭhinā/
kuṇḍamaṇḍalavedyārthamānaṃ muṣṭhyaṅgulaṃ bhavet

trimuṣṭimātraṃ tālaṃ vā tadvayaṃ hastamiṣyate/
tadvayaṃ daṇḍamityuktaṃ tadvayaṃ dhanurucyate

yuga gocarmakañcaiva tanmānaṃ saṃprakīrtitam/
caturaśrasya vṛttasya mānaṃ madhyena jāyate

tālamānena sūtreṇa bhrāmayenmadhyasūtrataḥ/
tadvṛttaparidheḥ pārśve sūtramāsphalāyecca tat

catuḥ śūtraprayogeṇa caturaśraṃ prajāyate/
ardhamānena sūtreṇa madhyakaṇṭhena pātayet

caturdik‌kramayogena caturaśraṃ prajāyate/
caturaśravaśenaiva yadvā vṛttabaśena tu

anyāni sarvakuṇḍāni tanmānena tu kārayet/
caturaśraṃ kharedbhūbhau hastamānapramāṇataḥ

tālamānamathaivāpi dvyaṅgulaṃ nābhimānakam/
tadbahistālamānena mekhalātritayaṃ bhavet

caturaṅgulavistāramunnataṃ tāvadeva tu/
yoniṃ prakalpayedūrdhve paścime kuṇḍamadhyame

caratuśravaśenaiva yadvā vṛttavaśena tu/
daśāṅgulapramāṇena āyataṃ parikīrtitam

vistāraṃtu viśeṣeṇa daśabhiḥ khaṇḍacandrakam/
pṛṣṭhapārśve likhedvipra ṣaṭ‌caturdvaṅgulairyutam

aśvatthapatravatkuryāt tannālaṃ caturaṅgulam/
triyaṅgulaṃ tu nahanaṃ mukhe caiva ṣaḍaṅgulam

madhyamekhalamānaṃ syāt suṣiraṃ paridherdvija/
kuṇḍamadhye likhet padmamaṣṭapatraṃ sakarṇikam

mekhalasyordhvakoṇeṣu cakra śaṅkhādikān likhet/
aṅgulonnatamānena mṛdbhireva prakalpayet

mṛdā saṃlepayetpaścāt gomayena vicakṣaṇaḥ/
sudhācūrṇairalaṃkṛtya tālamānena pīṭhakam

caturaśramidaṃ proktaṃ cāpakuṇḍamathocyate/
pūrvavṛttapramāṇena tadardhaṃ deśikottamaḥ

tanmānaṃ bhrāmayeccāpaṃ sajyaṃ tadvayamānakam/
yādṛgvidhaṃ bhavet kuṇḍaṃ tādṛgeva tu mekhalā

yoniṃ kuṇḍeṣu sarveṣu kalpayecca dvijottama/
yonikuṇḍena yoniḥ syāt padmakuṇḍena paṅkajam

cāpaṃ ṣaḍaṅgulaṃ proktaṃ sajyaṃ ṣaṭ‌triṃśakaṃ mune/
yadvāṅgulavaśenaiva sarvakuṇḍaṃ prakalpayet

caturviṃśātyaṅgulaṃcāgraṃ cāpaṃ ṣaṣṭyaṅgulaṃ bhavet/
sajyaṃ ṣaṭ‌triṃśakaṃ proktaṃ vṛttārdhaṃ ṣoḍaśāṅgulam

padmakuṇḍaṃ tadeva syāt cakrakuṇḍaṃ tathaiva ca/
tryaśrakuṇḍaṃ viśeṣeṇa dvātriṃśadaṅgulaṃ mune

dvātriṃśadaṅgulaṃ mānaṃ paṭṭhāyāmaṃ prakīrtitam/
dakṣiṇottarapārśve tu sūtramāsphālayecca tat

yonikuṇḍamatho vakṣye caturaśra prajāyate/
daśāṅgulapramāṇena vāyunaiṛtakoṇayoḥ

koṇāgre sthāpayetsūtraṃ bhrāmayedardhacandrakam/
ardhacandraśaśiśṛṅgāt pūrvamadhyācca pātayet

dakṣiṇottarapārśve tu agramaśvatthapatravat/
yonivat saṃniveśassyānna yoniṃ parikalpayet

abjakuṇḍamatho vakṣye pūrbavadvṛttamālikhet/
ūrdhvamekhalayāmadhyamardhāñcāpyathamekhalāṃ/?

evamaṣṭāṅgulenaiva padmapatraṃ prakalpayet/
krameṇa praṇavaṃ kuryāt balipīṭhābjapatravat

aṣṭapatramatho vāpi dvādaśaṃ vāpi kārayet/
śaṅkhakuṇḍamatho vakṣye pūrvapaścimadīrghakam

pūrvavadvṛttamālikhya dvādaśāṅgulamānataḥ/
tadvṛttaparidheḥ pūrvaṃ ardhacandraṃ samālikhet

caturaṅgulamānena bhrūpadmaṃ samālikhet/
atha paścimabhāge tu śaṅkhasyāgraṃ prakalpayet

agraṃ tu yonivatkuryāt tat ṣaष़ḍaṅgulamānataḥ/
uttare mekhalāpārśve kiñcinnābhi prakalpayet

mekhalābitayaṃ kuryāt tadvadeva ca dakṣiṇam/
caturdikṣu viśeṣeṇa jvālāṃ kāñcitprakalpayet

cakrakuṇḍamatho vakṣye vṛttaṃ pūrvavadālikhet/
nīcordhvamekhalāṃ samyak dvaṅgulena prakalpayet

aṣṭāṅgulena tanmadhye arakṣetraṃ prakalpayet/
dvādaśāṣṭādaśaṃ vāpi dvijāṇḍasadṛśaṃ bhavet

akṣaṃtu kuṇ‍ḍamadhyaṃ syānnābhirnemirdvimekhalā/
caturjvālāṃ prakalpyaiva śikhāvanmunisattama

pañcāśrakamatho vakṣye avadhāraya sāṃpratam/
vṛttaṃ tu pūrbavatkṛtvā pañcadhā parirañjayet

karṇasūtraṃ bahiḥ kṛtvā vahnervahnerviśeṣataḥ/
paṭṭasūtraṃ bahiḥ kuryāt sūtrairaṣṭādaśardhakaiḥ

paṭṭasūtrasya madhyaṃ syāt kiṃcit prahvaṃ samācaret/
tadvaśānmekhalāṃ kuryāt ṣaष़ḍaśramadhunocyate

vṛttañca pūrvavatkuryāt triḥ pañcāṅgulamānataḥ/
triḥ pañcāṅgulamānena sūtrasyopari kalpayet

vṛtantu pūrvavatkuryādardhamānena cāṅkayet/
ṣaṭ‌cihnaṃ jāyate vipra ṣaṭ‌sūtraṃ paṭṭayedbahiḥ

paṭṭāyāmaṃ tataḥ kṛtvā cihnasūtraṃ bahiḥ kṣipet/
tadvacca mekhalāṃ kuryāt saptāśrañcāvadhāraya

saptadhā cāṅkayet‌vṛttaṃ koṇasūtraṃ bahiḥ kṣipet/
koṇātkoṇāntaraṃ kuryāt paṭṭāyāmaṃ prakīrtitam

aṣṭakoṇavidhistadvat navakoṇavidhistathā/
gadākāramatho vakṣye pūrvapaścimadīrghakam

pūrvavadvṛttasaṃyuktaṃ dvyaṅgulaṃ tu vihīnakam/
bhūtāt bhūte tu kartavyaṃ ṣaṭ‌caturdvyaṅgulaikakam

tatkuṇḍapaścime bhāge aṣṭāṅgulasamāyutam/
kiñcitpraṇavasaṃyuktaṃ daṇḍākāraṃ viśeṣataḥ

evaṃ caturdaśaṃ kuṇḍaṃ tantre'smin munipuṅgava/
utsave tu navāśraṃ syādaṣṭāsraṃ vāpi kārayet

caturaśramathaivāpi ekāśraṃ vāpi kārayet/
pavitrārohaṇe vipra aṣṭakuṇḍaṃ prakalpayet

catuṣkuṇḍamathaivāpi ekakuṇḍaṃ tu kalpayet/
pratiṣṭhāyāṃ viśeṣeṇa tathaiva parikalpayet

patrapuṣpotsave caiva tathāntakalaśe dvija/
kuṇḍakarmavidhiḥ proktaḥ kumbhasaṃsthāpanaṃ śṛmu

khāridvayena saṃpūrṇaṃ mahākumbhaṃ prakīrtitam/
tadardhamupakumbhaṃ ca parikumbhaṃ tadardhakam

tanmānaṃ vardhanīcaiva vastreṇa pariveṣṭayet/
aṅgulāntarakaṃ vāpi akṣamātrā tu vā bhavet

vrīhikoparisaṃsthāpya sauvarṇaṃ rājataṃ tu vā/
tāmraṃ vā mṛṇmayaṃ vāpi yathā vittānusārataḥ

vastre saṃveṣṭayetpaścāt śarāvairapidhāya ca/
stambakairnālikeraiśca kramukaiḥ phalavṛttakaiḥ

phalairnānāvidhaiścaiva nārikelaphalairapi/
ratnahemasamāyuktamaṣṭamaṅgulasaṃyutam

pālikaiśca samāyuktaṃ dīpakumbhasaṃmanvitam/
svarṇapaṭṭasamāyuktaṃ kṣaumavastrasamāyutam

kumbhamaṇḍalakuṇḍeṣu parikumbhaṃ tu vinyaset/
dhvajaiścatoraṇairyuktaṃ dvārakumbhopaśobhitam

evaṃ dīkṣāvidhāne tu pratiṣṭhādyutsaveṣu ca/
anyathā doṣamāpnoti nātra kāryā vicāraṇā

iti śrīpāñcarātre mahopaniṣadi aniruddhasaṃhitāyāṃ
kuṇḍavidhirnāma aṣṭamo'dhyāyaḥ/
----------------**************-------------