Aniruddha Samhita · Chapter 6

atha ṣaṣṭho'dhyāyaḥ
śrībhagavān--
maṇḍalānāṃ vidhiṃ vakṣye samāsādavadhāraya/
caturaśrīkṛtaṃ kṣetraṃ triṃśadhā vibhajecca tat

aṃśakānāṃ bhavedatra navānāṃ śatakaṃbhavet/
tanmadhye daśapaṅktyātu padmakṣetraṃ prajāyate

kṣetradvādaśabhāgaikaṃ vyavadhānaṃ prakalpayet/
vyavadhānaṃ tridhā kṛtvā vyomavṛttaṃ tathābhavet

caturdhā vibhajet śeṣaṃ prathamaṃ karṇikāpadam/
dvitīyaṃ kesaraṃ proktaṃ tṛtīyañca caturthakam

caturthaikāṃśamānena dalāgraṃ saṃprakalpayet/
śiṣṭenāṃśagaṇenaiva patramekaṃ prakalpayet

patrāntarālakaṃ sarvaṃ kaniṣṭhāṅgulimānakam/
patramadhye trirekhāñca pañcarekhāṃ tathaiva ca

yavamātronnataṃ kuryāt patramūlaṃ tadānayet/
patrāgraṃ pṛthutāṃ yāti athavā kesarāṃśakam

karṇikāgrāṃśamānaṃ vā icchayā parikalpayet/
yantrakoccaṃ patramānaṃ kesaraṃ patrakāṃśakam

evaṃtu paṅkajaṃ kṛtvā vyomavṛttaṃ bahirbhramet/
vyomavṛttādbahirbṛttaṃ caturaśraṃ prakalpayet

śeṣaṃ paṅktipadenaiva pīṭhādi pariśodhayet/
evaṃ paṅktyā bhavetpīṭhaṃ caturdikṣu dvikaṃ vrajet

vidikṣucaiva tripadaṃ dvipadaṃ tvantarannayet/
upapīṭhaṃ catuḥ paṅktyā kalpayetpīṭhamuttamam

madhye dvādaśakenaiva gātrakaṃ parikalpayet/
tatpūrvāparavṛttibhyāṃ dvitayaṃ dvitayaṃ bhavet

madhyapaṅktidvayenaiva aṣṭakaṃ parimārjayet/
ekīkṛtya tatassarvānaṣṭakaṃ tasya pārśvayoḥ

trīṇi trīṇi tathādyante madhye paṅktidvaye dvayam/
tatpadecāṣṭakaṃ mṛjya madhyecaiva trayaṃtrayam

evamādyantapaṅktibhyā mekīkṛtya parāmṛjet/
padmakṣetrasya bāhye tu pañcakaṃ parimārjayet

śeṣaṃtuṃ koṣṭhakaṃ proktaṃ dvipadenaiva vīthīkām/
gātrakākhyapradeśetu śaṅkhādīn parikalpayet

śaṅkhaṃ cakraṃ gadāṃ padmaṃ dik‌krameṇa samālikhet/
musalaṃ nandakañcaiva śārṅgaṃ ca vanamālikām

āgneyādīśakoṇāntaṃ vinyasetparitaḥ kramāt/
śiṣṭaṃ paṅktikrameṇaiva dvārādi parikalpayet

dvicatuṣkakrameṇaiva dvāraṃtu pariśodhayet/
śobhaṃ navapadenaiva upadvāraṃtu dvāravat

ṣaṭ‌padaiḥ sūkṣmaśobhañca śiṣṭakoṇakam?/
bahiḥ paṅ‌ktyaṃśamānena rekhātrayamathācaret

upadvāre viśeṣeṇa maṅgalāṣṭakamālikhet/
rajasā pūrayetpaścāt śuddhena vividhena ca

karṇikāṃ kanakābhena kesaraṃ śoṇitaprabham/
dalajālaṃ sitaṃ proktaṃ kṛṣṇaṃ caivāntaraṃ param

vyomavṛttaṃ tathā kuryāt bāhyaṃ cāruṇaprabham/
pīṭhakoṇaṃ sitaṃ kuryāt gātraṃ śyāmanibhaṃ bhavet

gātrakoṇāntaraṃ raktaṃ bahirgātraṃ tu śoṇitam/
sitaṃ kṛṣṇaṃ ca pītaṃ ca kramāccheṣatrayaṃ bhavet

śaṅkhādīn śuklavarṇena vilikhettasya madhyame/
vīthīṃ marakatābhena dvāraṃ śuklena pūrayet

pītaṃ raktaṃ ca kṛṣṇaṃ ca śyāmaṃ śobhādikān kramāt/
sitaṃ raktaṃ tathā kṛṣṇaṃ rekhātrayamanuttamam

śrībhagavān--
iṣṭasiddhipradaṃnāma maṇḍalañcāvadhāraya
iṣṭasiddhyarcanāccaiva iṣṭasiddhimavāpnuyāt

caturaśraṃ purā kṛtvā bāhuhastapramāṇataḥ
catvāriṃśatpadaṃ kṛtvā kṣetramadhyaṃ viśeṣataḥ

aṃśakānāṃ bhavedyatra sahasraṃ ṣaṭ‌śatādhikam/
iṣṭasiddhyarcanāccaiva sahasraṃ ṣaṭ‌śatādhikam

madhye daśapadaṃ vipra paṅkajaṃ pūrvavallikhet/
pīṭhaṃtu pūrvavatkṛtvā bahiḥ paṃktyā tu vīdhikāṃ

tadbahiḥ pañca paṃktyā tu gātrāgāraṃ tu śodhayet/
madhyapaṃktitrayeṇaiva madhye koṇāṣṭakaṃ sṛjet

pūrvāpare caturthaṃ syāt madhye caiva catuṣpadam/
evamaṣṭakasaṃyuktamekīkṛtya vilepayet

aṣṭādaśapadenaiva prādakṣiṇyaṃ parāmṛjet/
koṇamadhyapradeśe tu pañcakoṣṭaṃ parāmṛjet

bahiṣpoḍaśakoṣṭhena prādakṣiṇyena lepayet/
śeṣakoṣṭhagaṇaṃ sarvamekīkṛtya vilepayet

ekapaṃktyā bhavedvīthī śiṣṭapaṃkti kramaṃ śṛṇu/
paṃktitrayeṇa viprendra antardvārādikān mṛjet

pūrvapaṃktidvyenaiva nayet śobhopaśobhitam/
sūkṣmaśobhakañca catuḥ koṇapārśve parāmṛjet

koṇasārdhadvitīye tu ekameva padaṃ mṛjet/
ekapaṃktyā bhavedvīthī prādakṣiṇyena śodhayet

tadvahiḥ padapaṃktyā tu vīdhikāṃ parikalpayet/
śiṣṭaṃ paṃktitrayeṇaiva pūrvavat dvāravīthikāṃ

dvāraśobha mupadvāra mupaśobhaṃ ca sūkṣmakam/
pūrvavatkalpayitvā tu koṇadeśetu pūrvavat

śiṣṭapaṅktyā bahirvīthīṃ pūrvavatparito mṛjet/
bahīrekhātrayaṃ kuryāt pañcakaṃ vāpi kevalam

evaṃkṛtvā vidhānena rajaḥ pātravidhiṃ śṛṇu/
sapīṭhapaṅkajaṃ vipra pūrvavatpariyojayet

vīdhikāṃ ṣaṭ‌padābhena gātramadhyaṃ tu pītalam/
bahiḥ pradakṣiṇaṃ śyāsaṃ koṇabhūmiṃ tathaiva ca

koṇagātrāntarālaṃ tu raktavarṇena pūrayet/
bahirvīthīṃ sitenaiva antarvīthīṃ tu śyāmalām

sitādivarṇabhedena kramātkuryāccatuṣṭayam/
koṇāntastha padadvadvaṃ raktaṃ kṛṣṇa sitaṃ kramāt

bahirvīthīṃ tu pītena tadvāhyaṃ raktameva ca/
sitādipañcavarṇena pañcakaṃ paripūrayet

tathā koṇadvayaṃ vipra sitaṃ śyāmaṃ prakīrtitam/
rekhātrayaṃ tathā kuryāt pañcakaṃ pañcavarṇakam

devatānāmatho vakṣya sthānaṃ tu munipuṅgava/
karṇikāgre tu saṃpūjya aṅgopāṅgaṃ ca patrake

guṇatrayaṃ kesareṣu maṇḍalaṃ tu trayaṃ tathā/
pīṭhadikṣvaṣṭake vipra dikpatīn paripūjayet

gātramadhye biśeṣeṇa śaṅkhādīn paripūjayet/
antarāle ṛgādīṃśca vedādīn koṇamadhyame

vithikāsu ca sarvāsu anantādīn prapūjayet/
ananto vāsukiścaiva śaṅkhapālastathaiva ca

urdhvadvārādike sarve ādityādīn prapūjayet/
tvaṣṭā viṣṇuśca pūṣā ca garuḍaśca tathaiva ca

koṇeṣu vaighnaṃ saṃpūjya kumudādīn tathāntare/
bahirdvāreṣu viprendra satyādīn paripūjayet

satyaḥ suparṇastārkṣyaśca garuḍaśca tathaiva ca/
śobhopaśobhadvāreṣu padmacakragadādikān

koṇeṣvapi ca sarveṣu agnyādi paripūjayet/
agniśca pāvakāścaiva citrabhānurvibhāvasuḥ

rekhātrayeṣu viprendra sudarśanādipūjitam/
paristareṣu darbheṣu caṇ‍ḍādīn paripūjayet

bhṛguḥ--
maṇḍalārcanakālaṃ kiṃ vadasva vadatāṃ vara/
śrībhagavān--
dīkṣāyāmutsave caiva snapane ca phalotsave

damanāropaṇe caiva tathā puṣpamahotsave//
pavitrotsave viśeṣe jayantyāṃ ca tathaiva ca/
kṛttikotsavakāle tu grahaṇe somasūryayoḥ

viṣuve cāyane caiva dvādaśyāṃ tu viśeṣataḥ/
prāyaścitteṣu sarveṣu vasantotsava eva ca

maṇḍalārādhanaṃ kuryādanyathā doṣakṛdbhavet/
maṇḍalārādhanaṃ śreṣṭhaṃ jaghanyaṃ bimbapūjanam

kumbhamaṇḍalabimbāgnau pūjanaṃ cottamaṃ bhavet/
uttamārādhanenaiva sarvadoṣakṣayaṃ gatam

sarvapāpaharaṃ puṃsāṃ rājarāṣṭravivardhanam/
catuḥ sthānārcanāhīnaṃ karma niṣphalatāṃ nayet

tasmātsarvaprayatnena catuḥ sthānārcanaṃ yajet/
catuḥ sthānamuttamaṃ ca tristhānaṃ madhyamaṃ bhavet

dvisthānamadhamaṃ caiva ekamābhāsakaṃ param/
ekaṃ tu bimbakaṃ proktaṃ dvisthānaṃ bimbapāvakam

tristhānaṃ kumbhasaṃyuktaṃ catuḥ sthānaṃ tu maṇḍalam/
kumbhamaṇḍalavahnisthaṃ paścimābhimukhaṃ yajet

devaṃ nārāyaṇaṃ vipra anyathādoṣakṛdbhavet/
tatrasthā devatāḥ sarvāḥ paścimābhimukhaṃ yajet

varuṇādiniṛtyantaṃ pūjayet sarvadevatān/
devatānvitā vipra dvārsthadevānvinā bhavet

iti śrīpāñcarātraṃ mahopaniṣadi aniruddhasaṃhitāyāṃ
yantravidhānaṃ nāma ṣaṣṭho'dhyāyaḥ
--------------**************---------------