Aniruddha Samhita · Chapter 32

atha dvātriṃśo'dhyāyaḥ
śrībhagavān--
balipīṭhapratiṣṭhā ca vakṣyate'dya mahāmune/
prāsādaṃ garbhagehaṃ ca pratimāpīṭhameva ca

śarīrameva devasya sthitameva catuṣṭayam/
dvārāvaraṇadevānāṃ balipīṭhāntameva hi

śilālohādibhiḥ klṛptaiḥ chāyāmūrtiḥ pratiṣṭhitā/
tattanmantreṇa mantrajñaḥ pratiṣṭhāyāṃ viśeṣataḥ

devasyāṅgānurūpasya parivāragaṇasya ca/
śayanāsanayānāni sthānādīni viśeṣataḥ

sarvasāmānyasaṃyuktaṃ pratiṣṭhāyāṃ vidhīyate/
prāsādeṣvanurūpeṇa agrataśca vibhostathā

yathāvakāśaṃ vāme vā dakṣiṇe vātha paścime/
maṇḍapaṃ kalpayitvā tu ṣoḍaśastaṃbhasaṃyutam

caturdvārasamāyuktaṃ catustoraṇabhūṣitam/
dvārakumbhopasaṃyuktaṃ darbhamālāpariṣkṛtam

madhye navapadaṃ vedi mekahastocchritānanam/
paritaśca caturdikṣu catuṣkuṇḍaṃ prakalpayet

aśraṃ cāpaṃ tathā vṛttaṃ padmaṃ pūrvāditaḥ kramāt/
ekakuṇḍamatho vāpi caturaśraṃ tu pūrvake

maṇḍapaṃ kārayitvā tu pratiṣṭhoktavidhānataḥ/
pratiṣṭhādivasātpūrvaṃ aṅkurārpaṇa mācaret

tṛtīye'hani vā kuryāt karmārambhadinaṃ prati/
sadyaścettaṇḍulaiḥ puṣpaiḥ bījairvā sāṃkurai stathā

pratiṣṭhādivasātpūrvaṃ jalavāsaṃ prakalpayet/
darpaṇe kūrcasaṃyuktaṃ kumbheṣvavādya ācaret

jaladroṇyāṃ kaṭāhe vā samuddhṛtya māhājalam/
ekarātramatho vāpi ahorātra mathāpi vā

ghaṭikātrayasaṃyuktaṃ jalamadhye'dhivāsayet/
jalavāsabidhiñcaiva pratiṣṭhāśāstracoditam

snapanaṃ kalpayitvā tu ekāśītikrameṇa tu/
nayanotmīlanaṃ kṛtvā mṛdālepaṃ tataḥ kramāt

śayanaṃ kalpayitvā tu kūrce devena saṃsmaret/
vedimadhye vinikṣipya śāliṃ tatra vinikṣipet

bhāradvayasamāyuktaṃ tadardhaṃ taṇḍulaṃ tilam/
tanmadhye sthāpayet kumbhaṃ karakaṃ parikumbhakam

aṣṭamaṅgalasaṃyuktaṃ pālikābhi ralaṃkṛtam/
balipīṭhaṃ samāsādya prapāṃ caiva prakalpayet

śilpibhi rnirmitaṃ pīṭhaṃ śāstradṛṣṭena vartmanā/
śodhite balipīṭhe tu kṣālayet śuddhavāriṇā

prajvālite rdarbhapuñjaiḥ paryagnikaraṇe kṛte/
pañcagavyena saṃprokṣya snāpayennavakena tu

vāsasā pariveṣṭyātha arcayettu yathākramam/
dvārayāgaṃ tataḥ kuryāt maṇḍalaṃ paritaḥ kramāt

vedikāpaścime bhāge āsane tu samāviśet/
praṇāyāmaṃ tataḥ kṛtvā mantranyāsaṃ samācaret

arghyādikalpanaṃ kuryāt prokṣayedvedikāṃ tathā/
mūlabere samāvāhya viṣṇupārṣadadevatān

kumbhamadhye samāvāhya sakalīkṛtyāvayet/
viṣṇupārṣadamantrasya nyāsaṃ kṛtvā viśeṣataḥ

arcayitvā yathānyāyaṃ indrādīn parito nyaset/
kuṇḍapārśvaṃ samāsādya homakarma samācaret

ullekhanādi saṃskāraṃ pūrvavatkramayogataḥ/
samidājyacarūṇāṃ tu viṣṇupārṣadamantrataḥ

pratyekaṃ śatamaṣṭau ca prāyaśtittāhutiṃ caret/
ghṛtena madhunā dadhnā ṣāyasena yathākramam

caturdikṣu tato hutvā samidādi yathākramam/
aśvatthodumbaraplakṣanyagrodhāṃśaaca yathākramam

uktābhāve ca sarvatra pālāśasamidha stathā/
viṣṇupārṣadamantreṇa catuṣkuṇḍe yathākramam

prācyāṃ kuṇḍe tu juhuyāt tatvahomaṃ samācaret/
havirnivedayet paścāt balidānaṃ samācaret

maṇḍapādibahirvāsāt balipīṭhāntameva ca
bhojayet brāhmaṇānāṃ ca dvādaśāṣṭau yathābalam

maṇḍape śāyayitvā tu nṛttavādyasamanvitam/
prabhāte samyagutthāya snātvā japtvā yathāvidhi

nityapūjāṃ samārabhya maṇḍape kumbhamarcayet/
havirnivedayet paścāt homakarma samācaret

samidājyacarūṇāṃ tu pratyekaṃ ṣoḍaśāhutīḥ
pūrṇāhutiṃ tato hutvā pañcopaniṣadaiḥ kramāt

baliṃ ca sarvato dadyāt toraṇodvāsanaṃ caret/
dvārakumbhaṃ samādāya parikumbhe niyojayet

muhūrte śobhane prāpte ācāryo brāhmaṇai ssaha/
sthāpitaṃ kumbhamādāya prādakṣiṇyena mandiram

nṛttagītādisakalavādyaghoṣeṇa ghoṣayet/
pīṭhapārśvaṃ samāsādya puṇyāhaṃ tatra kārayet

arcayet gandhapuṣpādyaiḥ balipīṭhe yathākramam/
kūrcena tatoyamādāya prokṣayet pīṭhamūrdhani

viṣṇupāriṣadīśasya bhāvedbalipīṭhake/
parikumbhane saṃprokṣya aṣṭamaṅgaladarśanam

havirnivedayet paścāt ṣaḍaṅganyasamācaret/
baliṃ ca sarvato dadyāt balipīṭhe niveśayet

viṣṇupāriṣadīśasya balipīṭhe vibhāvayet/
deveśasyeśabhūtasya viṣṇupāriṣadīśakam

ācāryaṃ pūjayet paścāt ṛtvijāmapi dakṣiṇām?
iti saṃkṣepataḥ proktā pratiṣṭhā balipīṭhake

iti śrīpāñcarātre mahopaniṣadi aniruddhasaṃhitāyāṃ
balipīṭhapratiṣṭhāpanavidhirnāma dvātriṃśo'dhyāyaḥ
--------------************-----------------