Aniruddha Samhita · Chapter 31

atha ekatriṃśo'dhyāyāḥ
śrībhagavān--
garbhanyāsavidhiṃ vakṣye samāsādavadhāraya
devānāṃ brāhmaṇādīnāṃ garbhanyaso vidhīyate

grāmamadhye viśeṣeṇa devānāmālaye tathā
pāñcarātrapareṇaiva garbhanyāsaṃ samācaret

anyathā doṣamāpnoti śilpinā saha deśikaḥ/
tālamānapramāṇena garbhabhājana mācaret

tanmānena ca lokena vidhānaṃ parikalpayet/
śilayeṣṭakayā vāpi navagartaṃ prakalpayet

muhūrte śobhane prāpte rātrau garbhaṃ vidhīyate/
adhivāsaṃ tataḥ kuryāt tatkramaste pravakṣyate

snānakāryaṃ tataḥ kṛtvā alaṃkṛtya yathāvidhi/
aṅkurānarpayitvā tu kautukaṃ bandhayet pṛthak

snapanaṃ kārayeddhīmān ghaṭaissaptadaśaiḥ kramāt/
puṇyāhaṃ kārayeddhīmān vāsasā pariveṣṭayet

dhānyarāśiṃ vinikṣipya tadardhaṃ taṇḍulaṃ nyaset/
tilaṃ tadardhaṃ nikṣipya navavastraiḥ paristaret

abhyarcya gandhapuṣpādyai rmantreṇaiva tu deśikaḥ/
garbhapātraṃ samādāya śāyayecchayanopari

tasya dakṣiṇāpārśve tu kumbhaṃ saṃsthāpayedbudhaḥ/
devaṃ devīṃ samāvāhya pūjayet śāstravartmanā

garbhadravyaṃ samādāya vinyase dbhaktamadhyataḥ/
ratnaṃlohantathādhātu? bījamūlagaṇāṃstathā

aṣṭamṛdbhi rviśeṣeṇa brahmādīśānake nyaset/
sapātājyaṃ samāsicya pūjayet pūrvavartmanā

saṃbhavettu vidhānena tatraiva pariveṣṭayet/
homaṃ kuryādyathānyāyaṃ baliṃ dadyāt samantataḥ

muhūrte śobhane prāpte vinyase dgarbhabhājanam/
samudraparidhānīye parvatastanamaṇḍite

samastabhuvanādhāre devīgarbhasamāśrayaḥ/
sacihnairlohajaiścaiva mālyādigaṇasaṃyutam

tadgartaṃ pūrayetpaścānnṛttavādyasamanvitam/
sikataistoyapūraiśca tathāguṇiśilāgaṇaiḥ

garbhavinyāsākāle tu svastikai ssaṃprapūjayet/
ācāryaṃ pūjayet paścāt vastrahemāṅgulīyakaiḥ

śilpinaṃ pūjayet paścāt dhanadhānyagavādibhiḥ/
garbhavinyāsahīne tu tadgāmo nidhano bhavet

tasmāt sarvaprayatnena garbhanyāsaṃ samācaret/
sarvamaṣṭākṣareṇaiva dvādaśākṣareṇaiva vā

puṃsūktenaiva mantreṇa snapanaṃ kārayedbudhaḥ/
śrīsūktenaiva mantreṇa garbhabhājanamācaret

ṣaष़ḍakṣareṇa mantreṇa homaṃ kuryādvicakṣaṇaḥ/
mantratantravihīne tu sarvaṃ karmāsuraṃ bhavet

sudarśanena mantreṇa rakṣāṃ kuryāt samantataḥ/
hetīśaṃ svarṇamantreṇa garbhasthāne vinikṣipet

indrādīśānadevāṃśca svasthāne saṃprapūjayet/
iti samyak samākhyāto garbhanyāsavidhiḥ param

iti śripāñcarātre mahopaniṣadi aniruddhasaṃhitāyāṃ
garbhanyāsavidhirnāma ekatriṃśo'dhyāyaḥ
-------------**************--------------