Aniruddha Samhita · Chapter 30

atha triṃśo'dhyāyaḥ
śrībhagavān--
prāyaścittamatho vakṣye avadhāraya sāṃpratam/
śuddhaṃ trividhamākhyātaṃ vāṅmanaḥ kāyakarmaṇām

vāk‌cchuddhiśca ṛtaṃ proktaṃ mānasaṃ viṣṇucintanam/
kāyikaṃ karma devasya trividhaṃ suddhamucyate

sādhake snānahīne tu sarvaṃ niṣphalatāṃ bhavet/
mantrasnāna maśaktaścet tīrthatoyaṃ tu vā pibet

sandhyopāsanahīne tu prāṇāyāmaśataṃ japet/
nityapāvakahīne tu dvijabhojanamācaret

śāstramantraktiyāhīne sarvakārya manarthakam/
tasmāt sarvaprayatnena kārayet śāstravartmanā

mantrahīne tu viprendra sādhakastu vinaśyati/
dravyahīne viśeṣeṇa tatkartā nāśayed‌dhruvam

kriyāhīne dvijaśreṣṭha tadgrāmo nidhano bhavet/
dravyamantrakriyāyuktaṃ tatkārthaṃ saphalaṃ bhavet

dravyāṇāmapyalābhe tu mantraireva samarcayet/
dravyālābhe tu puṣpaṃ syāt pūṣpālābhe tu cetasā

śraddhābhaktihine tu sarvaṃ vai niṣphalaṃ bhavet/
maṇḍape garbhagehe tu valmīkādisamudbhave

taddeśaṃ khātayitvā tu mṛdbhiranyaiḥ prapūrayet/
śāntihomaṃ tataḥ kṛtvā tilairājyai rviśeṣataḥ

agnidāhe viśeṣeṇa punassandhānameva ca/
bimbe doṣasamāyukte punarutpādayet sudhīḥ

pratiṣṭhāṃ pūrvavat kṛtvā tataḥ pūjāṃ samācaret/
corādyupahate tatra tathaiva samyagācaret

nadyādijalavegena calanaṃ saṃbhavedyadi/
sthāpayeddevadeveśaṃ bimbañcānyatra deśikaḥ

vatsaratritayādūrdhvaṃ grāmādī.....cālayet?/
cālayedyādi saṃmohāt rājarāṣṭradhanakṣayaḥ

tasmāt sarvaprayatnena calanaṃ na tu kārayet/
āvaraṇāccalanācca rājā caiva vinaśyati

prāsādagopurādīnāṃ patane calane sati/
snapanaṃ śāntihomaṃ ca catuḥ sthānārcanaṃ tathā

ekāhañca tryahañcaiva pañcasaptanavāhakam/
gurulāghavayogetvā sarve caiva samācaret?

ādityasparśane vāpi prokṣaṇena vinaśyati/
udakyā sparśane cāpi snapanaṃ samyagācaret

dūṣite śvasṛgālādyaiśśāntihomaṃ samācaret/
kṣayakuṣṭhādyapasmarasparśite devabimbake

ekāśītikrameṇaiva snapanaṃ dvijamojanam/
dīpapūjāvihīne tu rātrau dviguṇamarcanam

ekarātravihīne tu pare dviguṇācaret/
dvitīyadivasānte tu prāyaścitta vidhīyate

snapanaṃ dvādaśaghaṭai śśāntihomaṃ samācaret/
vatsarādūrdhvato vipra pratiṣṭhāṃ samyagācaret

caturthāhātsamārabhya yāvanmāsāvadhi dvija/
pūjāhīne tu viprenda evamādikramāt caret

puṇyāhaṃ śāntihomaṃ ca snapanaṃ dvijabhojanam/
punaḥ pūjāvidhiṃ caiva tataḥ prabhṛti nityaśaḥ

māsadvayavihīne tu saṃprokṣaṇavidhiṃ caret/
tadūrghvaṃ tu ca viprendra catuḥ sthānārcanaṃ caret

saptāṣṭamāsādūrdhve tu tilahomaṃ samācaret/
vatsarādūrdhvato vipra pratiṣṭhāṃ samyagācaret

evamādikriyāhīne sarvakarmāsuraṃ bhavet/
jalavāsākṣimokṣaṃ ca varjayitvā samācaret

karṣaṇādi kriyāhīne sarvakarmāsuraṃ bhavet/
praveśabalihīne tu tatkarma viphalaṃ bhavet

śaṅkusthāpanahīne tu sthānanāśo bhaved‌dhruvam/
bījāvāpanahīne tu bījanāśo bhavedbhuvi

garbhanyāsavihīne tu tatkṣetraṃ sūnyatāṃ vahet/
aṅkurārpaṇahīne tu anartha māśubhavāham

jalavāsavihīne tu kartṛnāśo bhaved‌dhruvam/
akṣimokṣavihīne tu akṣināśo bhaved‌dhruvam

snapanasya vihīne tu vāstuhāni rbhaviṣyati/
homakarmavihīne tu sarvakāryaṃ vinaśyati

maṇḍalārādhane hīne tatkurma viphalaṃ bhavet/
sthāpanasya vihīne tu punaḥ sthāpanamācaret

karmāṇyādau pratiṣṭhārthaṃ yaḥ kuryātra deśikottamaḥ/
sa eva sakalaṃ karma kuryātra prājño'pi netaraḥ

ācāryasya ca sāṃkarye rājā rāṣṭraṃ vinaśyati/
nadyādijalavegena cālanaṃ yadi saṃmbhavet

nagaragrāmadhāmādi nirbādhe'nyatra kalpayet/
kalpanaṃ pūrvavatkuryāt mānādi dvijasattama

bimbaṃ ca tādṛśaṃ kuryāt grāmādīnapi tādṛśaḥ/
nimittaṃ pūrvamālokya sunimitte tu kārayet

durnimitte tu saṃprāpte śāntihomaṃ samācaret/
saudarśanena mantreṇa nārasiṃhena vā bhavet

vāsupūjāṃ tataḥ kṛtvā pāyasānnabaliṃ kṣipet/
dvijānāṃ bhojanaṃ kuryāt śaṅkusthāpana mācaret

śaṅkoḥ pūrvāparābhāge chāyayā bindamālikhet/
chāyāgravaśenaiva dikparicchedamācaret

khananañca tataḥ kṛtvā sikataiḥ paripūrayet/
hastapādairdṛḍhīkṛtya toyai ssiñcecchilopari

mānāṅguli pramāṇena dhāmādi parikalpayet/
upapīṭhayutaṃ vāpi adhiṣṭhānaṃ tu kalpayet

paṭṭikordhve viśeṣeṇa garbhanyāsa mathācaret/
grāmasya grāmamadhye? vā nagare ca tathaiva ca

etatkarmavihīne tu tatkarma viphalaṃ bhavet/
tasmāt sarvaprayatnena tattatkarma samācaret

dvijānāṃ bhojanenaiva sarvaṃ saṃpūrṇatāṃ nayet/
pāñcārātroktamārgeṇa grāmādi parikalpayet

pāñcarātraprabhāveṇa sarvadoṣo vinaśyati/
karṣaṇādikriyāssarvāḥ pāñcarātreṇa kārayet

nityakriyāvihīne tu pavitrāropaṇaṃ caret/
pavitrāropaṇe hīne māsapūjā vinaśyati

māsapūjāvihīne tu nityapūjā vinaśyati/
nityapūjāvihīne tu grāmanāśo bhaviṣyati

nityapūjāvihīne tu sarvaśāntiṃ samācaret/
pañcāhañcatryahañcaiva saptāhañca navāhakam

ādau saṃkalpya viprendra catuḥ sthānārcanaṃ caret/
snapanaṃ pratyahaṃ kuryāt dvijabhojanameva ca

dakṣiṇā saṃpradāne tu sarvadoṣo vinaśyati/
dānena dahyate sarvaṃ tasmāddānaṃ viśiṣyate

dharmeṇa labhyate sarvaṃ tasmādvarmaṃ viśiṣyate/
dānadharmadvayāccaiva viṣṇorārādhanena ca

iti śrīpāñcarātre mahopaniṣadi aniruddhasaṃhitāyāṃ
prāyaścittavidhirnāma triṃśo'dhyāyaḥ
--------*************------------