Aniruddha Samhita · Chapter 3

atha tṛtīyo'dhyāyaḥ
bhagavān---
ācāryalakṣaṇaṃ vakṣye samāsānmunipuṅgava/
brāhmaṇaṃ yonijaṃ śuddhaṃ niyartabrahmavādinam

pañcarātravidaṃ dāntaṃ sadācārasamanvitam/
yuvānaṃ komalaṃ śāntaṃ sarvāvayavaśobhitam

vedadedāṅgatattvajñaṃ śrautasmārtakriyāparam/
maccittaṃ madgataprāṇaṃ madārādhanatatparam

mannāmakīrtanaparaṃ matkathālolupaṃmanaḥ/
guṇavantaṃ śuciṃ dakṣaṃ satyavādijitendriyam

śāstrajñaṃ karmakuśalaṃ pañcarātrārthavedinam/
pavitrapāṇinirataṃ prāṇāyāmaparāyaṇam

pañcakālakriyāyuktaṃ pañcayajñasamanvitam/
mudrāmaṇḍalakuṇḍajñaṃ maṇḍalārcanatatparam

vratopavāsanirataṃ dayāśīlaguṇānvitam/
sarvapāpavinirmuktaṃ sarvadoṣavivarjitam

karṣaṇādikriyādakṣaṃ nityasnānakriyāparam/
pavitrakarmakuśalaṃ pratiṣṭhākarmalaṃpaṭam

utsavādikriyādakṣaṃ sahasrakalaśe kṣamam/
dvādaśyārādhanaparaṃ dvādaśākṣaracintakam

svatantrakarmakuśalaṃ yogāgninirataṃ śucim/
śaṅkacakrāṅkitabhujaṃ dhṛtapaṃcāṅgabhūṣaṇam

cidacidīśvaratattvajñaṃ mantrayantrakriyāparam/
śilpaśāstravicārajñaṃ śilpanirmāṇakovidam

smitapūrvābhibhāṣaṃ ca gurupūjāparānvitam/
svadāranirataṃ bhogasukhinaṃ putrasaṃyutam

kṣayakuṣṭhādirahitamanācāravivarjitam/
samayācārasaṃyuktaṃ jitakrodhaṃ jitendriyam

sarvabhūtadayāyuktaṃ kalyāṇāvayavānvitam/
kalyāṇakarmasaṃyuktaṃ kāmamohavivarjitam

sālagrāmārcanaparaṃ gītanṛttaviśāradam/
vādyavādanavargajñaṃ tālavargaviśāradam

ebhirguṇaissamāyuktamācāryaṃ varayetsudhīḥ/
śiṣya ssarvaguṇopeta ssatyavādī dayāparaḥ

vinayādiguṇairyuktaḥ dharmaśrutiparāyaṇaḥ/
brāhmaṇaḥ kṣatriyaścaiva vaiśyaśūdrau tathāparau

brahmacārī gṛhasthaśca vānaprastho'tha bhikṣukaḥ
etacchāstroktamārgeṇa dīkṣayetprathamaṃ dvijaḥ

iti śrīpāñcarātre aniruddhasaṃhitāyāṃ ācāryalakṣaṇaṃ nāma
tṛtīyo'dhyāyaḥ
-------------*************--------------