Aniruddha Samhita · Chapter 26

atha ṣaḍ‌viṃśo'dhyāyaḥ
śrībhagavān--
nīrājanavidhiṃ vakṣye devadevasya śārṅgiṇaḥ/
kṛttikādivasādbrahman na paredyu rniśāmukhe

devadāsīgaṇān sarvān sarvālaṅkāraśobhitān/
mahānasadvāramāsādya dīpānprajvālayedbahūn

sarve pātrakarā vipra gaccheṣu rdevasannidhau/
śreṇibaddhā stathā sarve gītavādyapurassaram

maṇḍapaṃ samalaṃkṛtya ānayenmaṇḍapāntare/
autsavaṃ bimba mādāya viṣṭare sanniveśayet

śrībhūmisahitaṃ deva malaṃkārai ralaṃkṛtam/
mahānṛttaṃ darśayitvā devaṃ nīrājanaṃ caret

sahasraṃ vā tadardhaṃ vā tadardhaṃ vāpi deśikaḥ/
śathaṃ vāpi tadardhaṃ vā tadardhaṃ vāpi kārayet

sarvapātrakarāścaiva tiṣṭheṣu rdevasannidhau/
ācāryassamalaṃkṛtya uttarīyoṣṇīṣabhūṣaṇaiḥ

devasya dakṣiṇe pārśve āsane tu samāviśet/
arghyādi pātrāṇyabhyarcya prāṇāyāmapurassaram

ātmārcanaṃ tataḥ kṛtvā devadevaṃ samarcayet/
dīpārcanaṃ tataḥ kṛtvā vedān saṃśrāvayedbudhaḥ

dīpakumbhaṃ samādāya ādhāropari vinyaset/
dīpakumbhaṃ samamyarcya devamiṣṭvā viśeṣataḥ

ṣaḍaṅganyāsaṃ kṛtvā tu bhrāmayeddevamūrdhani/
dakṣiṇaṃ pādamārabhya vāmapādaṃ tu paścimam

vādyamaṅgalasaṃyuktaṃ gītamaṅgalasaṃyutam/
yoṣitkarātsamādāya pātramādāya deśikaḥ

bhrāmayeddevadevasya mukhamadhye visarjayet/
pātre patre viśeṣeṇa arghyapuṣpai ssamarcayet

punaḥ pātraṃ samādāya prādakṣiṇyena mandiram/
gītavādyādisaṃyuktaṃ balipīṭhādbahiḥ kṣipet

nṛttādi darśayan dāsyaḥ devasya purataḥ sthitaḥ/
pūjayitvā ca deveśa mapūpādi nivedayet

utsavaṃ bimbamāropya yāne nītvā pradakṣiṇam/
antarāvaraṇamārabhya vīthyāvaraṇapaścimam

śuddhasnānaṃ tataḥ kṛtvā garbhagehe niveśayet/
nīrājanavihīne tu sarvakarmāsuraṃ bhavet

adhyayanotsavaḥ--
adhyayanotsavaṃ vakṣe saṃkṣepeṇa mayā śrutam/
pūjanaṃ trividhaṃ proktaṃ tantre'smin parameṣṭhinā

mānasaṃ kāyikañcaiva vācikaṃ trividhaṃ bhavet/
mānasaṃ dhyānamityuktaṃ kāyikaṃ karma ucyate

vācikaṃ stotramityuktaṃ tantre'smin viṣṇunā purā/
vedānnāstyaparaṃ stotraṃ tasmādvedāṃstu śrāvayet

aṅkuraṃ pūrvavatkṛtvā paścātpratisaraṃ budhaḥ/
mārgaśīrṣamāse tu ekādaśyā mupakramet

daśamyāṃ kautukaṃ kuryāt tatpūrve cāṅkurārpaṇam/
saṃkalpaṃ pūrvataḥ kṛtvā pañcāhaṃ daśāhaṃ tu vā

maṇḍape devamāropya bhaktibimbaṃ niveśayet/
tathā bhaktajanai ryuktaṃ vedān saṃśrāvayetsudhīḥ

mahāhavi rnivedyātha apūpādi nivedayet/
yātrāpūrvaṃ tataḥ kuryāt vāhanāni tu pūrvavat

samāptidivase prāpte viṣvak‌senaṃ samarcayet//
iti śrīpañcarātre mahopaniṣadi aniruddhasaṃhitāyāṃ
(nīrājana) adhyayanotsavavidhānaṃ nāma ṣaḍviṃśodhyāyaḥ//
--------------***************--------------