Aniruddha Samhita · Chapter 22

atha dvāviṃśo'dhyāyaḥ
śrībhagavān---
māsotvavidhiṃ vakṣye samāsācchṛgu sāṃpratam/
māsi māsi viśeṣeṇa dvādaśyāṃ viṣuvadvaye

nakṣatreṣu ca sarveṣu śravaṇaṃ cottamaṃ bhavet/
tithīnāṃ dvādaśī śreṣṭhā vārāṇāṃ śukravāsaram

yogānāntu vyatīpātaṃ karaṇānāntu viṣṭikam/
māsi māsi viśeṣeṇa dvādaśyāntu samarcayet

amāvāsyāṃ paurṇamāsyāṃ māsārdhe vā samarcayet/
dvādaśyāntu viśeṣeṇa maṇḍalārādhanaṃ caret

amāvāsyāṃ viśeṣeṇa kalaśaissnapanaṃ caret/
ghṛtaṃ vā kṣīrameva syānnālikerajalaṃ tu vā

uktadravyamatho vāpi yajamānecchayā guruḥ/
śravaṇe tu viśeṣeṇa catussthānārcanaṃ caret

mānasakṣetreke brahman patrapuṣpādikaṃ nyaset/
māghamāse tu māgharkṣe damanāropaṇaṃ caret

phalgune māsi ṛkṣe ca tulasyāropaṇaṃ caret/
caitre tu māse ṛkṣe tu campakārādhanaṃ caret

vaiśākhamāse ṛkṣe ca śatapatreṇa pūjayet/
jyeṣṭhamāse viśeṣeṇa phalotsavavidhiṃ caret

anūrādhe tu viprendrāmāvāsyāṃ śravaṇe'pi vā/
snāpayetsahasrakalaśaiḥ tadardhai rvā tadardhakaiḥ

aṣṭottaraśatai rvāpi tannyūnaṃ na samācaret/
uktadravyayutai rvāpi kevalaṃ kṣīrameva vā

ghṛtaṃ vā kevalaṃ vipra nālikerajalaṃ tu vā/
āṣāḍhe māsi māsarkṣe sahakāraphalai ryajet

śayanaṃ kārayedvipra cāturmāsye tu pūrvataḥ/
śravaṇe māsi māsarkṣe pūjayetkadalīphalaiḥ

tanmāse tu dvādaśyāṃ pavitrārohaṇaṃ caret/
jayantyutsava maṣṭamyāṃ śrāvaṇe kṛṣṇapakṣake

bhādrapade māsi ṛkṣe paṅkajārādhanaṃ caret/
āśvayuje māsi ṛkṣe śvetapadmai ssamarcayet

tanmāse tu viśeṣeṇa śayanotthāpanaṃ caret/
kārtike māsi māsarkṣe dīpārohaṇamācaret

tanmāse sakale vipra vṛścikārādhanaṃ caret/
mārgaśīrṣe māsi ṛkṣe gandhālepana mācaret

tanmāse pūrvapakṣe tu vedādhyayana mācaret/
adhyayanotsavaṃ kuryāddaga vā saptakaṃ bhavet

yadvā pañca dinaṃ vipra tryahaṃ vātha samācaret/
viṃśaddinamathovāpi devān sarvāṃśca śrāvayet

brāhmaṇai rmūrtimantraiśca vedapāragatairapi/
utsavaṃ kārayennityaṃ vāhanaṃ nijapūrvakam

kumbhamaṇḍalahomaṃ ca varjayettatra karmaṇi/
puṣye māsi ca māsarkṣe haridrālepanaṃ caret

tanmāse tu viśeṣeṇa vanabhojana mācaret/
tiladānaṃ māghamāse pitṝṇāṃ piṇḍamācaret

māsakarma iti proktaṃ tadvidhānaṃ pracakṣate/
patrapuṣpavidhau brahman pavitrāropaṇaṃ caret

phalapūjādikaṃ vipra pūraṇaṃ samyagācaret/
gandhapūjāvidhau brahman lepanaṃ samyagācaret

prathamañcākuraṃ vāpi maṇḍapālaṃkṛtiṃ tathā/
śuddhasnānaṃ tṛtīyañca caturthe dvārapūjanam

catussthānārcanañcaiva pañcamaṃ samudāhatam/
ṣaṣṭhaṃ kautukabimbaṃ syāttataśśayanakalpanam

śayanādhivāsane caiva rakṣā kāryā tataḥ param/
prātassnānaṃ tataḥ kuryāt kalaśaissnapanaṃ bhavet

dvārapūjāvidhānañca catussthānārcanaṃ tathā/
nivedanaṃ baliñcaiva bhūṣaṇāropaṇaṃ tathā//
bhūṣaṇāropaṇaṃ vipra pūjāyāssaṃpuṭaṃ bhavet/
vedaghoṣaṃ tataḥ ślokadānaṃ nīrājanaṃ tathā

gītaṃ vādyaṃ tathā nṛttaṃ homadravyabaliṃ rbhavet/
yātrotsavaṃ tataḥ kuryāt tatprasādapradāpanam

pūjāvarohaṇaṃ caiva punaḥ pūjāṃ samācaret/
śuddhasnānaṃ tataḥ kṛtvā tathāsthānaniveśanam

dakṣiṇāṃ supradānañca iti karmakramaṃ viduḥ/
etatkarmakrameṇaiva sarvakarmāṇi kārayet

prathamaṃ nābhimānañca dvitīyañcorumadhyagam/
tṛtīyaṃ jānumānantu caturthaṃ pādamānakam

puṣpapatrapavitreṣu pramāṇaṃ parikīrtitam/
kumbhamaṇḍalakuṇḍeṣu etanmānamudāhṛtam

sthūlamānaṃ tathāproktaṃ devībhyāṃ nābhimānakam/
sthūlayā saṅgabimbānāṃ nābhimānaṃ praśasyate

bhūṣaṇāyudhaśaktīnāṃ tālamānaṃ praśasyate/
pūraṇetu viśeṣeṇa mānaṃ vakṣyāmi suvrata

prathamaṃ pīṭhamānantu dvitīyaṃ jānumānakam/
tṛtīyamūrumadhyasthaṃ caturthaṃ kaṭimānakam

kumbhamaṇḍalakuṇḍeṣu śivamānena kalpayet/
śivaṃ śivadvayañcaiva viśivañca catuśśivam

kevalaṃ prasthāmānena upakumbhe prapūrayet/
mūlabimbe viśeṣeṇa pūrvavanmānamīritam

vāsudevādibhirmantraiḥ pūjayeddeśikaḥ svayam/
balikarmaṇi viprendra muṣṭimānaṃ pracakṣate

lepane tu viśeṣeṇa mānaṃ vakṣyāmi suvrata/
ākaṇṭhasthānaparyantaṃ prathamaṃ parilepayet

sthānānnābhyavadhi brahman dvitīyaṃ parilepayet/
nābhyā kaṭyavadhi brahman tṛtīyaṃ paricakṣate

akṣātpādāvadhi yāvat caturthaṃ parilepayet/
ākaṇṭhānnābhiparyantaṃ devībhyāṃ mānamīritam

pūrame pādamānaṃ syāt anyeṣāṃ pādamānakam/?
damanāropaṇātpūrve maṅkurānarpayet sudhīḥ

maṇḍapaṃ samalaṃkṛtya pūrvedyuśca niśāmukhe/
kumbhamaṇḍalakuṇḍañca kārayedvidhicoditam

cakrābjamaṇjalaṃ kṛtvā bhadrakākhyamathāpi vā/
yaṃtramaṇḍalakaṃ vāpi yajamānecchayā guruḥ

dvārādiyajanaṃ kuryāt puṇyāhaṃ vācayetsudhīḥ/
snapanaṃ kārayeddhīmān kṣīrādidvādaśe ghaṭe

tadberaṃ samalaṃkṛtya viṣṭare sanniveśayet/
maṇḍapasya tu pāścātye kumbhe saṃpūjayeddharim

maṇḍale pūjayeddevaṃ nārāyaṇamanāmayam/
bimbamabhyarcayedvīmān homakarma samācaret

nivedanaṃ tataḥ kṛtvā tattatsthāne baliṃ kṣipet/
kautukaṃ taṇḍule nyasya nītvā dhāmapradakṣiṇam

bherīnāda samāyuktamādhāropari vinyaset/
devamabhyarcya cārghyādyaiḥ bandhayeddakṣiṇe kare

punaḥ pūjāṃ tataḥ kṛtvā apūpādi nivedayet/
damanāṅkuramāhṛtya kṣālayecchuddhatoyakaiḥ

kadalītvaviśeṣeṇa dīrghapatre purandhragaiḥ/
varaṃkārayeddhīmān pūrvoktenaiva vartmanā

pṛthak pātre niveśyātha adhivāsanamācaret/
devamaṇḍapayo rmadhye vrīhipīṭhaṃ samācaret

tasyopari nyasetpātraṃ dahanāpyāyanaṃ caret/
saurabheyīṃ pradarśyātha pūjayedgandhapuṣpakaiḥ

kirāṭādyaiśca? mantraiśca pātayedapareṇa tu/
adhivāsajamādāya yojayetkumbhamūrdhani

pūjayā saṃpuṭīkuryāt gītavādyādikaṃ caret/
adhivāsasrajaṃ? vipra nābhimānaṃ pracakṣate

śayane sanniveśyātha rakṣāṃ kuryātsamantataḥ/
tataḥ prabhāte vimale snapanaṃ samyagācaret

aṣṭottaraśatai rvāpi ekāśītighaṭaistu vā/
snapanārthe tu deveśamānayetsiṃhaviṣṭare

vardhanyāñca tato dadyāt pūjayā saṃpuṭīkṛtaḥ/
gītanṛttādikān sarvān darśayeddevasannidhau

namaskṛtya yathānyāyaṃ stutvā devaṃ praṇamya ca/
maṇḍale yojayet paścāt kumbhavaddeśikottamaḥ

maṇḍalasthaṃ viśeṣeṇa tatkāle saṃpraveśayet/
aṅgānāmapyupāṅgānāṃ lājāntānāmapi dvija

bhūṣaṇānāṃ ca śaktīnāṃ tathā ca vihageśituḥ/
arghyādīnāntu prātrāṇāṃ dhūpadīpaprakāṇḍakaiḥ

mūlabere yathā kuryāt homakuṇḍe tathā bhavet/
evaṃ kṛtvā vidhānena dvārasthānādīnāṃ caret

ālayāṅgasthabimbānāṃ caṇḍādīnāṃ viśeṣataḥ/
evaṃbidhānasaṃyuktaṃ tattad‌dravyai rbaliṃ kṣipet

aparāhṇe tu saṃprāpte yānamāropya deśikaḥ/
dhāmapradakṣiṇaṃ kṛtvā vīthyāvaraṇapaścimam

maṇḍape sanniveśyātha sannyāsaṃ caiva kārayet/
śuddhasnānaṃ tataḥ kṛtvā dakṣiṇāṃ saṃpradāpayet

yatīnāṃ brāhmaṇādīnāṃ prasādaṃ paridāpayet/
yaḥ karoti naro bhaktyā sa yāti brahmaṇaḥ padam

aśvamedhāṣṭakaṃ puṇyaṃ vājapeyatrayaṃ tathā/
sarvapāpakṣayaṃ caiva sarvopadravanāśanam

iti śrīpāñcārātre mahopaniṣadi aniruddhasaṃhitāyāṃ
damanāropaṇaṃ nāma dvāviṃśo'dhyāyaḥ/
------------**************-----------------