Aniruddha Samhita · Chapter 21

atha ekaviṃśo'dhyāyaḥ
śrībhagavān--
mahotsavaṃ pravakṣyāmi vistareṇa tavānagha/
aṅkurāvāpanaṃ pūrva patākāropaṇaṃ tathā

kautukasyotsavaṃ paścāt utsavāraṃbhagaṃ bhavet/
snapanaṃ devadevasya yāgadīkṣāhyanantaram

catussthānārcanañcaiva homakarmāṇyanantaram/
tīrthāṅkurārpaṇañcaiva grāmasya ca baliṃ tathā

yātracotsavabimbasya tathā tīrthādhivāsanam/
tīrthasnānaṃ tataḥ kuryātpuṣpayāgamanantaram

dhvajāvarohaṇakañcaiva udvāsanabaliṃ tathā/
viṣak‌senārcañcaiva karmakramamimaṃ viduḥ

utsavārambhadivasāt saptame pañcame'hani/
aṅkurasyārpaṇaṃ kuryātpūrvavaccoktavartmanā

utsavārambhadivasāt pūrvedyuśca niśāmukhe/
kautukaṃ bandhayeddhīmān tatkramaste pravakṣyate

maṇṭapaṃ samalaṃkṛtya dhvajatoraṇakumbhakaiḥ/
kramukaiḥ kadalīkāṇḍai rdarbhamālyādikai stathā

tanmadhye vedikāṃ kuryāt biṣṇuyantraṃ prakalpayet/
maṇ‍ṭapasyeśadigbhāge kumbhaṃ saṃsthāpayetsudhīḥ

pūrvavadagnipārśve tu kuṇḍaṃ kuryādvicakṣaṇaḥ/
maṇḍalātpaścime bimbaṃ sthāpayettu yathāvidhi

dvārādiyajanaṃ kṛtvā catuḥ sthānārcanaṃ yajet/
kautukaṃ kārayedvidvān sauvarṇenaiva deśikaḥ

tantusūtrayutañcaiva utsavasya viśeṣataḥ/
devībhyāntu viśeṣeṇa balisnapanaberayoḥ

ācāryasya viśeṣeṇa ṛtvijānāṃ tathaiva ca/
pṛthak taṇḍulapātreṣu tāmbūlasahitaṃ nyaset

śiṣyasya śirasi sthāpya prādakṣiṇyena mandiram/
vedaghoṣasamāyuktaṃ gītavādyasamanvitam

dhānyarāśiṃ vinikṣipya ādhāropari binyaset/
puṇyāhaṃ vācayet paścāt brāhmaṇaissaha deśikaḥ

bimbaṃ saṃpūjayet paścāt pūjayet pratisarīyakam/
sūtramādāya hastābhyāṃ dhārayitvā vicakṣaṇaḥ

bandhayeddakṣiṇe haste devadevasya śārṅgiṇaḥ/
śriyo rvāmakare kuryāt ācāryasya svahastake

pūjayitvā yathāpūrva mapūpādi nivedayet/
mudgānnaṃ tu nivedyātha baliṃ dadyāt samantataḥ

śayanaṃ kalpayitvā ca śayane sanniveśayet/
uṣaḥ kālotsavaṃ kuryāt sarvaiḥ parikarai ssaha

anekadīpasaṃyuktaṃ gītavādyādisaṃyutam/
svastivācanasaṃyuktaṃ sarvamaṅgalasaṃyutam

vīdhyāvaraṇapūrvaṃ tu antarāvaraṇapaścimam/
evaṃ saṃbhrāmayitvā tu maṇṭape sanniveśayet

nṛttagītādisakalaṃ darśayitvā vicakṣaṇaḥ/
utsavārambhaṇe snāna mārabhenmantravittamaḥ

aṣṭottaraśatai rvāpi ekāśītighaṭaistu vā/
kalaśaiḥ snāpayetpaścāt cūrṇasnānaṃ samācaret

alaṃkārāsane nītvā alaṃkṛtya yathāvidhi/
yāgamaṇḍapabhūmau tu paścime sanniveśayet

śrībhūmisahitaṃ vipra balibimbasamanvitam/
yāgadīkṣāvidhiṃ vakṣye samāsādavadhāraya

maṇḍapaṃ cāgrataḥ kuryāt agrālābhe yathāruci
maṇṭapaṃ samalaṃkṛtya vitānādyairalaṃkṛtam

dhvajatoraṇa kumbhādyai rambhāpūgasamanvitaiḥ
bhitticitravicitraṃsyānmaṇ‍ḍalaṃ kārayedbudhaḥ

maṇḍalasyottare pārśve kumbhaṃ saṃsthāpayedbudhaḥ/
kumbhamaṇḍalayorbāhye paritaḥ kuṇḍamācaret

pūrvādīśānaparyantaṃ kuṇḍaklaptimatha śṛṇu/
tryaśraṃ vṛttaṃ ṣaḍaśraṃ vā vasvaśraṃ vidiśaḥ kramāt

aṣṭakuṇḍavidhau vipra catuṣkuṇḍavidhiṃ śṛṇu/
aśraṃ cāpa matho vṛttaṃ padmaṃ pūrvāditaḥ kramāt

mukhyakalpe tu viprendra aṣṭakuṇḍaṃ prakalpayet/
ṛtvijo varayetpūrvaṃ kuṇḍe kuṇḍe pṛthak pṛthak

maṇḍalasya tu pūrve tu garuḍaṃ sanniveśayet/
dakṣiṇe cakrarājaṃ tu paścime baliberakam

seneśamuttare pārśve alaṃkṛtya niveśayet/
maṇḍalaṃ cakrapadmaṃ vā iṣṭasiddhipradaṃ tu vā

vāsudevākhya yantraṃ vā kārayettu yathāruci/
kumbhamaṇḍalakuṇḍantu parikumbhasamanvitam

mahākumbhasya pārśve tu vardhīnīṃ saṃniveśayet/
upakumbhasamāyukta maṣṭamaṅgalakai ryutam

pālikābhiḥ samāyuktaṃ phalai rnānāvidhairyutam/
dīrghastabakasaṃyuktaṃ kramukai rnālikerakaiḥ

vastrayugmaṃ mahākumbhe ekamanyatra yojayet/
kūrcapallavasaṃyuktaṃ śarāve sūtrasaṃyutam

śarāve tu śarāve tu nālikeraphalaṃ nyaset/
evaṃkṛtvā viśeṣeṇa dvārapūjāṃ samācaret

kumbhe saṃpūjayeddevaṃ vāsudeva manāmayam/
upakumbhe yajeddevānvāsudevādikān kramāt

anekairupacāraiśca catuṣṣaṣṭigaṇaistu vā/
kumbhe ca maṇḍale caiva prokṣaṇasnānamācaret

agnai caiva viśeṣeṇa upacāraiḥ pṛthagghuvet/
maṇḍale pūjayetpaścāt bimbaṃ saṃpūjayetparam

homakāryaṃ tataḥ kṛtvā vāsudevādi mantrataḥ/
prabhavāvyayayogena aṣṭakuṇḍeṣu homayet

tīrthāṅkurārpaṇaṃ kuryāt pūrvoktakramayogataḥ/
baliṃ kṛtvā tathā vīthyāṃ baliberasamanvitam

kumudādigaṇai ryuktaṃ gītavādyasamanvitam/
utsavaṃ yānamāropya kuñjaraṃ vā rathaṃ tu vā

śibikāṃvā viśeṣeṇa yathālabdhānurūpataḥ/
naikaiḥ parikarai ryuktaṃ bahudīpasamanvitam

antarāvaraṇapūrvaṃ vīthyāvaraṇapaścimam/
balisthāne tu saṃprāpte tāmbūlaṃ candanaṃ dadet

madhyadeśe tu saṃprāpte gaṇakrīḍāṃ samācaret/
evaṃ kṛtvā viśeṣeṇa mahāmaṇḍapamānayet

siṃhāsane niveśyātha arghyādyaiḥ paripūjayet/
arghyaṃ pādyaṃ tathācāmaṃ gandhaṃ puṣpañca dhūpakam

dīpaṃ nīrājanaṃ caiva bahunṛttaṃ pradarśayet/
vastramālyānyapohyātha snānakarma samācaret

snānānte devadeveśaṃ maṇḍape saṃniveśayet/
pūjanaṃtvatha viprenda nivedyāntaṃ samācaret

prathame syandanaṃ proktaṃ dvitīye śibikā bhavet/
tṛtīye garuḍaṃ proktaṃ caturthe rathameva ca

pañcame dolikāyānaṃ ṣaṣṭhe vai kuñjaraṃ tathā/
saptame puṣpayānaṃ syādaṣṭame cāśvavāhanam

navame kuñcaraprābhā daśame kuñjaraṃ bhavet?
tīrthādhivāsanātpūrvaṃ mṛgayādivasaṃ bhavet

mṛgayādivasātpūrvaṃ jalakrīḍāvagāhanam/
jalakrīḍādinātpūrvamudyānagamanaṃ bhavet

udyānagamanātpūrvaṃ nadīyātrāṃ samācaret/
nadīyātrādinātpūrvaṃ vrīhimānamathocyate

vrīhimānadinātpūrvaṃ vanavāsamathācaret/
yātrācotvabimbasya dvikāle cottamā bhavet

ekakālamathovāpi karturicchānurūpataḥ/
apūrvābharaṇairmālyairapūrvaiścāmbaraistathā

apūrvodyānayānādyai ryathākautuhalaṃ bhavet/
tathā viśiṣya kartavyaṃ yāvattīrthadināvadhi

tīrthasnānadinātpūrvaṃ rātrau tīrthādhivāsanam/
maṇḍapaṃ samalaṃkṛtya tīrthaberaṃ samānayet

dhānyapīṭhaṃ pratiṣṭhāpya tīrthaberaṃ samānayet/
arghyādyairarcacitvātha kumbhaṃ saṃsthāpayetsudhīḥ

kumbhe tīrthaṃ samāvāhya pūjayitvā vicakṣaṇaḥ/
havirnivedayetpaścāt baliṃ dadyāt samantataḥ

rajanīcūrṇamādāyolakhale tu vinikṣipet/
ulūkhalaṃ musalaṃ caiva prakṣālyābhyarcya deśikaḥ

ācāryāvagāhanaṃ pūrvaṃ gaṇikābhiranantaram/
cūrṇena ghaṭṭanaṃ vāpi pañcakaṃ tritayantu vā

sthaṇḍile saṃpratiṣṭhāpya kūrcañcaiva vinikṣepet/
abhyarcya puṃsimantreṇa? puṇyāhaṃ caiva kārayet

punarabhyarcya deveśaṃ cūrṇasnānaṃ samācaret/
vāsudevatanuspṛṣṭaṃ cūrṇaṃ paramapāvanam

pādaspṛṣṭajalaṃ vipra gaṅgātoyasamaṃ bhavet/
tulasī candanaṃ puṣpaṃ sarvapāpaharaṃ nṛṇām

tasmātsarvaprayatnena bhaktānāṃ ca pradāpayet/
ye vahanti pibantyaitat te ca yānti parāṃgatim

avabhṛthasnānam----
tataḥ prabhāte vimale vāsarotsavamācaret/
puraśodhanapūrvantu yathāpūrva baliṃ kṣipet

yātrāvasāne deveśaṃ mūlaberapurassaram/
mahākummasthakūrcena prokṣayenmūlamantrataḥ

pūjayā saṃpaप़ṭīkuryānmaṇḍale tu niyojayet/
vahnisthaṃ tu viśeṣeṇa pūrṇāhutipurassaram

prāyaścittāhutiñcaiva kumbhamaṇḍalapūjanam/
yathāpūrvaṃ purā kṛtvā paścātprokṣaṇamācaret

tīrthaberaṃ samāropya yānaṃ vipravarairdvija/
utsavānte samādāya kevalaṃ tīrthaberakam

ānayettīrthadeśe tu prabhāṃ tatraiva kārayet/
tīrthadeśaṃ samāsādya prabhāmadhye niveśayet

tīrthakumbhaṃ samādāya yojayettajjalaiḥ punaḥ/
tattīrthantu samabhyarcya kalaśaiḥ snāpayetprabhum

paścāttīrthaṃ tu saṃprāpya nimajya ca trithā punaḥ/
ye snāpayanti saṃprāpya gaṅgāsnānaphalaṃ labhet

sarvadānaphalañcaiva sarvatīrthaphalaṃ labhet/
svasthāne saṃniveśyātha śuddhasnānaṃ samācaret

mantrasnānaṃ tataḥ kṛtvā nīrājanamathācaret/
alaṅkārāsanaṃ nītvā havirantaṃ samarcayet

mandiraṃ prāpayeddevaṃ sarvaiḥ parikaraiḥ saha
brāhmaṇai rvedaghoṣaiścālayāvaraṇapaścimam

utsavena saha vīthyāṃ tīrthaberaṃ samānayet/
svasthāne sanniveśyātha dvāre śaṅkaṃ ninādayet

utsavaṃ maṇḍape sthāpya snāpanaṃ kārayedbudhaḥ/
alaṃkārāsane nītvā prabhūtānnaṃ nibedayet

daśame'hani saṃprāpte puṣpayāgaṃ samācaret/
sannidhau devadevasya devapārāyaṇaṃ caret

saṃhitāñcaiva śākhāñca āraṇaṃ tadanantaram/
ṛgyajussāmavedāṃśca tathāthaveṇameva ca

saṃbhāvayettato devān vastratāmbūlabhojanaiḥ/
snapanaṃ puṣpayāgārthaṃ kārayeduktavartmanā

kautukaṃ bandhayetpūrvaṃ devadevasya śārṅgiṇaḥ/
agnimaṇjalamāsādya puṣpamaṇḍalamācaret

cakrābjayantrakaṃ vāpi ācāryasya vaśāttu vā/
maṇḍalasya tu pāścātye bimbaṃ siṃhāsane nyaset

maṇḍalasyottare pārśve kumbhaṃ saṃsthāpayedbudhaḥ/
devasyeśānabhāge tu viṣvak‌senaṃ niveśayet

dakṣiṇe hetirājānaṃ brāhmaṇānparito nyaset/
dvārārcanaṃ tataḥ kuryāt kumbhamaṇḍalapūjanam

bimbe saṃpūjayetpaścāt aṣṭau dvādaśadhāpi vā/
ṣaṭkaṃ catuṣṭayaṃ kālaṃ pratyekantu viśeṣataḥ

arghyaṃ pādyaṃ tathācāmaṃ gandhaṃ puṣpaṃ ca dīpakam/
dhūpaṃcaiva nainedyaṃ tāmbūlaṃ tiladānakam

vedaṃ ślokaṃ tathā gītaṃ nṛttaṃ vādyaṃ punaḥ punaḥ/
gītantu maṅgalaṃ proktaṃ nṛttaṃ vai mārganṛttakam

pūṣpapūraṃ samāhṛtya pṛthak pātre niveśayet/
sannidhau sthāpayitvā ca puṣpapatraissamarcayet

śoṣaṇādi kriyāṃ kṛtvā arghyādyaiḥ saṃprapūjayet/
arghyaṃ gandhaṃ tathā puṣpaṃ dhūpañcaiva catuṣṭayam

sthāpayedambareṇaiva vikireddevapādayoḥ/
śilpadāsagaṇān sarvān saṃbhāvanamathācaret

candanaiścaiva tāmbūlaiḥ devavastraṃ pradāpayet/
ācāryai ssādhakaiścaiva bibhaveddeva mūrdhani

yātrāṃ ca kārayeddhīmān prādakṣiṇyena mandiram/
ekadhā vā dvidhā vāpi sthitvā dvārapradeśataḥ

stotreṇa toṣayeddevaṃ jānānāhūya deśikaḥ/
sevārthamāgatān sarvān devānṛṣigaṇānapi

vilokya devadeveśaṃ svasthāne tu visarjayet/
devaṃ garbhagṛhe nītvā svasthāne saṃniveśayet

tatkumbhantu samādāya ādhāropari vinyaset/
mūlaberaṃ samabhyarcya prokṣayenmūlamantrataḥ