Aniruddha Samhita · Chapter 20

atha viṃśo'dhyāyaḥ
śrībhagavān--
utsavaṃ saṃpravakṣyāmi vistareṇa tavānagha
savastvamaṅgalaṃ viddhi utsavastannivartakaḥ

nityo naimittikaḥ kāmya utsava strividho bhavet/
pratisaṃvatsare māsi kriyate sa tu nityakaḥ

nimitte sati saṃjāte satu naimittikau bhavet/
bhṛguḥ--
bhūtādidarśane caiva durbhikṣe vyādhipīḍane

paracakrapraveśe ca vyomni nemisvane tathā/
divyadundubhinirhrāde vālamīnasya darśane

darśane suracāpasya pūrvabhāge tathā niśi/
apare madhyame vāpi ulkāpāte viśeṣataḥ

ālayasya cāgninā dāhe prāsādapatane tathā/
prākāragopurādīnāṃ caityavṛkṣādipātane

valmīkādi samutpanne madhuprāpte tu maṇḍale/
bhūbhujānāṃ viśeṣeṇa rogādīnāmupasthitau

grahadoṣe tu saṃprāpte kuhūdoṣasamudbhave/
putradārādito vipra rogādīnāṃ samudbhave

anāvṛṣṭau cātivṛṣṭau devabrāhmaṇaghātuke/
pitṛmātṛvadhe vipra prāyaścittārthamācaret

utsavaḥ paramo brahman nityo naimittakaḥ smṛtaḥ/
kāmārthamācaredyastu kāmya ityabhidhīyate

utsava strividhaḥ prokta uttamādi vibhedataḥ/
uttamo māsa ityuktaḥ madhyamaḥ pakṣa ucyate

navāhastvadhamaḥ prokta iti śāstrasya niścayaḥ/
ekāhe ca tryahe caiva pañcasaptanavāhake

dvādaśāhe tathā pakṣe māsadūrdhvaṃ ca kārayet/
ekāhe ca tryahe caiva dhvajakarma na kārayet

tīrthakālamatho vakṣye śruyatāṃ munisattama/
ayane viṣuve caiva grahaṇe somasūryayoḥ

rājajanmadine vāpi abhiṣekadine'pi vā/
paurṇamāsyadvaye vāpi śravaṇe sārvamāsike

pratiṣṭhādivase vāpi grāmajanmadine'pi vā/
viṣuvaikadine? vipra tīrthasnānaṃ samācaret

tīrthasnānadinātpūṃrvaṃ dhvajārohaṇamācaret/
ekaviṃśadine kuryānvāhotsavakarmaṇi

karmārambhadināt pūrvamaṣṭādaśadine'pi vā/
pakṣe māse tathā kuryānmāse māsadvaye tathā

atha vāradine vāpi? tatprakāra stathocyate/
dhjārohaṇapūrvaṃ vā bherītāḍanapūrvakam

aṅkurārpaṇapūrvaṃ tu trividho bheda ucyate/
ghvajārohavidhiṃ vakṣye śṛṇu guhyaṃ mahāmune

ghvajārohadinātpūrvaṃ pañcasaptadine'pi ca/
navāhe vā muniśreṣṭha ekādaśadine'pi vā

aṅkurānarpayedvidvān pūrvoktena krameṇa tu/
aṅkuraṃ trividhaṃ proktaṃ bījaprārohataṇḍulam

bahuvāre tu bījaṃ syādalpavāre prarohakam/
sadyaḥ kāle viśeṣeṇa taṇḍalaṃ saṃpracakṣate

pālikā ghaṭikācaiva śarāvaṃ trividhaṃ bhavet/
pavitrāropaṇecaiva kalaśasyotsave? tathā

mahāberapratiṣṭhāyāṃ patrapuṣpaphalotsave/
devadevasya viprendra trividhañcāṅkurārpaṇam

anyeṣu sarvakāryeṣu pālikāyāṃ samācaret/
trivargakaraṇe vipra ekaikaṃ ṣoḍaśaṃ bhavet

dvādaśaṃ cā'ṣṭakaṃ vā'pi ṣaṭkaṃ vā'pi catuṣṭayam/
kevalaṃ pālikā ceti dvādaśāṣṭamathāpi? vā

trivargapālikocchrāyaṃ ṣoḍaśāṅgulamuttamam/
dvādaśāṅgula vistarāmunmattakusumākṛtiḥ

biladvayasamāyuktā pālikā saṃpracakṣate/
valayaika samāyuktaṃ śarāvaṃ saṃpracakṣate/ 29 //
ghaṭikā pañcavaktrā syāt caturdiṅmadhyatonmukhā/
prakṣālya śuddhatoyena bali saṃpūrayettṛṇaiḥ

rajanīpatradūrvaiśca bandhayetkaṇṭhadeśataḥ/
tathā mṛdgrāhakāle tu ānayedvinatāsutam

viṣvak‌senaṃ tathāvāpi hanūmantamathāpi vā/
naikaiḥ parijanairyuktaṃ khanitreṇa samudvaret

pūrvavadgrahaṇaṃ kuryāt maṇḍapālaṃkṛtiṃ tathā/
catuḥ sthānārcanaṃ caiva tathā dvārādi pūjanam

puṇyāhoktiṃ tataḥ kuryāt kalaśaṃ pūrvavaccaret/
maṇḍalaṃ svastikaṃ vāpi cakrābjamathavā dvija

paṭaṃ vakṣye viśeṣeṇa citrakarma viśeṣataḥ/
daśahastāṣṭahastaṃ vā saptahasta mathāpi vā

āyāmārdhena vistīrṇaṃ śikharaṃ pucchasaṃyutam/
nirṇejitaṃ khalīyuktaṃ śoṣitaṃ lakṣaṇānvitam

śilpaśāstrānusāreṇa citrayeccitravittamaḥ/
ardhamardhena vistīrṇaṃ pādena kṛtaśekharam

mānonmānasamāyuktaṃ navatālena kalpayet/
paṭamadhye likheddevaṃ paप़ñcavarṇena śilpavit

dvibhujaṃ kanakākāraṃ karaṇḍamakuṭojyalam/
gagane gamanārambha pakṣavikṣepaśobhitam

dhṛtāñjalipuṭaṃ nīlanāsāgraṃ priyadarśanam/
daṃṣṭrākarālavadanaṃ bhrukuṭīkuṭilekṣaṇam

utkuñcitaṃ vāmapādaṃ dakṣiṇaṃ pṛṣṭhataḥ sthitam/
ananto vāmakaṭako yajñasūtrantu vāsukiḥ

takṣakaḥ kaṭisūtrantu hāraḥ kārkoṭakastathā/
padmo dakṣiṇakarṇe tu mahāpadmastu vāmataḥ

śaṅkhaśśiraḥ pradeśe tu gulikastu bhujāntare/
etairaṣṭoragairamyai rbhūṣitaṃ bhujagottamaiḥ

chatraṃcoparivinyasya pārśvayoḥ śvetacāmare/
dīpadaṇḍadvayaṃ pārśve śaṅkhaṃ cakraṃtu pārśvataḥ

adhastādambujaṃ pūrṇa kumbhapātrañca pālikāḥ/
antarālapadaṃ kālakṛṣṇenaiva samālikhet

evaṃ paṭaṃ likhitvā tu pratiṣṭhāṃ samyagācaret/
rajjuṃ tantugaṇenaiva kārayedaṅguṣṭhanāhataḥ

karmārambhadinātpūrvaṃ rātrau ca rajanīmukhe/
devāgre maṇḍape brahman paṭamānīya deśikaḥ

mūlaberaṃ darśayitvā vistareddevasammukham/
maṇḍapasyottare bhāge kumbhaṃ saṃsthāpya pūrvavat

kuṇḍamāgneyake kuryāt maṇḍalaṃ paṭapūrvataḥ/
maṇḍalaṃ svastikaṃ vāpi bhūtāvāsa mathāpi vā

tasya paścimadeśe tu bimbasaṃsthāpanaṃ param/
dvārādiyajanaṃ kuryāt catussthānārcanaṃ caret

puṇyāhaṃ vācayetpaścāt kautukaṃ bandhayetpaṭe/
chāyādhivāsanaṃ kuryāt kaṭāhe maṇike'pi vā

darpaṇe sakalaṃ kuryāt tadabhāve tu kūrcake/
parikumbhaṃ tu saṃsthāpya brahmakumbhaṃ tu vinyaset

yāmamātraṃ jale sthāpya yāmārdhamathavā bhavet/
kumbhe saṃpūjayedvipra brahmabījene sādhakaḥ

rakṣāṃ sarveṣu kumbheṣu indrādīn paripūjayet/
māpānnena baliṃ kuryāt aṣṭadikṣu samantataḥ

mṛdgataṃ? sarvadeveśaṃ paṭe saṃyojayedbudhaḥ/
nayanonmīlanaṃ kuryāt pūrvavad‌dvijasattama

mṛdālepaṃ tataḥ kuryāt parvatāgrasthamṛtsnayā/
darpaṇe tu samāvāhya snānavedyāṃ niveśayet

snapanaṃ pūrvavatkuryāt cūrṇasnānamanantaram/
śuddhasnānaṃ mantrasnānaṃ nīrājanamanantaram

paṭe saṃyojanañcaiva śayanasya ca kalpanam/
paṭasya dakṣiṇe pārśve kumbhaṃ saṃsthāpayedbudhaḥ

vardhanī parikumbhāṃśca aṣṭamaṅgalakānapi/
pālikā paritassthāpya kumbhe saṃpūjayet prabhum

paṭasthaṃ garuḍaṃ vipra pūjayetsvīyavidyayā/
homakarma tataḥ kṛtvā mantranyāsaṃ samācaret

pāyasādi nivedyātha baliṃ dadyātsamantataḥ/
kumbhasthaṃ garuḍaṃ caiva paṭamadhye niyojayeta

devatāvāhanaṃ vakṣye bherītāḍanasaṃyutam/
sadhvaje? tu viśeṣeṇa tadrātrau sakalaṃ bhavet

bhinnadhvaje tathā brahman dhvajāsyārohaṇaṃ? bhavet/
paṭamadhye tu garuḍaṃ mārgatrayamathācaret

śayanaṃ kalpayitvaivaṃ baliberaṃ niveśayet/
baliberasya pūrve tu kumbhaṃ saṃsthāpayedbudhaḥ

kumbhasya pūrvabhāge tu bherīñcaiva tu vinyaset/
darbhaiḥ paristarai statra vāsudevādikān nyaset

puṇyāhaṃ vācaye dvidvān tadbaliṃ paripūjayet/
bherī mabhyarcayedvidvān kāṃsyaghaṇṭādisaṃyutam

śaṅkhañca kāhalañcaiva jhallikā maddalaṃ tathā/
paṭahaṃ caiva timitaṃ hrasvamaddalakaṃ bhavet

kāṃsyatālagaṇañcaiva paritaśca niveśayet/
kumbhe samyagviśeṣeṇa devān sarvān samāhvayet

indramagniṃ yamañcaiva nairṛtaṃ varuṇaṃ tathā/
vāyuṃ somaṃ tatheśānaṃ indrādityamarudgaṇān

(vasavoṣṭau dvādaśādityā rudrā ekādaśa kramāt)
balibhujaḥ kumudādi puroditān
harimahotsavakarmaṇi vāstuṣu
vada mamākhiladevagurorguroḥ
pratidiśaṃ haripāriṣadān kramāt

ahaṃ khalvakhilāṇḍayoneśśeṣadhiṣaṇādīśacaturāprameyasya anavaratasukhino hare rmahotsavādiṣu grāmādivāstuṣu indrādidik‌sthitānāṃ kumudādīnāṃ varṇarūpavāhanāyudhaparivāramantrārcanādīn yathāmapi kathayiṣye/
skandhāsanasthakamalāsakhavāsudevaṃ
vegāvadhūtapavamānasavegayānam/
nāgādhipragrahaṇalolupavakratuṇḍa---
māvāhayāmi vihagādhipamutsavādau

evaṃ saṃsmṛtyārghyapādyācamanagandhapuṣpadhūpadīpairabhyarcyānantaraṃ tadvat baliṃ dravyaṃ naivedyaṃ datvā'camānāñcaliṃ darśayitvā harermukhavāsaṃ vidhāya taddigddevatṛptyarthaṃ śaṅkhadundubhinṛttagītādi kārayet/
dambholibhīṣaṇabhujāya surādhipāya
śyāmāya dānavakulakṣayakāraṇāya
pūrvādhipāya suravāraṇavāhanāya/
tubhyaṃ pulomatanayāpataye namo'stu

evaṃ---agne tu havyamaniśaṃ vahane surāṇāṃ
kavyaṃ samīpamathavā nayate pitṝṇām/
dhūmadhvajāya dahanāya juhūdarāya
soṇāya koṇapataye bhavate namo'stu

evaṃ kālāya lokasamadaṇḍabidhāyakāya
nīlaprabhāya mahiṣādhipavāhanāya
daṇḍāyudhāya tanayāya bikartanasya
devāya dakṣiṇādiśāpataye namo'stu

śyāmāya bhīṣaṇamṛgādhipavāhanāya
koṇādhipāya lasadugrakṛpāṇakāya
tubhyaṃ piśācakularākṣasayātudhāna
senāvanapriyakṛte nirṛte namo'stu

śyāmalāya makarādhirohiṇe/
tubhyamullasitapāśapāṇaye
jīvanāya varuṇāya kurmahe/
dehināmaparadik‌pataye namaḥ

prāṇādi bhedakajuṣe dhṛtaketanāya
dhūmrāya tuṅgamṛgapuṅgavavāhanāya
koṇādhipāya jagatāmadhipāvanāya
vātāya tīvragataye bhavate namo'stu

suvarṇavarṇāya śivapriyāya
dhanādhināthāya gadāyudhāya
udagdigīśāya harādrivāsine/
namo'stu tasmai haravāhanāya

vṛṣādhirūḍhāya jaṭāya mauline/
kapālabālendukalāvataṃsine/
triśūline koṇadiśādhivāsine
sadā suvāsāya śivāya te namaḥ

evaṃ--prataptakalyāṇanibhāya bribhrate/
kare'kṣamālāvalayaṃ kamaṇḍalum/
svayaṃbhuve haṃsavarādhirohiṇe/
namo'stu tubhyaṃ jagātāṃ sisṛkṣave

ghoṣayet sarvavādyāni vādyakarmaviśāradaiḥ/
grāme vā nagare vāpi pattane vā mahāmate

vīthīmukhamalaṃkuryāt rambhāpūgadhvajāṅkuraiḥ/
dīpaiḥ pūrṇaghaṭai ścaiva darbhamālyaiśca toraṇaiḥ

indrādīśānaparyantaṃ baliṃ dadyādvicakṣaṇaḥ
utsavaṃ baliberañca ghaṭaṃ vai devasammukham

āropya parikaraiḥ sārdhaṃ tālavṛntagaṇai ryutam/
anekadhvajasaṃyuktaṃ vādyavādanasaṃyutam

grāmasyendrādi digbhāge tiṣṭanvai devatāmukham/
gomayālepanaṃ kuryāddhastamātrapramāṇataḥ

darbhāsanaṃ tataḥ kṛtvā devamuddiśya sādhakaḥ/
āvāhayettato devamindraṃ kumudameva ca

arghyaṃ pādyaṃ tathācāmaṃ gandhaṃ puṣpaṃ ca dhūpakam/
baliṃ tāmbūlakañcaiva ślokapūrvaṃ tathā yajet

bherītāḍanakañcaiva tālavādanapūrvakam/
gītaṃ nṛttaṃ ca vādyaṃ ca sarvadeśeṣu ca kramāt

kāntāraṃ pūrvadigbhāge kauśikaṃ dakṣiṇe tathā/
ṣaścime kāmadaṃ proktaṃ tarkarāgaṃ tathottare

āgneyyāntu kaulīsyānnairṛte naṭabhāṣaṇam/
takkeśī vāyudigbhāge cālāpāṇī tu śāṅkare

madhyame pañcamaṃ proktaṃ pīṭhasthāne tu mālavī/
aindre tu deśīnṛttaṃ syādāgneye mallakaṃ bhavet

dakṣiṇe tu ghaṭakrīḍā yaddhakrīḍā ca nairṛte/
paścime kandukakrīḍā gaṇakrīḍā ca mārute

mārgamuttarato vidyādbhajaṅgaścaiśake param/
brāhme gaṇabhuvaṃ proktaṃ pīṭhapārśve tu maṅgalam

kheṭakaṃ yāmyabhāge tu nairṛte cakramaṇḍalam/
kramasthaḥ pūrvadigbhāge śabdamāgneyake bhavet

gāruḍaṃ vāruṇe bhāge hāsyanṛttaṃ tu mārute/
maṅgalaṃ somadigbhāge mahānṛttaṃ tu śāṅkare

bāhme tu sarvavādyaṃ syāt pīṭhadeśe yathāruci/
evameva prakāreṇa baliṃ kuryātsamantataḥ

pīṭhasya dakṣiṇe sthitvā dhvajārehaṇamācaret/
dhvajadaṇḍaṃ pratiṣṭhāpya stambhaṃ candanakaṃ tathā

tekavṛkṣaṃ ca khadiraṃ panasaṃ pāṭalaṃ tu vā/
kramukaṃ nālikeraṃ ca tālaṃ veṇuṃ tathaiva ca

svayaṃśuṣkaṃ ca patitaṃ koṭaraṃ vakrakaṃ tyajet/
śatatālaṃ tadardhaṃ vā tasyārdhamathāpi vā

aśītitālamicchanti kecittasyārdhamevā vā/
prāsādocchrāyamānaṃ vā gopurocchrāyakaṃ bhavet

dvātriṃśadaṅgulaṃ mūlaṃ madhyāgre bilakaṃ vinā/
.....tryaṃśabhāgena mānasūtraṃ prakalpayet

pīṭhakatritayaṃ kuryāt yantrākārantu pīṭhakam/
nirgamassamamānantu? yaṣṭiṃ tatraiva yojayet

pīṭhamaudumbaraṃ vāpi aśvatthaṃ vāpi kārayet/
yaṣṭiṃ veṇuṃ khādiraṃ vā yaṣṭyagraṃ samamānakaṃ

darbhamālyaiśca saṃveṣṭya prādakṣiṇyakrameṇa tu/
antardarbhasamāyuktaṃ darbhakhaṇḍantu vāgrataḥ

avaṭasyottare bhāge udagdaṇḍantu śāyayet/
saṅkaṭe sati viprendra yathādeśānurūpataḥ

prāgagramudagagraṃ ca kārayeddeva karmaṇi/
prakṣālya śuddhatoyena puṇyāhaṃ prokṣaṇaṃ caret

gandhapuṣpai ssamabhyarcya yantreṇaiva samuddharet/
baddhadhvajapaṭaṃ vāpi kevalaṃ vāpi kārayet

stambhamūlaṃ draḍhīkuryāt pīṭhaṃ samyak prakalpayet/
trihastaṃ vā dvihastaṃ vā pañcahasta mathāpi vā

hastocchrāyaṃ tathā kuryāt tadūrdhve mekhalātrayam/
tadūrdhve padmakaṃ kuryāt dvādaśāṣṭadalai ryutam

stambhasya paritaḥ kuryāt maṇḍapaṃ saprapaṃ tu vā/
arohayedhdvajaṃ paścāt rajjunā deśikottamaḥ

puṇyāhaṃ pūrvataḥ kuryāt samabhyarcya yathāvidhi/
havirnivedayet paścāt kubhmaprokṣaṇapūrvakam

sannidhau devadevasya nṛttagītādikaṃ caret/
vīthīṃ pradakṣiṇīkṛtya utsavaṃ saṃpraveśayet

dhvajārohaṇakāle tu bherīṃ śvṛṇvanti ye janāḥ/
tai rnadītaraṇaṃ naiva na yānaṃ yojanātparam

gamane sati sammohādvyādhimāpnoti nityaśaḥ/
tasmāt sarvaprayatnena bahiryānaṃ vivarjayet

iti saṃkṣepataḥ prokto dhvajārohavidhi rmayā/
iti śrīpāñcarātre mahopaniṣadi aniruddhasaṃhitāyāṃ
dhvajārohaṇavidhirnāma viṃśo'dhyāyaḥ/
-----------------******************--------------------