Aniruddha Samhita · Chapter 19

atha ekonaviṃśo'dhyāyaḥ
bhṛguḥ--
snapanaṃ śrotumicchāmi devadevasya śārṅgiṇaḥ
kālaṃ brūhi mama brahman dravyāṇāṃ vistṛtīṃ kramāt/ 1 //
śrībhagavān--
snapanaṃ te pravakṣyāmi vistareṇa tavānagha
snapanaṃ dvividhaṃ proktaṃ parāparavibhedataḥ

paraṃ tu trividhaṃ prokta maparaṃ dvādaśaṃ bhavet/
sahastraṃ tadardhakañca tadardhantu tadardhakam

triprakāraṃ mayā proktaṃ paraṃcaiva viśeṣataḥ/
ekaṃ trayaṃ tathā pañca navakaṃ dvādaśaṃ tathā

saptadaśaṃ pañcaviṃśaṃ ṣaṭ‌triṃśacca navottaram/
catvāriṃśadviśeṣeṇa aśītyekādaśaṃ kramāt

aṣṭottaraśataṃ caiva evaṃ dvādaśakaṃ bhavet/
ayane viṣuve caiva paurṇamāsyadvaye'pi ca

dvādaśyāṃ tu viśeṣeṇa śravaṇe janmaṛkṣake/
abhiṣekadinevāpi damanārohaṇādike

utsavādyantakāle tu puṣpayāge viśeṣataḥ/
pavitrārohaṇe caiva tāvat puṣpaphalotsave

catuḥ sthānārcane caiva anāvṛṣṭividhau tathā/
durnimitte ca saṃjāte durbhikṣe vyādhipīḍane

viśeṣayajane caiva dravyāṇāṃ pūraṇe'pi ca/
snapanaṃ kārayedvidvānanyathā doṣakṛdbhavet

suvarṇaṃ rajataṃ vāpi tāmraṃ mṛṇmaya meva vā/
pakvabimbaphalākāraṃ mṛṇmayaṃ doṣavarjitam

āḍhakaṃcottamaṃ proktaṃ tadardhaṃ madhyamamaṃ bhavet/
tadardhamadhamaṃ proktaṃ vividhaṃ kārayedbudhaḥ

tadvayaṃ karakaṃ proktaṃ tadvayaṃ kumbhamucyate/
tadvayaṃ tu mahākumbhametanmānaṃ prakīrtitam

mānena niścitaṃ sarvaṃ tasmānmānaṃ hi pūrakam/
mṛtkumbhe sūtraveṣṭaṃ syāllohe tu parivarjayet

vastraṃ kūrcaṃ śarāvaṃ ca dravyaṃ sāmānyakaṃ bhavet/
snapanaṃ dvividhaṃ proktaṃ karmāṅgaṃ kevalaṃ bhavet

karmāṅge tu viśeṣeṇa nāṅguraṃ kautukaṃ bhavet/
kevale tu viśeṣeṇa aṅkuraṃ kautukaṃ bhavet

karmāṅgamutsavādyeṣu viṣuvādyeṣu kevalam/
maṇḍapālaṃkṛtiṃ kuryāt pratiṣṭhākarmavad‌dvijaḥ

kevale tu hi viprendra catussthānārcanaṃ caret/
maṇḍalaṃ kārayeddhīmān yajamānecchayā tataḥ

maṇḍapasyottare paṃktau kumbhamaṇḍalakuṇḍalam/
pūrvādi paścimānte tu krameṇaiva prakalpayet

maṇḍapasya tu madhye tu kalaśasthāpanaṃ caret/
bimbasaṃsthāpanaṃ pūrvaṃ sūtrapātaṃ samācaret

kalaśasyānurūpeṇa ekadvitritaye'pi vā/
navakādiṣu viprendra sūtrapātaṃ samācaret

koṣṭhakoṇe viśeṣeṇa vrīhiprasthaṃ prapūrayet/
kalaśādhivāsanaṃ kuryāt paścime kalaśāspade

mārgatrayaṃ tathā kṛtvā vrīhīnāstīrya taṇḍulaiḥ/
darbhaiḥ paristarettatra prāṅmukhaḥ parameṣṭhinā

tasyopari nyasetkumbhān puruṣeṇaiva deśikaḥ/
śoṣaṇādikriyāṃ kṛtvā arghyādyaiḥ paripūjayet

adhomukhān nyasetkumbhān viśvenaiva tu deśikaḥ/
akṣatānvikiretpaścāt nivṛttimantreṇa?mantravit

darbhānupari saṃstīrya sarpamantreṇa mantravit/
vāsasācchādayetpaścāt baliṃ dadyāt samantataḥ

dravyādhivāsanaṃ kuryāt tatkāle deśikottamaḥ/
dravyādhivāsane vipra saṃpātājyena secayet

etatkarma viśeṣeṇa sarvasāmānyakaṃ bhavet/
aṅkuraṃ kautukaṃ caiva tathā kumbhādhivāsanam

karmārambhadinātpūrvaṃ sadyo vā sakalaṃ caret/
dvārapūjāvidhiṃ caiva puṇyāhaṃ caiva kārayet

kumbhamaṇḍalabimbāgnipūjanaṃ tadanantaram/
kalaśasnapanaṃ caiva cūrṇasnāna manantaram

śuddhasnānaṃ tataḥ kuryāt rajanīsnānameva ca/
sahasradhārayā snānaṃ nīrājanamanantaram

maṇḍapāsanakāryañca bhojyāsanamataḥ param/
pūrṇāhutiṃ tataḥ kuryāt baliṃ dadyāt samantataḥ

etatkarma kramātproktamasmin bhadramaye prabho!
ekaberavidhānetu tatraiva snapanaṃ bhavet

bahuberavidhāne tu snapane snapanaṃ bhavet/
utsave tu tathābhāve tathābhāve tu kautuke

lepabhittipaṭasthe tu karmārcāyāṃ samācaret/
darpaṇe tadabhāve tu tadabhāve tu kūrcake

karmāṅgasnapane vipra utsave sarvamācaret/
atha dravyanāma---
dravyanyāsamatho vakṣye samāsādavadāraya

udakkumbhe ghṛtaṃ proktaṃ pañcagavya mathāpi vā/
kevalaṃ gandhapuṣpaṃ vā nikṣipettantravittamaḥ

tṛtīye tu viśeṣeṇa patraṃ puṣpaṃ phalaṃ bhavet/
pañcakumbhe tu viprendra pañcagavyamatho bhavet

gandhapuṣpaphalaṃ caiva patraṃ dhānyaṃ tathaiva ca/
pañcagavyamathovāpi navake vakṣyate'dhunā

ghṛtādikamatho vāpi navaratnodakaṃ tu vā/
navagandhādikaṃ vāpi dvādaśe vakṣyate'dhunā

dvidhā vātha tridhāvāpi caturādighṛtādikam/
dhātrāphalodakañcaiva lodhratoyamanantaram

raktacandanatoyaṃ ca rajanīnīramuttamam/
granthīphalavacāśvattha toyaṃ tataḥ tṛṇodakam

priyaṅguvāri tadanu mauñjījalamataḥ param/
siddhārthaṃ yavatoyaṃ ca sarvaudhijalaṃ tathā

patrapuṣpodakaṃ caiva dvādaśaite prakīrtitāḥ/
atha saptadaśe kumbhe dravyaṃ vakṣye yathākramam

ghṛtamuṣṇodakaṃ caiva ratnavāri phalodakam/
lohammārjanagandhaṃ ca akṣataṃ ca yavodakam

pādyamarghyaṃ tathācāmaṃ pañcagavyaṃ tathā dadhi/
payo madhu kaṣāyaṃ ca kramātsaptadaśaṃ bhavet

pañcaviṃśati kumbheṣu dravyanyāsamathocyate/
tanmadhye navake vipra ghṛtādīn parinikṣipet

ghṛtaṃ pādyaṃ dadhi caiva arghyaṃ kṣīra mataḥ param/
ācāmaṃ gandhatoyaṃ ca pañjagavyaṃ kaṣāyakam

dhātrīphalodakañcaiva kramād‌dravyaṃ vinikṣipet/
ṣaṭ‌triśatkalaśe brahman dravyanyāsaṃ pracakṣate

dravyāṇāṃ navakaṃ proktaṃ ṣaṭ‌triṃśatkalaśe param/
ghṛtādi navakaṃ vāpi gandhādi navakaṃ tu vā

candanaṃ kuṅkumaṃcaiva karpūramagaruṃ tathā/
elālavaṅgatakkola muśīraṃ koṣṭhameva ca

ekonapañcāśatkalaśe dravyanyāsaṃ bravīmi te/
pradhānasaptadaśakaṃ dravyayogaṃ krameṇa ca

madhyakumbhe navaṃ caiva kevalaṃ kṣīrameva vā/
mahādi kumbhaṣaṭke ca ghṛtamekaṃ prapūrayet

vidikkoṇacatuṣkeṣu dadhi caiva prapūrayet/
ekāśītighaṭe brahman dravyanyāsakramaṃ śṛṇu

atrasaptadaśaṃ śreṣṭhaṃ dravyanyāsaṃ krameṇa tu/
ghṛtādidravyasaṅghaṃ vā kevalaṃ kṣīrameva vā

ghṛtaṃ vā kevalaṃ vipra aṣṭottaraśataṃ śṛṇu/
dvātriṃśakadravyaṃ teṣu madhye caiva catuṣṭaye

gandhaṃ puṣpaṃ phalaṃ caiva mūlaṃ patraṃ tathāṅkuram/
hrasvamaṇḍalakaṃcaiva dīrghastaṃbakameva ca

atha dīrghaṃ ca taccakranavakaṃ parikīrtitam/
candanaṃ kuṅkumaṃ caiva karpūraṃ himatoyakam

caturmadhyamakumbheṣu āgneyādiṣu vinyaset/
śatapatraṃ tathā jātirmallikābakulaṃ bhavet

pūrvadvādaśake vipra madhye vai darpaṇe nyaset/
kadalīpanasaṃ caiva likuṭaṃ caiva dāḍimam

āgneyadvādaśe kumbhe nyasenmadhye tu pūrvavat/
karpūraṃ caiva hrīberamuśīraṃ ca haridrakā

yāmye dvādaśake vipra madhye kumbhacatuṣṭaye
tulasībilvapatrañca tathāvai dantikādvayam

nairṛte vinyasetpātre vāruṇe cāṅkuraṃ bhavet/
dūrvāṅkaraṃ saṭā bhadrā viṣṇukrāntirmahī gajam

mārute svabalaṃ vakṣye śaivāla magaruṃ tathā/
pūrvamātharvikañcaiva saumye caiva pracakṣate

punnāgaṃ pāṭalaṃ caiva cūtamāragbadhaṃ tathā/
īśānye vakṣyate brahman kramukaṃ nālikerakam

tālaṃ vai rolakramukaṃmadhyameṣu padeṣu ca/
aparaikādaśaṃ proktaṃ pare trividhamucyate

sahasraṃ ca tadardhaṃ ca tadardhaṃ ca trayaṃ bhavet/
ekādaśaghaṭe? vakṣye vistareṇa tavānagha

ekañca madhyame sthāpya yame ca tu catuṣṭayam/
pañcamaṃ dik‌catuṣke ca madhye caikaṃ praśasyate

navake digaṣṭake proktaṃ madhyame dvādaśaṃ śṛṇu/
aṣṭadigaṣṭakaṃ proktaṃ madhye caiva catuṣṭayam

saptadaśakrame vipra madhyamaṃ navakaṃ bhavet/
tadbahi ścāṣṭadeśeṣu aṣṭakumbhañca vinyaset

pañcaviṃśaghaṭe vipra madhyame navake nyaset/
bahiṣṣoḍaśakumbhaṃ syāt ṣaṭ‌triṃśatkalaśaṃ śṛṇu

catuṣṭayaṃ caturdikṣu navakoṣṭheṣu vinyaset/
śṛṇu guhyamanā vipra catvāriṃśannavottaram

navakaṃ madhyame sthāpya aṣṭadik‌paṃcakaṃ bhavet/
ekāśītighaṭe vipra tatkramaṃ saṃpracakṣate

navakaṃ navakaṃ brahman navapaṃktiṣu vinyaset/
aṣṭottaraśate brahman sthāpanakrama ucyate

dvādaśa dvādaśa brahman nava paṃktiṣu vinyaset/
sahasrakalaśe brahman sthāpanakrama ucyate

kṣetramadhyamadeśeṣu aṣṭādaśa ghaṭān nyaset/
navakoṣṭheṣu viprendra dvitayaṃ dvitayaṃ nyaset

tadbahistvaṣṭadeśeṣu pañcakaṃ pañcakaṃ nyaset/
aṣṭottaraśate kumbhe tadbahiśca digantare

dvādaśa dvādaśa brahman navapaṃktiṣu binyaset/
aṣṭottaraśatenaiva paritodikṣu vinyaset

eva maṣṭādaśaiḥ kuṃbhaiḥ catuṣṣaṣṭhyadhike dvija/
aṣṭottaraśate kumbhe pratyekaṃ navapaṃktiṣu

brahmādīśānaparyantaṃ pāktau paṃktau ca vinyaset/
śeṣaṃ ṣaṭ‌triṃśakaṃ kumbhaṃ niśācūrṇaiśca pūrayet

dviprakāraṃ mayā proktaṃ sahasraghaṭaveśane/
pañcāśaccaca ghaṭe vipra sthāpanaṃ kathyate'dhunā

aṣṭottaraśata madhye paritaścāṣṭadikṣu ca/
ekonapañcāśadvipra tattaddikṣu ca vinyaset

catuśśataiśca kumbhaiśca aṣṭakumbhavihīnake/
pañcāśadviśatānāṃ ca kumbhānāṃ sthāpanaṃ śṛṇu

kṣetreṣu ca caturmadhye catvāriṃśannavottaram/
tadbahiścāṣṭakumbheṣu pañcaviṃśatikaṃ nyaset

śatadvayañca paritaścaikacūrṇaghaṭaṃ? bhavet/
dravyanyāsa matho vakṣye sahasrakalaśeṣu ca

madhya aṣṭādaśe kumbhe navaratnaṃ vinikṣipet/
dvandvadvandvaprayogena vinyasecca ghaṭadvaye

catvāriṃśaddhaṭe bāhye caikaikaṃ mauktikaṃ nyaset/
aṣṭottaraśate caindre mūlena paripūrayet

hrīberañcaiva karcūramuśīraṃ rajanīṃ tathā/
madhye kumbhacatuṣkeṣu vinyasetpāvakānvitam?

bahiraṣṭaghaṭe vipra hrīberaṃ parito nyaset/
tadbahi ścāṣṭadeśeṣu dravyanyāsaṃ vadāmi te

rajanīdvitayañcaiva śṛṅgivera muśīrakam/
utpalatritayaṃkāntaṃ karcūraṃ cāṣṭakaṃ bhavet

aṣṭadvādaśa kumbhe tu prītidravyantu vinyaset/
pāvakeṣṭaśate madhye catuṣkaṃ patrake nyaset

tulasīdvitayañcaiva tathā damanikādvayam/
pāvakādi vinikṣipya śeṣaṃ vai tulasīdalam

bahiraṣṭapade vipra patravṛndaṃ vadāmi te?
aśvatthodumbaravaṭaplakṣanyagrodhameva ca

cūtaṃ bilvañca vakulaṃ kramāttatraiva nikṣipet/
yāmyāṣṭake śate vipra dravyanyāsaṃ pracakṣyate

madhyame tu catuṣkumbhe campakaṃ vakulaṃ tathā/
mālatī śatapatrañca āgneyādiṣu vinyaset

bahiraṣṭaghaṭe vipra vinyase cchatapatrikām/
tadbahi ścāṣṭadeśeṣu puṣpapūraṃ vidhīyate

nandyāvartañca punnāgaṃ mālatī mādhavaṃ tathā/
utpalatritayañcaiva ketakīcārakaṃ bhavet

ekaikaṃ pūrayet sarvān kumbhe kumbhe pṛthak pṛthak/
nairṛte cāṣṭake brahman phalavṛndaṃ vadāmi te

kadalīpanasañcaiva mātṛcūtaṃ? tathaiva ca/
madhyame tu catuṣkumbhe pūrvakaṃ vinyaset kramāt

tadbahi ścāṣṭakumbheṣu vinyaset kadalīphalam/
bahiraindrādiyogena phalapūraṃ vadāmi te

likucaṃ vakulaṃ caiva dāḍimaṃ mātuluṅgakam/
pārāvataṃ cāmalakaṃ navāṅgaṃ viśvameva ca

etaddravyaṃ krameṇaiva pūrayet pūrvavat kramāt/
vāruṇe kevalaṃ kṣīraṃ kevalaṃ ghṛtameva ca

vāyavye saṃpravakṣyāmi candanaṃ kuṅkumaṃ tathā/
karpūramagaruñcaiva catuṣkaṃ vinyasetkramāt

paritaśśiṣṭakumbheṣu kevalaṃ candanodakam/
bahiḥ pūrvādike vipra kramāddravyamathocyate

muramāñjiṣṭhakarcūraṃ koṣṭhaṃ vā campakaṃ tathā?
elālavaṅgatakkolaṃ kramāddravyaṃ prakīrtitam

saumye dvādaśakumbheṣu kṣīramekaṃ prapūrayet/
tadvaccāṣṭhamadaśeṣu kramāddvyaṃ pracakṣyate

gomūtraṃ gomayañcaiva dadhi takraṃ tathaiva ca/
tailaṃ sarṣapatailaṃ ca nālikeraṃ ghṛtaṃ gulam

īśānakastha kumbheṣu kramāddravyaṃ nibodha me/
gulatoyaṃ cekṣutoyaṃ śarkarodakameva ca

puṇyeṣu sādhakaṃ caiva catuṣkumbheṣu vinyaset/
tadbījāṣṭakakumbheṣu ikṣusāraṃ prapūrayet

bahiḥ pūrvādikumbheṣu kramāddravyaṃ nibodha me/
tilaṃ lājaṃ ca mudgaṃ ca vrīhimāṣavacāntathā

godhūmaṃ ca priyaṅgaṃ ca kramātkumbheṣu nikṣipet/
sahasramūrtimantreṇa snāpayetpuruṣottamam

ṛgyajussāmātharvādyaiḥ snapayetkalaśaṃ param/
aṣṭākṣareṇa vā sarvaṃ dvādaśākṣaratopi vā

pūrvādisomaparyanta muddhārakrama iṣyate/
āgneyādīśaparyanta muddhāraṃtu dvitīyakam

pūrvādimadhyaparyantaṃ sarvasyodgrahaṇaṃ bhavet/
kevalaṃ kṣīramekāṅgaṃ ghṛtaṃ vā saṃbhavaṃbhavet

nālikerajalairvāpi kaivalantu sahasrakam/
sahasrārdhaghaṭe vakṣye dravyanyāsaṃ krameṇa tu

ghṛtaṃ gandhaṃ tathā puṣpaṃ patraṃ mūlaṃ phalaṃ tathā/
pañcagavyaṃ tathā kṣīraṃ brahmadyaiśānapaścimam?

īśāne dadhi vinyasya snāpayetpuruṣottamam/
adhamaṃ snapanaṃ vakṣye dravyanyāsakrameṇa tu

madhyakumbheṣu sarveṣu kṣīramekaṃ prapūrayet/
bahiścāṣṭapade vipra pañcaviṃśatisaṃkhyake

arghyaṃ pādyaṃ tathācāmaṃ takraṃ dadhi ghṛtaṃ madhu/
kaṣāyañca kramātproktaṃ mṛddhanaṃ pūrvavadbhavet

dravyāṇāmapyalābhe tu tadbhāgaikaṃ praśasyate/
dravyāṇāṃ viṣṇudaivatyaṃ cakrikāṇāṃ tu gāruḍam

sūtrāṇāṃ śeṣadaivatyaṃ pātrāṇāṃ phaṇirājakam?/
kūrcaiṣu brahmadaivatya mādhāre dharmadaivatam

vāsasāṃ vāsavo daivaṃ sarveṣāṃ viṣṇudaivatam/
yassnāpayati deveśaṃ dravyayuktaghaṭai rnara

sarvapāpavinirmukta ssa yāti brahmaṇaḥ padam/
so'tulāṃ śriya māptoti sarvatīrthaphalaṃ labhet

sarvayajñaphalañcaiva sarvadānaphalaṃ bhavet/
saṃsāreṇa pratīyāti nātra kāryā vicāraṇā

iti śrīpāñcarātre mahopaniṣadi aniruddhasaṃhitāyāṃ
snapanavidhirnāma ekonaviṃśo'dhyāyaḥ/
-------------------**************---------------