Aniruddha Samhita · Chapter 18

atha aṣṭādaśo'dhyāyaḥ
śrībhagavān--
agnikāryamatho vakṣye saṅgrahānmunisattama/
pacanālayamāsādya dvāramabhyarcya sādhakaḥ

cullyāṃ dakṣiṇato vipra homakuṇḍaṃ samācaret/
caturaśraṃ samaṃcaiva yoninābhisamanvitam

mekhalātrayasaṃyuktaṃ pīṭhakādisamanvitam/
kuṇḍasya dakṣiṇe pārśve āsane tu samāviśet

śrīkaraṃ vistare pārśve ullekhanamathācaret/
pūrvāgre tribhiraikhaiśca uttarāgre tathaiva ca

pūrvāgraṃ yāmyasaumyaṃ syāduttarāgraṃ tu paścimam/
agniṃ samindhayetpaścāt prāṇāyāmamathācaret

darbhaiḥ paristarettatra vāsudevādimantrataḥ/
kuṇḍasyottarapārśve tu darbhaistatra paristaret

pātrāṇāṃ sādanaṃ kuryādvitayugmena sādhakaḥ/
ājyapātraṃ tathā darvīṃ prokṣaṇīṃ praṇītāmapi

idhmaṃ darvīṃ viśeṣeṇa sādhayenmantravittamaḥ/
prokṣaṇīṃ purato nyasya pavitraṃ tatra nikṣipet

pūrayejjalapātreṇa tatrotplāvanamācaret/
tajjalaiḥ prokṣayetpātrāṇyuttānaṃ samyagācaret

punaśca prokṣaṇaṃ kuryāt praṇītāṃ purato nyaset/
unplāvanaṃ pūrvavatkṛtvā darbheṇa ca vidhānataḥ

lalāṭasamamuddhṛtya sthāpayenmekalopari/
agneruttarapārśve tu brahmakūrcaṃ vinikṣipet

brahmāṇamarcayedvidvān arghyagandhādibhiḥ kramāt/
ājyapātraṃ samādāya ājyaṃ nikṣipya sādhakaḥ

agneruttaraparārśve tu aṅgārānvibhajettataḥ/
vibhajyorghve pratiṣṭhāpya darbhānādīpayettataḥ

darbhāgrau tatra nikṣipya punarādīpya darśaṃyet/
ājyapātraṃ samuddhṛṣya aṅgārān sahayojayet

ādāya purato nyasya utplāvanaṃ samyagācaret/
kūrcamagre vinikṣiṣya saurabheyīṃ pradarśayet

darvīmādāya savyena apasavyena darbhakam/
tridhā santāpayedvidvān darbhānagnai vinikṣipet

paridhiṃ vinyasedvipra ājyaṃ dakṣiṇamuttare/
pariṣecanaṃ kramāt kṛtvā ūrdhvaṃ vinyasya koṇayoḥ

anuyājannyasedvidvān praṇītāṃ mukhamadhyame/
idhmahomaṃ tataḥ kṛtvā āghāraṃ juhuyāttataḥ

anilādyagniparyantamāghāraṃ prathamaṃ huvet/
nairṛtādīśa paryantamāghāraṃ tu dvitīyakam

agnessavyāpasavye tu agnessomena hūyate/
devīṃ devaṃ tato dadyādṛtusaṅgamanaṃ param

ubhābhyāmapi sañjātamagniṃ ca paricintayet/
homāntādikriyāṃ? kṛtvā ājyena dvijasattama

samidājyena caruṇā pratyekaṃ ṣoḍaśāhutīḥ/
jihvāhomaṃ tataḥ kṛtvā jñātvā śaktiṃ ca homayet

nityahomaṃ viśeṣeṇa kramādvakṣye viśeṣataḥ/
agniṃ samindhayetpaścāt prāṇāyāmaṃ ca kārayet

pariṣecanaṃ kramātkṛtvā agniṃ dhyātvā samarcayet/
samidājyena caruṇā yadvā ājyena vā bhavet

mūlamantratrayeṇaiva trirdravyaiḥ parihomayet/
dvādaśāṣṭāhutīrvāpi baliṃ dadyātsamantataḥ

ātmanaḥ purataścaiva pitṝṇāṃ piṇḍamācaret/
darbhaiḥ paristaretpaścāt kabalatrayamācaret

pitṛmātṛgaṇābhyāṃ vai viśvedevā anantaram/
kabalatritayaṃ dadyādvāmahastena deśikaḥ

jalapūrvaṃ pradadyāttu paścādvai pariṣecanam/
pitṝṇāṃ saṃvibhāgena devadevaḥ prasīdati

devadevaprasādena sarvasidbikaraṃ bhavet/
balikāryaṃ pravakṣyāmi samāsādavadhāraya

baliñca pūrvataḥ kṛtvā paścādutsavamācaret/
carupātraṃ ca puṣpañca ghaṇṭāṃ vai dhūpapātrakam

balidāne viśeṣeṇa śaṅkhabherīravākulaiḥ/
garbhadvārādi pīṭhāntaṃ baliṃ dadyādvicakṣaṇaḥ

kumudādi gaṇānāṃ ca indrādīnāṃ pṛthak pṛthak/
muṣṭyā parimitai rdravyaiḥ trirdadyāt balikarmaṇi

pūrvamabhyarcya cārghyādyai rjalapūrvaṃ vinikṣepet/
ghaṇṭāśabdena saṃyuktaṃ balivādyena saṃyutam

caṇḍaṃ caiva pracaṇḍaṃ ca śaṅkhapadmanidhīṃstathā/
bhadraṃ caiva subhadraṃ ca tathā dhātṛvidhātṛkau

jayaṃ ca vijayaṃ caiva tattad‌dvā reṣu pūjayet/
śaṅkhaṃ cakraṃ gadāṃ padmaṃ musalaṃ khaṅgameva ca

śārṅgaṃ ca vanamālāṃ ca antarāvaraṇe sthitān/
kumudaṃ kumudākṣañca puṇ‍ḍarīkaṃ ca vāmanam

śaṅkukarṇaṃ sarvanetraṃ sumukhaṃ supratiṣṭhitam/
indramagniṃ yamaṃ caiva nirṛtiṃ varuṇaṃ tathā

vāyuṃ somaṃ tathaiśānaṃ tṛtīyāvaraṇe sthitam/
visveśvaraṃ ca digbhāge kṣetrapālabaliṃ dadet

pīṭhopari viśeṣeṇa sarvabhūtabaliṃ kṣipet/
evaṃ datvā vidhānena nityotsavamathācaret

balibimbaṃ samādāya yānamāroṣya deśikaḥ/
chatracāmarasaṃyuktaṃ bahūdīpasamanvitam

anekaiḥ parikarairyuktaṃ gītavādyasamanvitam/
ānayeddevadeveśaṃ prādakṣiṇyena mandiram

ekadhā vā dvidhā vāpi tridhā vāpi paribhramet/
balipīṭhaṃ paribhrāmya pūrvapārśve sthitiṃ caret

gītaṃ nṛttaṃ ca vādyaṃ ca śrāvayeddevadevakam/
gamayenmandiraṃ prājño maṇḍape sanniveśayet

pūjayecca nivedyānta marghyagandhādinā tathā/
arghyaṃ pādyaṃ tathācāmaṃ gandhaṃ puṣpaṃ ca dhūpakam

dīpaṃ nivedanañcaiva tāmbūlaṃ gītavādyakam/
svasthāne sanniveśyātha viṣvaksenaṃ prasādayet

arghyādidīpaparyantaṃ pūjayitvā vicakṣaṇaḥ/
nivedyasyaikapātraṃ tu viṣvaksenāya dāpayet

taccheṣaṃ devatāvṛndai rmuktamanyo na saṃspṛśet/
pradakṣiṇaṃ tataḥ kṛtvā praṇipatya janārdanam

svagṛhe saṃprabiśyātha anuyāgaṃ samācaret/
ācārye bhojanāddhīne devapūjā ca niṣpalā

yathācāgnimukhe bhuṅkte devakārimukhe hariḥ/
ācārye suprasanne tu devadevaḥ prasīdati

iti śrīpāñcarātre mahopaniṣadi aniruddhasaṃhitāyāṃ
agnikāryabalipradānavidhirnāma aṣṭādaśo'dhyāyaḥ
--------------------**************--------------------