Aniruddha Samhita · Chapter 17

atha saptadaśo'dhyāyaḥ
ārādhanavidhiṃ vakṣye avadhāraya sāṃpratam/
bhṛguḥ--
kairdravyaiḥ pūjayeddevamupacāraiśca kaiḥ prabho

śrībhagavān--
dīkṣitai ssādhakai ścaiva tathaiva paricārakaiḥ/
svādūdakaiśca puṣpaiśca gandhai rnānāvidhairapi

dhūpai rguggulamiśraiśca dīpai rvarttisamanvitaiḥ/
vastrai ścaivopavītaiśca mālyai rnānāvidhairapi

gītanṛttaiśca vādyaiśca stotraiścaiva pradakṣiṇaiḥ/
vāhanai ścāmaraiścaiva śaṅkhakāhalanādakaiḥ

mātrābhi stālavṛntaiśca snānaiśca kalaśodakaiḥ/
nīrājanai rdīpayuktai rardhyapādyādikai stathā

karpūraiścaiva tāmbūlaiḥ godānai śśāntikumbhakaiḥ/
bhakṣyai rbhojyaistathā peyai rlehyaiścopyai rmahādikaiḥ

japaiḥ praṇāmai rdānaiśca homaiścaiva viśeṣataḥ/
balidānairutsavaiśca bimbai rnānāvidhairapi

prāsādamaṇḍapaiścaiva parivārasamanvitaiḥ/
anantagaruḍādyaiśca utsavādyai rviśeṣataḥ

maṇḍalārādhanaiścaiva tathā vai kumbhapūjanaiḥ/
vahnisaṃpūjanai ścaiva māsapūjāsamanvitaiḥ

pavitrārohaṇenātha patrapuṣpotsavena ca/
damanārohaṇai ścaiva tathā caiva phalotsavaiḥ

prāyaścittavidhānaiśca tathā viṣṇvādipūjanaiḥ/
śrāvaṇyāmarcanai ścaiva paurṇamāsyadvayārcanaiḥ

śrījayantyutsavai ścaiva tathā kṛttikapūjanaiḥ/
āgrāyaṇai rviśeṣeṇa tathācādhyayanotsavaiḥ

vasantotsavai rviśeṣai stathā caiva ja tsavaiḥ?
tulasyārādhanaiścaiva tathā patraiśca campakaiḥ

etai ssaṃpūjayeddeva manyathā doṣakṛdbhavet/
tasmātsarvaprayatnena etai rdvavyaiḥ supūjayet

nityairnaimittikaiścaiva tathā kāmyai rmahotsavaiḥ/
etatkarma vinā cettu rājarāṣṭrabhayaṃ bhavet

mahaddoṣamavāpnoti sarvasaṃhārakāraṇam/
upacārānatho vakṣye samāsādavadhāraya

jñānayogaṃ karmayogaṃ dvividhaṃ tadupāyakam/
karmayogācca bhagavan jñānayogaṃ prajāyate

karmayogaviśeṣeṇa keśavārādhanaṃ param/
keśavārādhanaṃ caiva rājarāṣṭrasukhāvaham

sarvaduḥ khopaśamanaṃ sarvajñānaphalapradam/
bhagavad‌jñānaphaladaṃ viṣṇuprītikaraṃ śubham

devadevaprasādena sarvaduḥ khakṣayāvaham/
tasmātsarvaprayatnena keśavārādhanaṃ caret

pañcaśuddhividhaṃ kuryāt prathamaṃ munisattama/
bhūtaśuddhi rdravyaśuddhiḥ sthānaśuddhi stathaiva ca

pātraśuddhi stathā paścāt bimbaśuddhistu pañcamam/
snānamācamanaṃ caiva dehaśuddhi rviśiṣyate

satyena dhyānayogena manaśśuddhirihocyate/
satyaṃ bhūtahitaṃ proktaṃ dhyānaṃ vai viṣṇucintanam

mārjanālepane caiva sthānaśuddhi rvidhīyate/
dahanāpyāyane caiva kṣālanāt prokṣaṇādapi

dravyaśuddhiṃ vijānīyāt‌ sādhakaḥ paramārthavit/
pātrāṇi pūtatoyena śuddhaṃ prakṣālayettu vai

tintriṇī sikatāmbhobhiḥ bimbaśuddhiḥ prajāyate/
evaṃ śuddhiṃ kramātkṛtvā bhadrapīṭhaṃ tu vinyaset

vastre tu phalakevāpi nyasedardhyādi pātrakān/
arghyaṃ pādyaṃ tathācāmaṃ snānīyaṃ śuddhapātrakam

agnyādibrahmaparyantamādhāropari vinyaset/
arghye gandhaṃ phalaṃ caiva pādye dūrvāṃ tilaṃ tathā

elālavaṅgamācāme snānīye candanaṃ param/
śuddhatoye viśeṣeṇa tathaiva paripūjanam

śrīrarghyasya bhaveddebī vāgīśītvācamasya ca/
pādye ca pitaraṃ devaṃ snānīye varuṇaṃ tathā

suddhodake ca śānti ca pañca pātrasyadevatāḥ/
dahanāpyāyanecaiva saurabheyīpradarśanam

choṭikādarśanaṃ kuryāt gandhapuṣpādidhūpakaiḥ/
pūjayet sarvapātrāṇi pañcopaniṣadaiḥ kramāt

udabhāṇḍaṃ samabhyarcya gandhapuṣpai stathaiva ca/
dvārapūjāṃ tataḥ kṛryāt dvārasthāne viśeṣataḥ

ātmānamarcayitvā tu gurupaṃktiṃ prapūjayet/
guruṃ paraṃ guruṃ caiva tathā siddhagaṇa yajet

dvārapūjāṃ purā vipra prāsādapuruṣaṃ yajet/
pīṭhasthadevatān sarvān gandhapuṣpādibhi ryajet

dharmādicaturaścaiva adharmādīṃstathaiva ca/
dedādīṃścaturaścaiva yugādīṃścaturastathā

guṇatrayaṃ tadūrdhye tu tadūrdhve maṇḍalatrayam/
ādhāraṃ prathamaṃ kūrmaṃ kālāgniṃ tadanantaram

anantaṃ maṇikaṃ caiva bhadrapīṭhaṃ ca paṅkajam/
sthānamāpūjayet sarvān parivārāṃstathaiva ca

vāsudevādikāṃścaiva tathā śaṅkhādikān param/
kumudādi gaṇān sarvān tathā indrādipālakān

biṣvaksenagaṇān sarvāṃścāṇḍādikapurassaram/
etān saṃpūjayedarghyagandhapuṣpādidhūpakaiḥ

āvāhanaṃ tataḥ kuryāt mūlādvai karmakautukam/
anekairupacārairvā aṣṭottaraśataistu vā

catuṣṣaṣṭikramaṃ vāpi dvātriṃśakramameva ca/
pararthayajane bipra etannyūnaṃ na kārayet

ātmārthe ṣoḍaśaṃ proktaṃ dvārtriśatkramameva vā/
āvāhanaṃ namaskāraḥ pratyūtthānamanantaram

puṣpāñjaliḥ svāgatoktirāsanaṃ pādapīṭhikā/
ardhyaṃ pādyaṃ tathācāmaṃ tatkramo vakṣyate'dhunā

arghyadāne viśeṣeṇa ghaṇṭāṃ śaṅkhaṃ ninādayet/
āvāhane tu viprendra nigamaṃ vādyamācaret

śaṅkhadvayaṃ kāhalañca śṛṅganādaṃ tathaiva ca/
pādyadāne tu viprendra dvirdadyācca padāmbuje

vastreṇa mārjanaṃ kṛtvā candanālepanaṃ caret/
puṣpaṃ pṛthak pṛthak dadyāt sugandhaṃ pādyameva vā

pādyadāne tu śaṅkhaṃsyādācāmaṃ hīnaśaṅkhakam/
ācāmaṃ tu trirdadyāttu dvirunmṛjya ca saṃspṛśet

netraṃ nāsāṃ tathā śrotramaṃsayordvitayaṃ spṛśet/
arghyaṃ śirasi vinyasya pādyaṃ pādāmbujadvaye

ācāmaṃ hastake dadyāccakṣurādestu tatra tu/
unmṛjākaraṇe vipra tiryaṅmūrdhni parāmṛśet

gandhānulepanaṃ deyaṃ puṣpaṃ śirasi aṃsayoḥ/
muktapuṣpañca patraṃ ca birdadyād‌dve padāmbuje

dhūpadānaṃ madhuparkaṃ tāmbūlaṃ gandhabhāvitam/
mudgamātrapradānaṃ ca pādukaṃ snānaviṣṭaram

madhuparkapradāne tu ācāmaṃ kevalaṃ dadet/
āsaneṣu ca sarveṣu vastratāmbūladānake

pādaprakṣālane caiva bhojanānte viśeṣataḥ/
ācāmaṃ kārayennityaṃ vastramañjanalepanam

snānāsanaṃ nivedyātha pādaprakṣālanaṃ caret/
ācāmaṃ snānaśāṭīṃ ca punarācāmameva ca

dantadhāvanakaṃ caiva jihvānirlekhanaṃ tathā/
gaṇḍūṣācamanaṃ caiva vastramālyānulepanam

mukhavāsaṃ ca tāmbūlaṃ tathā darpaṇapūrvakam/
skandhaśāṭīṃ tathā tailaṃ sugandhaṃ kusumāvṛtam

netravastrāvabaddhaṃ ca apūpāni nivedayet/
vījayettālavṛntena abhyaṅgaṃ samyagācaret

apūpādinivedyānte ācāmaṃ nāgavallikāṃ/
kadalīmuṣṇokaṃ caiva mukhālepaṃ samācaret

candanaṃ mukhalepārthaṃ muṣṭikarpūrabhāvitam/
tailaṃ bahusugandhaṃ ca udakaṃ svādu śītalam

śuddhasnānaṃ tataḥ kṛtvā dhautavastraṃ pradāpayet/
ardhyaṃ ca rajanīsnānaṃ punaḥ snānaṃ tathaiva ca

dhautavastrapradānaṃ ca pātrāṇāṃ ca prakalpanam/
pūjanaṃ pūrvavat kuryādarghyadānaṃ samācaret

pādyamācamanīyaṃ ca gandhālepanamācaret/
pavitraṃ copavītaṃ ca uttarāsaṅgameva ca

puṣpamālā dhūpadānaṃ dīpaṃ vedaiśca pāṭhanam/
nānāvidhāni stotrāṇi gadyapadyagatāni ca

prākṛtaṃ maṅgalaṃcaiva paiśācaṃ maṅlaṃ tathā/
gītamaṅgalakaṃ caiva nṛttaṃ vādyaṃ tathaiva ca

sahasradhārayā snānaṃ kalaśasnānapūrbakam/
dvādaśaṃ navakaṃ vāpi yathā vittānusārataḥ

ghṛtaṃ pādyaṃ dadhi caiva arghyaṃ kṣīramataḥ param/
ācāmaṃ gandhatoyaṃ ca pañcagavyaṃ kaṣāyakam

yathā navaghaṭe proktaṃ dvādaśe vādhikaṃ śṛṇu/
ratnaṃ lohaṃ phalaṃ puṣpaṃ madhye ca caturaḥ kramāt

dravyāṇāmapyalābhe tu tadvargaikaṃ praśasyate/
nitye ca snapane caiva kautukenāṅkurārpaṇam

niśācūrṇaiḥ snapanaṃ neṣyate maṇṭapasthale
anrāntarayogena arghyadānaṃ samācaret

sahasradhārayā snāna manuvākatrayaṃ bhavet/
viṣṇusūktābhiṣekaṃ ca śrīsūktena śriyaṃ tathā

bhūsūktena bhuvaṃ proktaṃ snapane pratyṛcaṃ bhavet/
aṣṭākṣareṇa vā sarvaṃ dvādaśākṣareṇa bhavet

snānānte bhojanānte ca alaṅkārāsanāntake/
sāyāhne tu viśeṣeṇa nīrājanamathācaret

bhrāmayeddhaṭadīpena ekadhā vā dvidhā tridhā/
bahudīpasamāyuktaṃ nīrājanaparisthitam

dvayaṃ caturthaṃ ṣaṭkaṃ vā aṣṭakaṃ daśakaṃ tu vā
dvādaśaṃ ṣoḍaśaṃ vāpi viṃśaṃ triṃśamathāpi vā

ghaṭadīpaṃ viśeṣeṇa dīkṣitena pariṣkṛtam/
arcayedardhyapuṣpādyai rdevaṃ tuṣṭvā yathākramam

bhrāmayeddevadeveśe āpādatalamastakam/
dhautavastradvayenaiva śirogātraṃ pramārjayet

adharottaravastraṃ ca śiroveṣṭanamācaret/
gītavādyādisaṃyuktamalaṃkārāsanaṃ nayet

alaṃkārairalaṃ kṛtya āsane ca viśeṣataḥ/
....... ...... .... ... .samāviśet?

arghyādikalpanaṃ kuryāt pūrvavanmatravittama/
dvārārcanaṃ tataḥ kuryāt parivārārcanaṃ tathā

viṣvak‌senārcanaṃ caiva pīṭhadevārcanaṃ tathā/
ardhyādikaṃ tathā kuryāt pādyamācamanaṃ tathā

pratigrahatrayaṃ proktaṃ samārādhanakarmaṇi/
karpūrarajasāyuktaṃ śarīrasnānamācaret

mṛgamadaṃ śirasnānaṃ proktaṃ vai viṣṇunā purā/
gātrānulepanaṃ kuryāt tathāvai miśracandanaiḥ

bāhumūladbaye vipra kṛtrimālepanaṃ bhavet/
gandhai rnānāvidhaiḥ puṣpai śśirobeṣṭanamācaret

malladaṇḍasamākāraṃ karṇikākārameva ca/
śiromālyairalaṃkṛtya bāhumūle pralambayet

upavītaṃ pradadyāttu bhūṣaṇāni tathaiva ca/
lalāṭe tilakaṃ kṛtvā tathā cordhvaṃ ca puṇḍrakam

tāmbūlaṃ darpaṇaṃ caiva dhūpaṃ dīpaṃ tathaiva ca/
vāhanaṃ cāmaraṃ chatraṃ dhvajaṃ maṅgalakīrtanam

bedadhoṣaṃ purāṇañca śaṅkhakāhalanādanam/
gītaṃ nṛttaṃ tathā vādyaṃ mātrādānapurassaram

pradakṣiṇaṃ namaskāra stathā nīrājanaṃ bhavet/
bhojyāsane tu deveśaṃ tribhi rbhāgavataissaha

pādyamardhyaṃ tathācāmaṃ madhuparkamanantaram/
ācāmaṃ caiva tāmbūlaṃ tilagodānameva ca

aṅgaśāṭīṃ tathā dadyādarhaṇaṃ bhojanaṃ tathā/
pāyasaṃ caiva mudgānnaṃ śuddhānnaṃ pāyasairyutaṃ

pānakaṃ caiva pānīyaṃ gaṇḍūṣācamanaṃ tathā/
vastreṇa mārjanaṃ kṛtvā gandhālepanamācaret

pāñcarātrān samāhūya arghyādyaissaṃprapūjayet/
taṃtradānaṃ tataḥ kṛryānmadhuparkapurassaram

mātrādānaṃ tataḥ kṛtvā tāmbūlaṃ ca nivedayet/
akṣamālāṃ samabhyarcya japakarma samācaret

mahānasaṃ praviśyātha homakarma samācaret/
iti saṃkṣepataḥ proktaṃ samārādhanamuttamam

iti śrīpāñcarātre mahopaniṣadi aniruddhasaṃhitāyāṃ
samārādhanavidhirnāma saptadaśo'dhyāyaḥ
------------------***************---------------