Aniruddha Samhita · Chapter 16

atha ṣoḍaśo'dhyāyaḥ
śrībhagavān--
sadācāramatho vakṣye sāvadhānena tacchṛṇu/
dīkṣitasya viśeṣeṇa sadācāraṃ bravīmite

bāhme muhūrte cotthāya bhagavannāmakīrtanam/
stotreṇa toṣayedvidvān guruṃ saṃsmṛrtya sādhakaḥ

vāsudevāya devāya samagraguṇamūrtaye/
saṅkarṣaṇa namaste'stu viśvapāvanamūrtaye

aniruddha namaste'stu jagatkāraṇamūrtaye/
keśavāya namaste'stu tato nārayaṇāya te

mādhavāya namastubhyaṃ govindāya namo namaḥ/
viśvātmane namastubhyaṃ namostu madhusūdana

trivikrama namaste'stu vāmanāya namo namaḥ/
śrīdharāya namaste'stu hṛṣīkeśāya te namaḥ

namaste padmanābhāya namo dāmodarāya ca/
namaste matsyarūpāya namaste kūrmamūrtaye

vārāhāya namaste'stu nārasiṃhāya te namaḥ

vāmanāya namaste'stu namo rāmatrayāya ca/
govindāya namaste'stu hayagrīvāya te namaḥ

evaṃ stutvā vidhānena tīradeśaṃ samāśrayet/
darbhavastraṃ nidhāyātha jalāddūrādbahiścaret

karṇasthabrahmasūtraṃ ca divā codaṅmukhaścaret/
rātrau ceddakṣiṇāvaktraṃ* tṛṇaṃ bhūmau vinikṣipet

lepayeddakṣiṇaṃ hastaṃ kāṣṭhaparṇatṛṇādibhiḥ/
gṛhītvā vāmahastena śephāgraṃ bāhyataścaret

tīrthaṃ gatvā śucau deśe mṛdamādāya mantrataḥ/
uddhṛtābhirviśeṣeṇa mṛdbhiḥ prakṣālanaṃ caret

saptabhirgudadeśañca śiśnañca tribhirācaret/
antarāntarayogena hastaprakṣālanaṃ caret

pañcabhiḥ pādaśuddhiṃ ca ācāmaṃ tu samācaret/
triḥ pibet dvirmṛjeccaivaṃ daśāṅgāni ca saṃspṛśet

aṅgulībhi rviśeṣeṇa cakṣurādyaistu saṃspṛśet/
mṛdālepaṃ tataḥ kṛtvā mṛdā digbandhamācaret

viṣṇugāyatriyā caiva avagāhanamācaret/
ācāmaṃ tu tataḥ kṛtvā tīradeśaṃ samāviśet

āpohiṣṭhādibhi rmantraiḥ prokṣayetsvaśiropari/
udakāñjaliṃ tataḥ kṛtvā prādakṣiṇyaṃ samācaret

tarpayitvā viśeṣeṇa ācāmaṃ tu samācaret/
vastranniṣpīḍayetpaścāt sāvitrīntu tato japet

upasthānaṃ tataḥ kṛtvāsvagṛhaṃ saṃpraveśayet/
pādaprakṣālanaṃ kṛtvā ācāmetpūrvavadbudhaḥ

agniṃ samindhayetpaścāt nityahomamathācaret/
divākarodayātpūrvaṃ nityakarma samāpya ca

devālayaṃ praviśyātha prādakṣiṇyadvayaṃ caret/
pūrvavacchudbhirācāmaṃ kṛtvā pūjāṃ samācaret

dvāradeśe tu saṃprāpte ṣaḍaṅganyāsamācaret/
tālatrayaṃ tataḥ kṛtvā prabiśeddakṣaiṇāṅ‌ghriṇā

davasya dakṣiṇe pārśve āsane tu samāviśet/
udak‌pūrvavalane dakṣiṇābhimukhaścaret

paścimadvārake vipra tathā kuryādvicakṣaṇaḥ/
aṅganyāsaṃ tataḥ kṛtvā choṭikādarśanaṃ caret

prāṇāyāmatrayaṃ kṛtvā recakāditrayeṇa ca/
pañcopaniṣadai rmantrai saṃhṛtinyāsamācaret

jīvātmānaṃ samāroṣya parasmin brahmaṇi dhruve/
śoṣaṇāditrayaṃ kṛtvā antarastho vicakṣaṇaḥ

divyasthānaṃ yathā sthāpya sṛṣṭinyāsaṃ samācaret/
mātṛkānyasanaṃ kṛtvā tattvanyāsaṃ samācaret

mahābhūtādīnāṃ pañcatanmātrāṇāṃ tathaiva ca/
nyāsakrame vijānīyāt manobudhdyādipañcakam

mūlamantrākṣaranyāsaṃ ṣaḍaṅgaṃ dvādaśantu vā/
mūrdhādipādaparyantaṃ sṛṣṭinyāsaṃ prakīrtitam

nābhyādi hṛdayāntantu sthitinyāsaṃ prakīrtitam/
pādādi ca śirontantu saṃhṛtinyāsamucyate

brahmacārī gṛhasthaśaaca yatiścaiva yathākramam?
mūrdhā cakṣurmukhañcaiva nābhi guhyaṃ ca pādukam

pṛthivyādīnāṃ bhūtānāṃ sthānaṃ pādaṃ śiro'pi vā/
padmasthānantu cānyeṣāṃ sthānametadudāhṛtam

karanyāsaṃ tataḥ kṛtvā sṛṣṭisaṃhārapālanaiḥ/
dakṣiṇādi tu vāmāntaṃ sṛṣṭinyāsaṃ prakīrtitam

viparītena yogena viparītamudāhṛtam/
tarjanyādi kaniṣṭhāntaṃ sṛṣṭinyāsaṃ tu paścimam

karanyāsaṃ tu pūrvaṃ syāt dehanyāsaṃ tu paścimam/
evaṃ nyāsaṃ kramātkṛtvā mānasārādhanaṃ caret

dhyānārdhyagandhapuṣṣādyai rupacārai ssamarcayet/
mānasārādhānaṃ śreṣṭhaṃ bāhyapūjā'varā viduḥ

bāhyantu nāśamāyāti tasmānmānasikaṃ param/
ātmārthe tu tathā kuryāt parārthe saṃprapūjayet

sādhakaḥ sarvaśāstrajñaḥ nāviṣṇu rviṣṇumarcayet/
devo'haṃ bhāvayedvidvān pañcarātraviśāradaḥ

iti śrīpāñcarātre mahopaniṣadi aniruddhasaṃhitāyāṃ
sadācāravidhirnāma ṣoḍaśo'dhyāyaḥ
--------------*****************------------