Aniruddha Samhita · Chapter 14

atha curdaśo'dhyāyaḥ
śrībhagavān--
jalavāsamatho vakṣye samāsānmunipuṅgava/
karmārambhadinātpūrve tṛtīye pañcame'pi vā

ekāhamathavā kuryāt ekarātramathāpi vā/
yāmaṃ yāmārdhakaṃ vāpi jalāvāsaṃ samācaret

kautukaṃ pūrvataḥ kuryāt berasya sakalasya ca/
ācāryasya viśeṣeṇa ṛtvijānāṃ tathaiva ca

citrayoge viśeṣeṇa mahāberaistathaiva ca/
chāyādhivāsanaṃ kuryāt bimbābhāve tu darpaṇam

tadabhāve tu kūrcaṃ syāt alaṃkṛtya yathāvidhi/
gamayetparikaraissārdhaṃ tīradeśe viśeṣataḥ

nadyāṃ vāpitaṭāke vā nijharopānta eva ca/
tadabhāve viśeṣeṇa kaṭāhe maṇike'pi vā

jalamadhye prapāṃ kṛtvā tīradeśe tu maṇḍapam/
alaṃkṛtya vitānādyaiḥ kumbhamaṇḍalakuṇḍakaiḥ

maṇḍalaṃ svastikaṃ proktaṃ kuṇḍaṃ paṅkajameva ca/
dvārādiyajanaṃ kṛtvā kumbhamaṇḍalakaṃ yajet

kumbhairārādhanaṃ proktaṃ maṇḍale vāsudevakam/
agnau vai viṣṇumantreṇa padmabhūvartayettataḥ

evamabhyarcanaṃ kṛtvā jalamadhye niveśayet/
śayanaṃ kalpayitvaivaṃ brahmakumbhādikān nyaset

nyāsapūrvaṃ tataḥ kṛtvā mālānnena baliṃ kṣipet/
puṇyāhavācanaṃ pūrvaṃ rakṣāṃ kuryātsamantataḥ

nṛttagītādivādyaiśca vedaghoṣaiḥ praṇādayet/
purāṇaiḥ śāntimantraiśca jāgareṇa nayenniśām

gṛhārcāsthāpane kāle sadyovāsaṃ samācaret/
tataḥ prabhāte vimale tīramaṇḍapamānayet

svassthāne sanniveśyātha catuḥ sthānaṃ kramādyajet‌/
brahmakumbhādikān sarvān brahmamūrdhani secayet

kalaśaiḥ snapanaṃ kuryāt pañcaviṃśatibhiḥ kramāt/
tattanmantreṇa mantrajño mūrtimanveṇa vāhayet

śuddhasnānaṃ tataḥ kṛtvā puruṣenābhiṣecayet/
nīrājanaṃ tataḥ kṛtvā nivedyānnabaliṃ kṣipet

gamayedālaye devaṃ pūrbavatparikalpayet/
maṇḍapaṃ samalaṃkṛtya paścimābhimukhaṃ nyaset

cakrābjamaṇḍalaṃ kṛtvā darśanārthaṃ sakumbhakam/
nayanonmīlanārthāya sarvamāpādayedbudhaḥ

devasya purataḥ sthāne vrīhitaṇḍulapīṭhake/
ghṛtapātraṃ madhu nyasya aṣṭadhānyaṃ ca nikṣipet

gāñcaiva kanyakāñcaiva viniveśya tadantike/
svarṇasūcīṃcataṭṭiñca? rajatena tathaiva ca

paristīrya caturdikṣu vāsudevādikān yajet/
kumbhamaṇḍalakaṃ pūjyaṃ puṇyāhamapi vācayet

arghyādyairdevamabhyarcya ghṛtapātrādikān nyaset/
unmīlya dakṣiṇaṃ netraṃ ghṛtasiktaśalākayā

citraṃdeveti mantreṇa taccakṣuriti mantrataḥ/
darśayenmaṇḍalaṃ kumbhaṃ gāṃ ca kanyāṃ tathaiva ca

aṣṭadhānyāni sarvāṇi suvarṇapalameva ca/
nānāvidhāni puṣpāṇi phalāni vividhāni ca

etaddravyāṇi sarvāṇi ācāryāya pradāpayet/
ācchādanapaṭaścaiva kṣaumavastraṃ tathaiva ca

punarabhyarcayeddevaṃ śrāvayedvedaghoṣaṇam/
gītaṃ nṛttaṃ ca vādyaṃ ca purāṇaṃ drāviḍaṃ tathā

puṣpavṛṣṭimuṣassarve tuṣṭistu puruṣottamaḥ?/
snānāpīṭhe viśeṣeṇa modayeddeśikottamaḥ

kalaśasthāpanaṃ kṛtvā aṣṭottaraśataṃ param/
ekāśītighaṭaṃ vāpi catvāriṃśannavottaram

ghṛtamuṣṇodakañcaiva ratnaṃ caiva phalodakam/
lohajaṃmārjanañcaiva gandhañcaivākṣatodakam

yavodakaṃ tathācārghyaṃ pādyamācamanīyakam/
pañcagavyaṃ dadhikṣīraṃ madhu caiva kaṣāyakam

trividhe kalaśe brahman etaddravyaṃ vidhīyate/
pūrvādibrahmaparyantamuddhārakrama iṣyate

sūtravastrādibhirveṣṭya kūrcaca.....ṣānvitam/
tataścūrṇapaṭairaktaṃ mṛdālepaṃ samācaret

pañcabhūtārcane caiva sannidhatte hariḥ svayam/
pratiṣṭhāyāṃ viśeṣeṇa pañcabhūtārcanaṃ caret

mṛdālepaṃ jale snānaṃ dīpaṃ nīrājanaṃ tathā/
gandhālepañca secādi vādyavādanameva ca

mṛdālepakramaṃ vakṣye samāsādavadhāraya
nadītaṭākavalmīkaparvatakṣetramṛttikāḥ

gajasūkaragaṇḍasthaṃ govṛṣaśṛṅgasaṃsthitam/
tīrthasindhumṛdaṃ caiva etad‌dvādaśakaṃ smṛtam

tāmrapātre tathāgrāhyaṃ pṛthak‌pātre vinikṣiṣet/
śarāvaṃ kalaśaṃ vāpi kiñciduktamṛdāśritam/?

dhānyarāśau pratiṣṭhāpya koṣṭhadvādaśakaṃ bhavet/
puṇyāhaṃ vācayitvā tu mṛdānabhyarcya sādhakaḥ

dvādaśākṣaramantreṇa mṛdālepaṃ samācaret/
pūjayetsaṃpuṭīkṛtya upasnānasamanvitam

kalaśasnapanaṃ kuryāt dvādaśākṣaramantrataḥ/
viṣṇusūktena vā vipra puruṣasūktamathāpi vā

antarāntarayogena upasnānādinārcayet/
cūrṇasnānaṃ tataḥ kuryāt śuddhasnānaṃ tathaiva ca

sahasradhārayā snānaṃ kuryānnīrājanaṃ tathā/
ghaṭadīpadvādaśakaiḥ pratiṣṭhāpya puraḥ sthale

sūtramallakasaṃyuktaṃ vandivādasamanvitam/
nīrājayeddhaṭaṃ vipra pūjayetpūjayānvitam

nīrājanavidhānena agnipūjanamiṣyate/
agnipūjāvihīne tu pratiṣṭhā niṣphalā bhavet

mārutaprīṇanārthāya gandhasnānaṃ samācaret/
candanaṃ kuṅgumañcaiva karpūramagaruṃ tathā

uśīraṃ koṣṭhakañcaiva kacoraṃ rajanī tathā/
elālavaṅgakañcaiva takkolaṃ murameva ca

etāni dvādaśoktāni mantre'smin parameṣṭhinā/
pṛthak pātre niveśyārcya snāpayed‌dvādaśārṇakaiḥ

pūjayā saṃpuṭaṃkuryāt sādhakastantrapāragaḥ/
ākāśaprīṇanārthāya vedavādyādinā caret

caturvedādighoṣañca purāṇaṃ gītamaṅgalam/
gāthāpadyaṃ tathā miśraṃ pratyaṅgāgamanaṃ tathā

śrāvayetsannidhau vipra devadevasyā śārṅgiṇaḥ/
ardhyādyaiḥ pūjayeddevaṃ prītiśabdamanantaram

alaṅkṛtya yathānyāyaṃ śayanaṃ parikalpayet//
iti śrīpāñcarātre mahopaniṣadi aniruddhasaṃhitāyāṃ
jalādhivāso nāma caturdaśo'dhyāyaḥ
-----------************--------------