Aniruddha Samhita · Chapter 12

atha dvādaśo'dhyāyaḥ
śrībhagavān---
bimbamānamatho vakṣye śṛṇu guhyaṃ mahāmune/
āsanaṃ śayanaṃ vāpi yānārūḍhaṃ sthitantu vā

vāsudevādikaṃ vāpi keśavādīnathāpi vā/
matsyādīn vā biśeṣeṇa yajamāno gurustathā

yajamānodayādvāpi bhargadvāravaśāttu vā/
pātādhiṣṭhānamānaṃ vā hastamānamathāpi vā

tālamānamatho vāpi yadvā'ṅgulavaśāttu vā/
aṅgulaṃtritayaṃ proktaṃ mātraṃ madhyaṃ ca muṣṭikam

mānapramāṇamunmānaparimāṇopamānakam/
laṃbamānaṃ ṣaḍetāni mānāni kathayāmyaham

uttuṅgaṃ mānamityuktamunmānaṃ vistṛtaṃ bhavet/
nāmimānaṃ pramāṇaṃ syādantaraṃcopamānakaṃ?

sūtraṃ ca lambamānaṃ syādetai rmānaissamāyutam/
ṣaṇmānaṃ ca tathaivoktamanthathā doṣakṛdbhavet

citraṃ vāpyardhacitraṃ vā citrābhāsamathāpi vā/
citraṃ sarvāṅgadṛṣṭaṃ syādardhacitraṃtu sārdhakam

ābhāsaṃ paṭabhittisthaṃ trividhaṃ parikīrtitam/
ratnaṃ lohañca pāṣāṇaṃ dāru vā mṛnmayantu vā

ekaberaṃ bahuberaṃ svatantraṃ paratantrakam/
āśritaṃ yogakañcaiva bhogaṃ yogaṃ tathāparam

brahmasthāne sthitaṃ beramekaberamudāhṛtam/
divyabhāge sthitaṃ beraṃ bahuberamiti smṛtam

svatantraṃ grāmataḥ pūrvaṃ paratantraṃ tu paścimam/
ālaye bhittipārśve tu sthāpitaṃ cāśritaṃ bhavet

śrībhūmisāhitaṃ vāpi rahitaṃ yogakaṃ smṛtam/
śrīkaraṃ bhogamityuktaṃ yogaṃ vaśyakaraṃ bhavet

ayādibhissamopetaṃ daśatālena kārayet/
tālaṃ śatāṅgulīkṛtya caturviṃśottaraṃ bhavet

navatālapramāṇena devīkarmārcanādikam/
ṣaṭkautukasamopetaṃ bahuveramudāhṛtam

evaberaṃ tathā proktaṃ śilārceti dvayaṃ vinā/
karmārcāsnapanañcaiva sthāpane karmakautukam

ātmārthaṃ ca parārthaṃ ca dvividhaṃ sthāpanaṃ bhavet/
gṛheṣu sthāpitaṃ pūrvamālaye cāparaṃ bhavet

ātmārthaṃ gṛharakṣaṃsyādālayaṃ grāmarakṣakam/
mukhyasthāne sthito devo rājarāṣṭrasya rakṣakaḥ

anyonyasaṅgatausyāttu rāṣṭrakṣobho yathāruci/
karmārcācotsavārcā ca balyarcā ca tathaiva ca

snānatīrthobhayārcā ca svāpotthānārcayā saha/
pratimā ṣaḍvidhā proktā uttamā sadudāhṛtā

tribhiśca madhyamā proktā ekā ca caramā bhavet/
kṛṣṇarāghavasaṃyuktaṃ sihavārāhakena ca

saudarśana samāyuktaṃ lakṣmīberasamanvitaṃ/
ālaye sthāpitaṃ bimbaṃ dvibhujaṃ vā caturbhujam

yadvāṣṭabhujakaṃ vāpi yathāruci samācaret/
śayane dvibhujaṃ mukhyaṃ kṛṣṇo rāmo bhavettadā

vārāhavāmanau caiva tathā traivikramo bhavet/
lakṣmīnṛsiṃhaṃ vārāhaṃ lakṣmīnārāyaṇaṃ tu vā

śrīkaraṃ vijayaṃ proktaṃ nagaragrāmapattane/
evaṃ bimbagaṇānkuryāt pratiṣṭhāṃ samyagācaret

iti śrīpāñcarātre mahopaniṣadi aniruddhasaṃhitāyāṃ
beralakṣaṇannāma dvādaśo'dhyāyaḥ
-----------------***************----------------