Scripture Library

Ānandakanda · Chapter 1.22

1.22.1

Āk, 1, 22
<vandākakalpaḥ>
vandāko dvividhaḥ proktaḥ puruṣastrīvibhedataḥ /
kharjūrīpatravatpatraḥ puruṣaḥ sarvasiddhidaḥ

1.22.2

strīsaṃjñastu guṇairalpo vṛttapatraḥ pratāpavān /
vandākaḥ pādaparuhaḥ śikharī tarurohiṇī

1.22.3

vṛkṣādanī kāminī ca vṛkṣarugbandhabandhakam /
vandākastiktatuvaraḥ kaphapittaśramāpahaḥ

1.22.4

vaśyādisiddhido vṛṣyo viṣaghnaśca rasāyanam /
<vandākāharaṇavidhiḥ>
kṛtopavāsaḥ susnāto raktamālyānulepanaḥ

1.22.5

muktakeśāmbaro bhūtvā rātrau saṃyatamānasaḥ /
vṛkṣaṃ pradakṣiṇaṃ kṛtvā gandhapuṣpākṣatādibhiḥ

1.22.6

pūjādravyaiḥ samabhyarcya baliṃ dadhyodanaiḥ kiret /
cintāmaṇiṃ nṛsiṃhaṃ ca manumaṣṭottaraṃ śatam

1.22.7

japtvā khaḍgena saṃchidya vandākaṃ vidhināharet /
vandākānāṃ tu sarveṣāṃ vidhireṣa udāhṛtaḥ

1.22.8

aśvinyāṃ śuciraśvatthavandākaṃ vidhināhṛtam /
kṣīreṇa piṣṭamāloḍya pibedaśvabalo bhavet

1.22.9

tathaivāśvatthavandākamuparāge'rkacandrayoḥ /
nṛsiṃhamantraṃ prajapan khaḍgenācchidya cāharet

1.22.10

ghṛṣṭvāṃbhasā prakoṣṭheṇa liptvā gorocanānvitam /
vidhāya tilakaṃ paśyetsarvavaśyo bhaveddhruvam

1.22.11

nyagrodhasya tu vandākamaśvinyāṃ vidhināharet /
sūtreṇa bandhayeddhaste hyadṛśyo jāyate naraḥ

1.22.12

sarvavaśyaṃ bhavetkṣīraiḥ piṣṭvā pāne gadāñjayet /
aśvinyāṃ tu śirīṣasya vandākaṃ vidhināharet

1.22.13

sūtreṇa bandhayeddhaste vīryastambho bhaveddhruvam /
aśvinyāmāhareddhīmān palāśasya tu bandhakam

1.22.14

haste baddhvā spṛśedyastu sā nārī vaśagā bhavet /
aṅkolabandham aśvinyāṃ kare baddhvā jagatpriyaḥ

1.22.15

bharaṇyāṃ kuśavandākaṃ gṛhītvā śubhayogataḥ /
badhnīyāddakṣiṇe haste tenādṛśyo bhavennaraḥ

1.22.16

bharaṇyāṃ phalguvandākaṃ dhānyarāśau vinikṣipet /
tena vai dhānyavṛddhiḥ syānnātra kāryā vicāraṇā

1.22.17

bharaṇyāṃ badarīṇāṃ ca vandākaṃ vidhināharet /
bandhayeddakṣiṇe haste saṃlabhed īpsitaṃ phalam

1.22.18

kṛttikāyāṃ tu katakavandākaṃ vidhināharet /
vartimadhye kṣipettaṃ ca tena saṃgṛhya kajjalam

1.22.19

strīṇāmañjanamātreṇa patirvaśyo bhaveddhruvam /
kṛttikāyāṃ śucirbhūtvā jambūvandākam āharet

1.22.20

kṣīreṇa piṣṭaṃ tatkalkaṃ pītvā rogairvimucyate /
rohiṇyāṃ tintriṇīkasya vandākaṃ vidhināharet

1.22.21

baddhvā haste spṛśedyaṃ yaṃ sarvavaśyo bhavennaraḥ /
timirādiṣu śastaṃ tadasādhyaṃ ghṛtamañjanāt

1.22.22

kṣaudraghṛṣṭena tenaiva kṛtaṃ cakṣuṣyamañjanam /
bandhakam udumbarabhavaṃ rohiṇyāṃ gṛhya valayakaṃ kuryāt /
tadvalayopari vinihitabhāṇḍasthitamodakaṃ kṣayaṃ naiti

1.22.23

aśvatthasya tu vandākaṃ rohiṇyāṃ vidhināharet

1.22.24

gṛhe sthite ca vandāke nityaiśvaryaṃ prajāyate /
katakasya tu vandākaṃ rohiṇyāṃ vidhināharet

1.22.25

añjane netrayugale nidhiṃ paśyati niścitam /
tadeva bandhayeddhaste sarvavaśyo bhaveddhruvam

1.22.26

udumbarasya vandākaṃ rohiṇyāṃ vidhināharet /
haste baddhvā nihantyāśu jvaraṃ cāturthikaṃ priye

1.22.27

rohiṇyāṃ mātuluṅgasya bandhakaṃ tu samāharet /
dhārayeddakṣiṇe karṇe jagadvaśyakaraṃ param

1.22.28

rohiṇyāṃ bilvavandākaṃ kare baddhvā jagatpriyaḥ /
mṛgaśīrṣe śirīṣasya vandākaṃ samyagāhṛtam

1.22.29

haste baddhvā spṛśennārīṃ naraṃ vā vaśayeddhruvam /
mṛgaśīrṣe tu vandākaṃ tintriṇīvṛkṣasambhavam

1.22.30

kṣīreṇa piṣṭvā prapibedadṛśyo jāyate naraḥ /
taddadhnā yaḥ pibetprātaḥ sarvavyādhiharo bhavet

1.22.31

mahiṣītakrapiṣṭena tena sarvāṅgalepanam /
kṛtvā vahnigato yastu vahninā ca na dahyate

1.22.32

tintriṇīkasya vandākaṃ gṛhe yasya pratiṣṭhitam /
tasya corabhayaṃ nāsti kare dyūtajayo bhavet

1.22.33

udumbarasya vandākaṃ mṛgaśīrṣe samāharet /
haste baddhvā spṛśennārīṃ sā nārī vaśagā bhavet

1.22.34

strīṇāṃ haste tu badhnīyādannamadhye vinikṣipet /
jāyate cānnavṛddhistu nātra kāryā vicāraṇā

1.22.35

nyagrodhasya tu vandākaṃ mṛgaśīrṣe samāharet /
badhnīyāddakṣiṇe haste janavaśyo bhaveddhruvam

1.22.36

ādāya māṭarūṣasya vandākaṃ samudāhṛtam /
baddhvā haste janairdīvyan syāddyūteṣvaparājitaḥ

1.22.37

ārdrāyāṃ taumburaṃ grāhyaṃ vandākaṃ vidhinā haret /
kṣīreṇa prapibedyastu tasya syāllohamoṭanam

1.22.38

ārdrārke vā puṣyaravau vandākaṃ tumburorharet /
badhnīyāddakṣiṇe haste bāṇastambhaḥ prajāyate

1.22.39

punarvasorhṛtaṃ vaṃśavandākaṃ kṣīrapeṣitam /
pītvā strīpuruṣau vandhyau prasuvāte sutānbahūn

1.22.40

naktamālasya vandākamāharecca punarvasau /
kṣīreṇa piṣṭvā prapibed akhilāmayanāśanam

1.22.41

taccūrṇasya mātreṇa naśyanti graharākṣasāḥ /
puṣye bandhūkavandākaṃ gṛhītvā taṃ nidhāpayet

1.22.42

kṣetramadhye ripostatra sasyanāśaśca jāyate /
āśleṣāyāṃ karṇikāravandākaṃ samyagāhṛtam

1.22.43

baddhvā haste dṛḍhaṃ tena spṛśan vaśati tejanāt /
madhūkasya ca vandākamāśleṣāyāṃ samāharet

1.22.44

bandhayeddakṣiṇe haste vyāghrādibhayanāśanam /
maghāsu mucukundasya vandākaṃ vidhināhṛtam

1.22.45

nidhāpayeddhānyamadhye taddhānyaṃ tvakṣayaṃ bhavet /
vibhītakasya vandākaṃ phalgunyoḥ pūrvayorhṛtam

1.22.46

sthāpayeddhānyamadhyena tadakṣayyaṃ kṣaṇādbhavet /
phalgunyor anyayor haste'pyayameva vidhiḥ smṛtaḥ

1.22.47

śākavṛkṣasya vandākaṃ maghāyāṃ vidhināharet /
dhānyasaṃcayakṛddvāre dhānyavṛddhiśca jāyate

1.22.48

mauñjīvṛkṣasya vandākaṃ maghārke vidhināharet /
śirasā dhārayennityaṃ tasya śrīrvaśamāpnuyāt

1.22.49

palāśasya tu vandākaṃ hastarkṣe vidhināharet /
kare śirasi badhnīyādvyāghrādigrahahṛdbhavet

1.22.50

tindukasya ca vandākaṃ citrāyāmāhṛtaṃ tathā /
baddhvā haste samastānāṃ sadhvadho bhavati dviṣām

1.22.51

kuṭajasya tu vandākaṃ citrāyāṃ vidhināharet /
badhnīyāddakṣiṇe haste durlabhaṃ cepsitaṃ labhet

1.22.52

svātyāṃ likucavandākaṃ gṛhītvā yatra vastuni /
nidhāpayati tatsarvamakṣayaṃ nātra saṃśayaḥ

1.22.53

babbūlabandhakaṃ svātyāṃ badaryāstvanurādhake /
badhnanyo dhārayeddhaste tatspṛṣṭā strī vaśā bhavet

1.22.54

āhṛtya dhātrīvandākaṃ viśākhāyāṃ yathāvidhi /
śuktakārasya bhavane viruddhasya nidhāpayet

1.22.55

sarvaṃ madyamapeyaṃ syānmokṣastasminsamuddhṛte /
anurādhāsu vidhinā aindrīvandākamāhṛtam

1.22.56

dhānyamadhye vinikṣiptaṃ dhānyamakṣayatāṃ nayet /
jyeṣṭhāyām āmravandākaṃ hṛtvā veśyāgṛhe khanet

1.22.57

sā durbhagā bhavetsatyamuddhṛte mokṣa ucyate /
mūle khadiravandākaṃ gṛhītvā vidhipūrvakam

1.22.58

baddhvā haste naraḥ kṣipraṃ durbhagaḥ subhago bhavet /
tadeva piṣṭaṃ kṣīreṇa pītaṃ kuṣṭhādināśanam

1.22.59

mūlārke goṭṭikāyāśca vandākaṃ vidhināharet /
dakṣiṇe bandhayeddhaste strīvaśyaṃ bhavati dhruvam

1.22.60

tadeva śirasā dhāryaṃ sarvasiddhirbhaved dhruvam /
karavīrasya vandākaṃ pūrvāṣāḍhāsu sādhitam

1.22.61

dhārayecchirasā yuddhe sa bhavedaparājitaḥ /
pūrvāṣāḍhāsu vandākaṃ badarīvṛkṣasambhavam

1.22.62

pibetkṣīreṇa yā vandhyā sā bahūṃśca sutāṃllabhet /
kuravasya tu vandākaṃ pūrvāṣāḍhārkavārake

1.22.63

bandhayeddakṣiṇe haste hyadṛśyo jāyate naraḥ /
uttarāṣāḍhanakṣatre grāhyaṃ mandārabandhakam

1.22.64

palāśabandhakaṃ vātha kare baddhvā vaśaṃkaram /
śravaṇe citrakodbhūtaṃ vandākaṃ prāpyate na tu

1.22.65

kaṅkuṇītailaghṛṣṭena tāmrapatraṃ ca lepayet /
puṭapākavidhānena tatsvarṇaṃ bhavati dhruvam

1.22.66

eraṇḍasya tu vandākaṃ śravaṇārke samāharet /
bandhayeddakṣiṇe haste sadā dyūtajayo bhavet

1.22.67

dhaniṣṭhāyāṃ tu badarīvandākaṃ vidhināhṛtam /
baddhvā kare spṛśedyaṃ yaṃ sa sa dāso bhaveddhruvam

1.22.68

hṛtaṃ punnāgavandākaṃ vāruṇeṣu yathāvidhi /
kṣīreṇa piṣṭvā prapibanmahānāgabalo bhavet

1.22.69

naktamālasya vandākaṃ maghārke vidhināharet /
vidhinā dhārayedbāhau piśācānāṃ ca darśanam

1.22.70

tintriṇīkasya vandākaṃ punnarkṣe vidhināharet /
bandhayeddakṣiṇe haste nityaṃ dyūtajayo bhavet

1.22.71

punnarkṣe vaṃśavandākamadṛśyo jāyate kare /
śirīṣasya tu vandākamuttare vidhināharet

1.22.72

kare śirasi badhnīyādvyāghrādigrahahṛdbhavet /
maghāyāṃ sthāpayetkṣetre vandākaṃ madhukodbhavam

1.22.73

pakṣiṇāṃ mūṣikānāṃ ca jāyate tuṇḍabandhanam /
palāśasya tu vandākaṃ hastarkṣe vidhināharet

1.22.74

liṅgalepaṃ prakurvīta vīryastambho bhaveddhruvam /
kṣīreṇāloḍya vallīkaṃ kṣaudraṃ piṣṭvā niṣecayet

1.22.75

vaṅgaṃ tu saptadhā devi tadvaṅgaṃ rajataṃ bhavet /
palāśasya tu vandākaṃ hastarkṣe vidhināharet

1.22.76

kṣīreṇa prapibedyastu hyadṛśyo jāyate naraḥ /
tindukasya ca vandākaṃ citrāyāmāhṛtaṃ tathā

1.22.77

baddhvā haste samastānāmavadhyo bhavati dviṣām /
harītakyāstu vandākaṃ pūrvabhādrapadāhṛtam

1.22.78

kṣīreṇa kalkitaṃ pītvā caredvararuceḥ samaḥ /
uttarāsvarkavandākaṃ hṛtaṃ bhādrapadāsu tat

1.22.79

pralepādyaiḥ paraṃ hanyādviṣaṃ sthāvarajaṅgamam /
revatyāṃ bodhivandākalatayā kṛtakautukā

1.22.80

vandhyāpi labhate garbhaṃ pītvā gopayasā ca tat /
revatyāṃ vaṭavandākaṃ valmīkamadhugharṣitam

1.22.81

akṣidoṣeṣvatiśreṣṭhamakṣarāvaraṇādiṣu /
revatyāṃ vaṭavandākaṃ gṛhītvā dhārayedbhuje

1.22.82

mahānāgabalopeto mahāgaṇaśca jāyate /
samuddhṛtaṃ viśākhāyāṃ vandākaṃ rājavṛkṣakam

1.22.83

nivārayati gehasthaṃ vaiśvānarabhayaṃ gṛhe /
rohiṇyāṃ vaṭavandākaṃ kaṭisthaṃ vīryavardhanam

1.22.84

aśvatthabhavavandākaṃ revatyāṃ garbhadaṃ smṛtam /
viṣavṛkṣotthavandākaṃ pūrvāṣāḍhoddhṛtaṃ yadi

1.22.85

praliptaṃ tanute bhūtapiśācādiprabhāṣaṇam /
cullikāntargataṃ kuryātsabhaktāṃ pānasantatim

1.22.86

dyūte jāmbavavandākaṃ revatyāṃ jayakārakam /
kuryāt kuravavandākaṃ hastasthaṃ bāṇavāraṇam

1.22.87

madhūkavṛkṣavandākaṃ dhānyasthaṃ dhānyavṛddhidam /
palāśataruvandākaṃ vākpradaṃ kṣīrasevitam

1.22.88

veśyāyāṃ nimbavandākaṃ gṛhāntarnihitaṃ yadi /
vaśyaṃ karoti sāścaryam ā janmamaraṇāntikam

Original text: Ānandakanda · Edition: S.V. Radhakrishna Sastri, Srirangam: Sri Vilasam Press, 1952. · Data entry Oliver Hellwig · GRETIL (Göttingen) · CC BY-NC-SA 4.0