Ānandakanda · Chapter 1.21

Āk, 1, 21
<yogasiddhidakuṭīnirmāṇavidhiḥ>
śrībhairavī /
kuṭī proktā tvayā pūrvaṃ kathaṃ kāryā ca kīdṛśī /
tatra kālaṃ kiyacchaṃbho vastavyaṃ brūhi me prabho

śrībhairavaḥ /
vakṣyāmi tāṃ kuṭīṃ samyak śṛṇu tripurasundari /
medinīm unnatīkṛtya punastāṃ suhṛdaṃ priye

staṃbhāṃśca kramaśaḥ ṣaṭ ṣaṭ paṅktiśaḥ sthāpayedṛjūn /
tulā upari cāropya dārūṇi sudṛḍhāni ca

sthāpayediṣṭakāḥ paścātsudhayā sāndramālipet /
parito valabhiṃ kṛtvā bhittiṃ trivalayāṃ śubhām

kuryātkuṭīṃ ca tanmadhye tṛtīyāvaraṇaiḥ punaḥ /
nikhaneccaturaśraṃ ca daśaprādeśamātrakam

pañcaprādeśamātre ca tvadhonimnaṃ tathordhvataḥ /
evaṃ daśavitastyābhir acintyāṃ tāṃ manoharām

prāgdvāraṃ bāhyavalaye dvitīye valaye śive /
yāmyadvāraṃ tṛtīye tu pratyagdvāraṃ vidhīyate

dvārāṇāṃ ca pramāṇaṃ hi vitastidvayamucyate /
sakavāṭaṃ pratidvāramacchidraṃ cārgalānvitam

sudhāpralepitaṃ kuryādbhittiṃ ślakṣṇataraṃ sthalam /
dakṣiṇe cottare caiva kuṭyantarvedikādvayam

sārdhatrayaṃ vitastīnāṃ viśālaṃ cāyataṃ daśa /
prādeśamātram utsedhaṃ madhyaṃ prādeśikatrayam

tatra gomayasambhūtaṃ bhasma vastreṇa gālitam /
pūrayecca kuṭībhittau citraṃ bahu suvistaram

bhairavaṃ kālameghābhaṃ jvaladūrdhvaśiroruham /
phālākṣaṃ vakradaṃṣṭraṃ ca nāgakuṇḍalamaṇḍitam

nāgayajñopavītaṃ ca kiṅkiṇīmuṇḍamālinam /
digambaraṃ tu kākoṭībhūṣitāṅghriśiroruham

hārakeyūrakaṭakamudrikādivibhūṣitam /
daśahastaṃ ca ḍamarumaṅkuśaṃ khaḍgaśūlakam

varadaṃ savyahastābjair nāgaṃ pāśaṃ ca ghaṇṭikām /
madhupatraṃ bhayaharaṃ bibhrāṇaṃ vāmabāhubhiḥ

kṛṣṇāṅgarāgamālāḍhyaṃ sarvavyādhivināśanam /
vyādhibhūtāhiśatrughnaṃ kṣvelādibhayanāśanam

tato mṛtyuñjayaṃ śāntaṃ vaṭukaṃ vilikhetpriye /
pāradenduhimaśvetaṃ bālaṃ dvibhujaśobhitam

kiṅkiṇīmālayā baddhakarṇanūpuraśobhitam /
bālaṃ kuṇḍalasacchobhaṃ trinetraṃ nagnarūpiṇam

śvetamālyānulepaṃ ca pūrṇapātraṃ ca vāmataḥ /
daṇḍaṃ dakṣiṇahastena dadhānaṃ mṛtyunāśanam

māyābījaṃ ca vaṭukaṃ hyenaṃ prathamamuccaret /
āpaduddhāraṇāyeti likhetpañcākṣaradvayam

vaṭukāyeti māyāṃ ca vaṭukasya manuḥ smṛtaḥ /
mūrtidvayorayaṃ mantraḥ kathitaḥ suravandite

mantrasyāsya ca yadyantraṃ tadyantraṃ tatra saṃlikhet /
ramāṃ ca bhuvaneśīṃ ca kāmaṃ cintāmaṇiṃ kramāt

karṇikāyāṃ likhetpūrvaṃ vaṭukāyeti vīpsitam /
aṣṭapatre likheccheṣāṇyakṣarāṇyaṣṭapatrake

bahiḥ ṣoḍaśapatreṣu vilikhetṣoḍaśa svarān /
dvātriṃśaddalake kādisāntadvātriṃśadakṣarān

anye dale halakṣāṃśca vilikhedbhūpuraṃ bahiḥ /
āpaduddhāraṇaṃ yantramapamṛtyunivāraṇam

rakṣākaraṃ grahārtānāṃ sarveṣāṃ prāṇināmapi /
strīvaśyaṃ rājavaśyaṃ ca puṃvaśyaṃ paśuvaśyakam

nānāsiddhipradaṃ nityaṃ sarvarogaviṣāpaham /
hārakeyūraruciraṃ kāntyā viśvavimohanam

mahāmṛtyuñjayaṃ devaṃ bhāvayenmṛtyujidbhavet /
evaṃ dvitīyavargasya tṛtīyaṃ pañcamena ca

svareṇa bindunā yuktaṃ sontaṃ sādhyapadaṃ tataḥ /
rakṣaśabdayugaṃ paścātpūrvaṃ bījatrayaṃ punaḥ

pratilomaṃ samuccārya mantraṃ mṛtyuñjayaṃ japet /
tāraṃ madhye sasādhyākhyaṃ digdale bhaṃ samālikhet

āgneyādidaleṣvantyamakṣaraṃ kramaśo likhet /
bāhye bhūpuramālikhya dikṣu sāndraṃ samālikhet

catuṣkoṇe ṭhakāraṃ ca yantraṃ mṛtyuñjayātmakam /
apamṛtyujvaravyādhikṣvelamohavināśanam

tatra cintāmaṇiṃ devaṃ cintitārthapradaṃ likhet /
nīlapravālaruciraṃ triṇetraṃ rucirānanam

pāśāruṇotpalaṃ vāme dakṣe śūlakapālakau /
dadhānam indumakuṭaṃ dhyāyedardhāmbikeśvaram

vahniprathamavargādiṣamarephāḥ kramāttataḥ /
prāṇasadyāntasahitaḥ ṣaṣṭhasvarasabindukaḥ

idaṃ cintāmaṇer mantraṃ cintitārthapradaṃ śubham /
ṣoḍaśasvarasaṃvītaṃ cintāmaṇimabhīṣṭadam

ṭhakārāveṣṭitaṃ kuryājjvarāpasmṛtimṛtyuham /
tataśca śāradādevīm ālikhet siddhidāyinīm

śaṅkhakundendudhavalāṃ makuṭendukalādharām /
sudhākumbhaṃ varākṣasraksaṃvinmudrāṃ karāṃbujaiḥ

bibhrāṇāṃ śvetavasanāṃ mauktikābharaṇojjvalām /
vāgbījaṃ bhuvaneśīṃ ca vadavākyadvayaṃ tataḥ

vāgvādinīṃ sasambuddhim agnipatnīṃ samuccaret /
eṣa śrīmātṛkāmantraḥ proktaḥ sārasvatapradaḥ

ādibījadvayaṃ hitvā śeṣaṃ pūrvavad uccaret /
daśārṇaśāradāmantro vāgvilāsapradāyakaḥ

viyadvarṇasukāraṃ ca sadyāntaṃ savisargakam /
karṇikāyāṃ likhetpūrvaṃ kiñjalkeṣu svarānapi

aṣṭacchadeṣv aṣṭavargāny aśahādyaiḥ paraistribhiḥ /
kādyaiśca pañcabhirvarṇairaṣṭavargāḥ samīritāḥ

likhedbhūpurakoṇeṣu ṭhakārāndikṣu vinyaset /
idaṃ hi mātṛkāyantraṃ viṣamṛtyugadāpaham

aghoraṃ vilikheddevi nīlajīmūtasannibham /
krūradaṃṣṭraṃ triṇetraṃ ca nāgendrāṣṭavibhūṣitam

raktāṅgarāgavasanaṃ raktamālāvirājitam /
paraśvathuṃ ca ḍamaruṃ khaḍgaṃ kheṭam iṣuṃ dhanuḥ

triśūlaṃ pūrṇapātraṃ ca bibhrāṇaṃ cāṣṭabāhubhiḥ /
bhuvaneśīṃ sphuradvandvaṃ tataḥ prasphuravīpsitam

ghoraṃ tato'ghorataraṃ tanurūpaṃ caṭadvayam /
prakaṭadviguṇaṃ caiva kahaśabdayugaṃ tataḥ

vamaśabdadvayaṃ devi bandhaśabdaṃ ca vīpsitam /
ghātayadvitayaṃ devi kavacaṃ ca phaḍantakam

ekottaro'yaṃ pañcāśadarṇo 'ghoraḥ smṛto manuḥ /
vaśyārthaṃ taptahemābhaṃ pūrvoktākṛtisaṃyutam

muktau mṛtyuñjayārthe tu śvetaṃ pūrvoktavigraham /
sarvārthasiddhidaṃ śāntamaghorāstraṃ likhetpriye

māyābījaṃ sasādhyaṃ syānmadhye ca svarasaṃyutam /
tadbahiḥkesareṣvevaṃ vilikhedaṣṭavargakam

tatastvaṣṭadale mantravarṇānguṇamitān likhet /
agraśeṣeṣu tadvat tatṣaṭkoṇe kavacāstrakau

tadbahirbhūpuraṃ lekhyam enadāghorayantrakam /
sphuradvayāvṛtaṃ madhye śaktibījaṃ likhettataḥ

ṣaṭkoṇe prasphurayugaṃ tataścāṣṭadale kramāt /
ṣaḍbhiścaturbhirvedaiśca rasairvastraiśca gopadaiḥ

ṛtubhiḥ śiṣṭamantrārṇair amībhir vilikhettataḥ /
ṣaṭkoṇe vahnicāstrābhyām uddhṛtaṃ vītakoṇakam

bhūpureṇāvṛtaṃ yantramaghoraṃ vilikhetpriye /
vyālāricorakṣudrāpasmārabhūtagrahāpaham

atho mahāgaṇapatiṃ likhedvidrumasannibham /
koṭīracandraśakalaṃ gajāsyaṃ locanatrayam

tundilaṃ raktavasanaṃ raktamālānulepanam /
daśadordaṇḍasubhagaṃ vāmorusthitayoṣitam

hārakeyūrakaṭakamudrikākuṇḍalojjvalam /
phalapūraṃ gadām ikṣukodaṇḍaṃ ca triśūlakam

cakraṃ sarasijaṃ pāśamutpalaṃ śālimañjarīm /
svadantatuṇḍayā ratnakalaśaṃ daśabhiḥ karaiḥ

bibhrāṇaṃ padmakarayā vāmorusthitayā śriyā /
āliṅgitaṃ bhaktalokacintitārthasuradrumam

praṇavaṃ kamalāṃ māyāṃ kāmarājaṃ vasuṃdharām /
kramādgaṇapaterbījaṃ mahāgaṇapatiṃ tataḥ

caturthyantaṃ sasaṃbuddhiṃ varaṃ ca varadaṃ tathā /
tataḥ sarvajanaṃ me ca vaśamānaya śabdakam

agnipatnīṃ samālikhya cāṣṭāviṃśativarṇakam /
mantraṃ mahāgaṇapater mṛtyudāridryanāśanam

trikoṇe bījamālikhya satāre ca gaṇeśituḥ /
dikṣu śrīśaktimadanabhūbījāni bahirlikhet

ṣaṭkoṇe bījaṣaṭkaṃ ca tatsaṃdhiṣvaṅgamantrakam /
tato'ṣṭadalamadhyeṣu mantrāṇi gaṇaśo likhet

antyākṣare cāntyadale mātṛkāmanulomataḥ /
lekhe ca pratilomenāṅkuśapāśāvṛtaṃ tataḥ

bhūmandireṇa subhagaṃ yantraṃ gaṇapateḥ śubham /
gajāntaṃ śrīpadaṃ divyamāyuṣyārogyavardhanam

etāni yantrajālāni kuṭyantardevatā likhet /
kuṭībhittibahirbhāge bhairavaṃ varṇamālikhet

asitāṅgaṃ ruruṃ caṇḍaṃ krodhamunmattabhairavam /
kapālinaṃ bhīṣaṇaṃ ca saṃhāraṃ bhairavaṃ kramāt

dvitīyāvaraṇasyāntar bhittāvekādaśa kramāt /
rudrāṃstrilocanāṃścandrakalājūṭajaṭān likhet

tadbāhye nava nāthāṃśca nava siddhāṃśca ṣoḍaśa /
sanatkumārasanakasanandādīn likhettataḥ

tṛtīyāvaraṇasyāntar bhittau brāhmyādimātaraḥ /
catuḥṣaṣṭiśca yoginyo lekhanīyā yathāvidhi

tadbhittibāhye devendramukhā dikpatayaḥ kramāt /
grahāśca candrasūryādyā aśvinyādyāśca tārakāḥ

meṣādyā rāśayo lekhyāḥ sālaṅkārāśca sāyudhāḥ /
kuṭīdvāravipārśve ca gaṇeśaṃ bhairavaṃ likhet

dvitīyāvaraṇadvārapārśve dvau śaṅkhapadmakau /
garutmantaṃ hanūmantaṃ tṛtīyāvaraṇasya ca

dvārasya pārśvayordevi vilikhedbhayabhañjanau /
yasmindeśe kuṭī divyā kalpitā yogisattamaiḥ

deśo dhanyataraḥ ślāghyaḥ puṇyakṣetraṃ ca pāvanam /
tatratyāśca prajā dhanyāḥ sphītārthāḥ puṇyakarmiṇaḥ

rāṣṭraṃ subhikṣam ārogyam anāmayasukhāvaham /
ītihīnaṃ kālavṛṣṭisahitaṃ dhānyasaṅkulam

taskaropadravavyāghrasarpādibhayavarjitam /
tatra tīrthāni sarvāṇi gaṅgādīni vasanti ca

indrādayo'pi vibudhāḥ sūryacandrādayo grahāḥ /
yoginyo bhairavāḥ siddhā gaṇeśaguhamātaraḥ

tatrasthasya mahīpasya jayārthāvāptirāyuṣaḥ /
sambhaveccakravartitvaṃ punarnityotsavojjvalam

vandhyānāṃ putrasampattiḥ kuṭīsaṃdarśanādbhavet /
kuṣṭhāpasmārabhūtādimahāvyādhivināśanam

kuṭīgatā bhaveyuste ye sevante rasāyanam /
siddhiṃ yānti sukhenaiva devānāmapi durlabhām

<amarīkalpaḥ>
devi citraṃ pravakṣyāmi divyaṃ guhyatamaṃ śivam /
amarīkalpamanaghaṃ sulabhaṃ nijadehajam

aṇimādyaṣṭakaiśvaryadehalohādisiddhidam /
vamanādiviśuddhāṅgo lavaṇāmlavivarjitaḥ

kuṭīgatastu deveśi śivatoyamudāradhīḥ /
sthūlasya katakasyaiva dāruṇā pānapātrakam

kuryācca triphalāṃ piṣṭvā lepayeccaṣakāntare /
karṣaṃ śivāmbunā rātrau pātraṃ cādhomukhaṃ priye

sthāpayitvā punaḥ prātarādyantaṃ prasravaṃ tyajet /
madhyadhārāśca tatpātre kṣipettattriphalāṃ tataḥ

loḍayedamarīyuktaṃ pibetprāgānanaḥ sadā /
iṣṭadevāngurūnvṛddhān natvārcitagaṇeśvaraḥ

mitāhāro yuktaceṣṭo vātātapavivarjitaḥ /
ekamaṇḍalamātreṇa bāhyāntaḥ śucibhāg bhavet

maṇḍalena dvitīyena sarvakuṣṭhavināśanam /
maṇḍalena tṛtīyena caturvidhaviṣāpaham

maṇḍalena caturthena nālikerāmbuvad bhavet /
ātmatoyaṃ pañcamena maladaurgandhyanāśanam

ṣaṣṭhamaṇḍalayogena dehadaurgandhyanāśanam /
saptamaṇḍalayogena bhavedindriyapāṭavam

tato'ṣṭame maṇḍale tu rajanīcūrṇakarṣayuk /
seveta śivatoyaṃ ca yāvaddviḥ saptamaṇḍalam

valīpalitahīnaḥ syānmahāviṣabhayojjhitaḥ /
maṇḍale pañcadaśake karṣāṃśau śṛṅgagandhakau

śivatoyena sammiśraṃ prapibedekaviṃśatim /
maṇḍalaṃ ca tadante syātsiddhibhāgdehalohayoḥ

dvāviṃśanmaṇḍale devi cābhrakaṃ varayā yutam /
evaṃ bhajedyamī yāvadaṣṭāviṃśatimaṇḍalam

mattahastibalopeto gṛdhradṛṣṭiranāmayaḥ /
ekonatriṃśati prāpte maṇḍale varayā yutām

sakāntacūrṇavimalāṃ godhāmapi pibet priye /
pañcatriṃśanmaṇḍalāntaṃ vajrakāyo bhavennaraḥ

ṣaṭtriṃśanmaṇḍalādi svarṇadhātrīrajo'nvitam /
ātmagodhānvitaṃ peyaṃ tattu yāvaddvyadhikam

catvāriṃśanmaṇḍalāntaṃ saśarīraḥ khago bhavet /
tricatvāriṃśanmaṇḍale tu prāpte pāradasaṃyutam

varāyutaṃ pibed ūnapañcāśanmaṇḍalāvadhiḥ /
aṇimādiguṇopeto vajrakāyaśca khecaraḥ

siddhair yukto nirātaṅko nirapāyo nirañjanaḥ /
yadṛcchayā sarvaloke viharatyeva sarvadā

ārabhya prathamaṃ devi maṇḍalānnityamācaret /
ātmatoyena dhuttūrarasena pariloḍayet

bhasma tenaiva sarvāṅgamasakṛtparimardayet /
anyakālasamāyātam ātmatoyaṃ viśeṣataḥ

mūrdhni nāsāpuṭe karṇe dṛśi pādakaradvaye /
śīlayetsatataṃ devi śuddhadeho bhavennaraḥ

kadācidapyātmagodhāṃ bhūmau na visṛjetpriye /
amarīsevinaḥ puṃsaḥ śivatoyena jāyate

sarvalohaṃ ca kanakaṃ divyaṃ manujadurlabham /
vijayāsahitāṃ godhāṃ prativāsaramāpibet