આનન્દકન્દ · અધ્યાય 1.21

આક્, 1, 21
<યોગસિદ્ધિદકુટીનિર્માણવિધિઃ>
શ્રીભૈરવી ।
કુટી પ્રોક્તા ત્વયા પૂર્વં કથં કાર્યા ચ કીદૃશી ।
તત્ર કાલં કિયચ્છંભો વસ્તવ્યં બ્રૂહિ મે પ્રભો

શ્રીભૈરવઃ ।
વક્ષ્યામિ તાં કુટીં સમ્યક્ શૃણુ ત્રિપુરસુન્દરિ ।
મેદિનીમ્ ઉન્નતીકૃત્ય પુનસ્તાં સુહૃદં પ્રિયે

સ્તંભાંશ્ચ ક્રમશઃ ષટ્ ષટ્ પઙ્ક્તિશઃ સ્થાપયેદૃજૂન્ ।
તુલા ઉપરિ ચારોપ્ય દારૂણિ સુદૃઢાનિ ચ

સ્થાપયેદિષ્ટકાઃ પશ્ચાત્સુધયા સાન્દ્રમાલિપેત્ ।
પરિતો વલભિં કૃત્વા ભિત્તિં ત્રિવલયાં શુભામ્

કુર્યાત્કુટીં ચ તન્મધ્યે તૃતીયાવરણૈઃ પુનઃ ।
નિખનેચ્ચતુરશ્રં ચ દશપ્રાદેશમાત્રકમ્

પઞ્ચપ્રાદેશમાત્રે ચ ત્વધોનિમ્નં તથોર્ધ્વતઃ ।
એવં દશવિતસ્ત્યાભિર્ અચિન્ત્યાં તાં મનોહરામ્

પ્રાગ્દ્વારં બાહ્યવલયે દ્વિતીયે વલયે શિવે ।
યામ્યદ્વારં તૃતીયે તુ પ્રત્યગ્દ્વારં વિધીયતે

દ્વારાણાં ચ પ્રમાણં હિ વિતસ્તિદ્વયમુચ્યતે ।
સકવાટં પ્રતિદ્વારમચ્છિદ્રં ચાર્ગલાન્વિતમ્

સુધાપ્રલેપિતં કુર્યાદ્ભિત્તિં શ્લક્ષ્ણતરં સ્થલમ્ ।
દક્ષિણે ચોત્તરે ચૈવ કુટ્યન્તર્વેદિકાદ્વયમ્

સાર્ધત્રયં વિતસ્તીનાં વિશાલં ચાયતં દશ ।
પ્રાદેશમાત્રમ્ ઉત્સેધં મધ્યં પ્રાદેશિકત્રયમ્

તત્ર ગોમયસમ્ભૂતં ભસ્મ વસ્ત્રેણ ગાલિતમ્ ।
પૂરયેચ્ચ કુટીભિત્તૌ ચિત્રં બહુ સુવિસ્તરમ્

ભૈરવં કાલમેઘાભં જ્વલદૂર્ધ્વશિરોરુહમ્ ।
ફાલાક્ષં વક્રદંષ્ટ્રં ચ નાગકુણ્ડલમણ્ડિતમ્

નાગયજ્ઞોપવીતં ચ કિઙ્કિણીમુણ્ડમાલિનમ્ ।
દિગમ્બરં તુ કાકોટીભૂષિતાઙ્ઘ્રિશિરોરુહમ્

હારકેયૂરકટકમુદ્રિકાદિવિભૂષિતમ્ ।
દશહસ્તં ચ ડમરુમઙ્કુશં ખડ્ગશૂલકમ્

વરદં સવ્યહસ્તાબ્જૈર્ નાગં પાશં ચ ઘણ્ટિકામ્ ।
મધુપત્રં ભયહરં બિભ્રાણં વામબાહુભિઃ

કૃષ્ણાઙ્ગરાગમાલાઢ્યં સર્વવ્યાધિવિનાશનમ્ ।
વ્યાધિભૂતાહિશત્રુઘ્નં ક્ષ્વેલાદિભયનાશનમ્

તતો મૃત્યુઞ્જયં શાન્તં વટુકં વિલિખેત્પ્રિયે ।
પારદેન્દુહિમશ્વેતં બાલં દ્વિભુજશોભિતમ્

કિઙ્કિણીમાલયા બદ્ધકર્ણનૂપુરશોભિતમ્ ।
બાલં કુણ્ડલસચ્છોભં ત્રિનેત્રં નગ્નરૂપિણમ્

શ્વેતમાલ્યાનુલેપં ચ પૂર્ણપાત્રં ચ વામતઃ ।
દણ્ડં દક્ષિણહસ્તેન દધાનં મૃત્યુનાશનમ્

માયાબીજં ચ વટુકં હ્યેનં પ્રથમમુચ્ચરેત્ ।
આપદુદ્ધારણાયેતિ લિખેત્પઞ્ચાક્ષરદ્વયમ્

વટુકાયેતિ માયાં ચ વટુકસ્ય મનુઃ સ્મૃતઃ ।
મૂર્તિદ્વયોરયં મન્ત્રઃ કથિતઃ સુરવન્દિતે

મન્ત્રસ્યાસ્ય ચ યદ્યન્ત્રં તદ્યન્ત્રં તત્ર સંલિખેત્ ।
રમાં ચ ભુવનેશીં ચ કામં ચિન્તામણિં ક્રમાત્

કર્ણિકાયાં લિખેત્પૂર્વં વટુકાયેતિ વીપ્સિતમ્ ।
અષ્ટપત્રે લિખેચ્છેષાણ્યક્ષરાણ્યષ્ટપત્રકે

બહિઃ ષોડશપત્રેષુ વિલિખેત્ષોડશ સ્વરાન્ ।
દ્વાત્રિંશદ્દલકે કાદિસાન્તદ્વાત્રિંશદક્ષરાન્

અન્યે દલે હલક્ષાંશ્ચ વિલિખેદ્ભૂપુરં બહિઃ ।
આપદુદ્ધારણં યન્ત્રમપમૃત્યુનિવારણમ્

રક્ષાકરં ગ્રહાર્તાનાં સર્વેષાં પ્રાણિનામપિ ।
સ્ત્રીવશ્યં રાજવશ્યં ચ પુંવશ્યં પશુવશ્યકમ્

નાનાસિદ્ધિપ્રદં નિત્યં સર્વરોગવિષાપહમ્ ।
હારકેયૂરરુચિરં કાન્ત્યા વિશ્વવિમોહનમ્

મહામૃત્યુઞ્જયં દેવં ભાવયેન્મૃત્યુજિદ્ભવેત્ ।
એવં દ્વિતીયવર્ગસ્ય તૃતીયં પઞ્ચમેન ચ

સ્વરેણ બિન્દુના યુક્તં સોન્તં સાધ્યપદં તતઃ ।
રક્ષશબ્દયુગં પશ્ચાત્પૂર્વં બીજત્રયં પુનઃ

પ્રતિલોમં સમુચ્ચાર્ય મન્ત્રં મૃત્યુઞ્જયં જપેત્ ।
તારં મધ્યે સસાધ્યાખ્યં દિગ્દલે ભં સમાલિખેત્

આગ્નેયાદિદલેષ્વન્ત્યમક્ષરં ક્રમશો લિખેત્ ।
બાહ્યે ભૂપુરમાલિખ્ય દિક્ષુ સાન્દ્રં સમાલિખેત્

ચતુષ્કોણે ઠકારં ચ યન્ત્રં મૃત્યુઞ્જયાત્મકમ્ ।
અપમૃત્યુજ્વરવ્યાધિક્ષ્વેલમોહવિનાશનમ્

તત્ર ચિન્તામણિં દેવં ચિન્તિતાર્થપ્રદં લિખેત્ ।
નીલપ્રવાલરુચિરં ત્રિણેત્રં રુચિરાનનમ્

પાશારુણોત્પલં વામે દક્ષે શૂલકપાલકૌ ।
દધાનમ્ ઇન્દુમકુટં ધ્યાયેદર્ધામ્બિકેશ્વરમ્

વહ્નિપ્રથમવર્ગાદિષમરેફાઃ ક્રમાત્તતઃ ।
પ્રાણસદ્યાન્તસહિતઃ ષષ્ઠસ્વરસબિન્દુકઃ

ઇદં ચિન્તામણેર્ મન્ત્રં ચિન્તિતાર્થપ્રદં શુભમ્ ।
ષોડશસ્વરસંવીતં ચિન્તામણિમભીષ્ટદમ્

ઠકારાવેષ્ટિતં કુર્યાજ્જ્વરાપસ્મૃતિમૃત્યુહમ્ ।
તતશ્ચ શારદાદેવીમ્ આલિખેત્ સિદ્ધિદાયિનીમ્

શઙ્ખકુન્દેન્દુધવલાં મકુટેન્દુકલાધરામ્ ।
સુધાકુમ્ભં વરાક્ષસ્રક્સંવિન્મુદ્રાં કરાંબુજૈઃ

બિભ્રાણાં શ્વેતવસનાં મૌક્તિકાભરણોજ્જ્વલામ્ ।
વાગ્બીજં ભુવનેશીં ચ વદવાક્યદ્વયં તતઃ

વાગ્વાદિનીં સસમ્બુદ્ધિમ્ અગ્નિપત્નીં સમુચ્ચરેત્ ।
એષ શ્રીમાતૃકામન્ત્રઃ પ્રોક્તઃ સારસ્વતપ્રદઃ

આદિબીજદ્વયં હિત્વા શેષં પૂર્વવદ્ ઉચ્ચરેત્ ।
દશાર્ણશારદામન્ત્રો વાગ્વિલાસપ્રદાયકઃ

વિયદ્વર્ણસુકારં ચ સદ્યાન્તં સવિસર્ગકમ્ ।
કર્ણિકાયાં લિખેત્પૂર્વં કિઞ્જલ્કેષુ સ્વરાનપિ

અષ્ટચ્છદેષ્વ્ અષ્ટવર્ગાન્ય્ અશહાદ્યૈઃ પરૈસ્ત્રિભિઃ ।
કાદ્યૈશ્ચ પઞ્ચભિર્વર્ણૈરષ્ટવર્ગાઃ સમીરિતાઃ

લિખેદ્ભૂપુરકોણેષુ ઠકારાન્દિક્ષુ વિન્યસેત્ ।
ઇદં હિ માતૃકાયન્ત્રં વિષમૃત્યુગદાપહમ્

અઘોરં વિલિખેદ્દેવિ નીલજીમૂતસન્નિભમ્ ।
ક્રૂરદંષ્ટ્રં ત્રિણેત્રં ચ નાગેન્દ્રાષ્ટવિભૂષિતમ્

રક્તાઙ્ગરાગવસનં રક્તમાલાવિરાજિતમ્ ।
પરશ્વથું ચ ડમરું ખડ્ગં ખેટમ્ ઇષું ધનુઃ

ત્રિશૂલં પૂર્ણપાત્રં ચ બિભ્રાણં ચાષ્ટબાહુભિઃ ।
ભુવનેશીં સ્ફુરદ્વન્દ્વં તતઃ પ્રસ્ફુરવીપ્સિતમ્

ઘોરં તતોઽઘોરતરં તનુરૂપં ચટદ્વયમ્ ।
પ્રકટદ્વિગુણં ચૈવ કહશબ્દયુગં તતઃ

વમશબ્દદ્વયં દેવિ બન્ધશબ્દં ચ વીપ્સિતમ્ ।
ઘાતયદ્વિતયં દેવિ કવચં ચ ફડન્તકમ્

એકોત્તરોઽયં પઞ્ચાશદર્ણો ઽઘોરઃ સ્મૃતો મનુઃ ।
વશ્યાર્થં તપ્તહેમાભં પૂર્વોક્તાકૃતિસંયુતમ્

મુક્તૌ મૃત્યુઞ્જયાર્થે તુ શ્વેતં પૂર્વોક્તવિગ્રહમ્ ।
સર્વાર્થસિદ્ધિદં શાન્તમઘોરાસ્ત્રં લિખેત્પ્રિયે

માયાબીજં સસાધ્યં સ્યાન્મધ્યે ચ સ્વરસંયુતમ્ ।
તદ્બહિઃકેસરેષ્વેવં વિલિખેદષ્ટવર્ગકમ્

તતસ્ત્વષ્ટદલે મન્ત્રવર્ણાન્ગુણમિતાન્ લિખેત્ ।
અગ્રશેષેષુ તદ્વત્ તત્ષટ્કોણે કવચાસ્ત્રકૌ

તદ્બહિર્ભૂપુરં લેખ્યમ્ એનદાઘોરયન્ત્રકમ્ ।
સ્ફુરદ્વયાવૃતં મધ્યે શક્તિબીજં લિખેત્તતઃ

ષટ્કોણે પ્રસ્ફુરયુગં તતશ્ચાષ્ટદલે ક્રમાત્ ।
ષડ્ભિશ્ચતુર્ભિર્વેદૈશ્ચ રસૈર્વસ્ત્રૈશ્ચ ગોપદૈઃ

ઋતુભિઃ શિષ્ટમન્ત્રાર્ણૈર્ અમીભિર્ વિલિખેત્તતઃ ।
ષટ્કોણે વહ્નિચાસ્ત્રાભ્યામ્ ઉદ્ધૃતં વીતકોણકમ્

ભૂપુરેણાવૃતં યન્ત્રમઘોરં વિલિખેત્પ્રિયે ।
વ્યાલારિચોરક્ષુદ્રાપસ્મારભૂતગ્રહાપહમ્

અથો મહાગણપતિં લિખેદ્વિદ્રુમસન્નિભમ્ ।
કોટીરચન્દ્રશકલં ગજાસ્યં લોચનત્રયમ્

તુન્દિલં રક્તવસનં રક્તમાલાનુલેપનમ્ ।
દશદોર્દણ્ડસુભગં વામોરુસ્થિતયોષિતમ્

હારકેયૂરકટકમુદ્રિકાકુણ્ડલોજ્જ્વલમ્ ।
ફલપૂરં ગદામ્ ઇક્ષુકોદણ્ડં ચ ત્રિશૂલકમ્

ચક્રં સરસિજં પાશમુત્પલં શાલિમઞ્જરીમ્ ।
સ્વદન્તતુણ્ડયા રત્નકલશં દશભિઃ કરૈઃ

બિભ્રાણં પદ્મકરયા વામોરુસ્થિતયા શ્રિયા ।
આલિઙ્ગિતં ભક્તલોકચિન્તિતાર્થસુરદ્રુમમ્

પ્રણવં કમલાં માયાં કામરાજં વસુંધરામ્ ।
ક્રમાદ્ગણપતેર્બીજં મહાગણપતિં તતઃ

ચતુર્થ્યન્તં સસંબુદ્ધિં વરં ચ વરદં તથા ।
તતઃ સર્વજનં મે ચ વશમાનય શબ્દકમ્

અગ્નિપત્નીં સમાલિખ્ય ચાષ્ટાવિંશતિવર્ણકમ્ ।
મન્ત્રં મહાગણપતેર્ મૃત્યુદારિદ્ર્યનાશનમ્

ત્રિકોણે બીજમાલિખ્ય સતારે ચ ગણેશિતુઃ ।
દિક્ષુ શ્રીશક્તિમદનભૂબીજાનિ બહિર્લિખેત્

ષટ્કોણે બીજષટ્કં ચ તત્સંધિષ્વઙ્ગમન્ત્રકમ્ ।
તતોઽષ્ટદલમધ્યેષુ મન્ત્રાણિ ગણશો લિખેત્

અન્ત્યાક્ષરે ચાન્ત્યદલે માતૃકામનુલોમતઃ ।
લેખે ચ પ્રતિલોમેનાઙ્કુશપાશાવૃતં તતઃ

ભૂમન્દિરેણ સુભગં યન્ત્રં ગણપતેઃ શુભમ્ ।
ગજાન્તં શ્રીપદં દિવ્યમાયુષ્યારોગ્યવર્ધનમ્

એતાનિ યન્ત્રજાલાનિ કુટ્યન્તર્દેવતા લિખેત્ ।
કુટીભિત્તિબહિર્ભાગે ભૈરવં વર્ણમાલિખેત્

અસિતાઙ્ગં રુરું ચણ્ડં ક્રોધમુન્મત્તભૈરવમ્ ।
કપાલિનં ભીષણં ચ સંહારં ભૈરવં ક્રમાત્

દ્વિતીયાવરણસ્યાન્તર્ ભિત્તાવેકાદશ ક્રમાત્ ।
રુદ્રાંસ્ત્રિલોચનાંશ્ચન્દ્રકલાજૂટજટાન્ લિખેત્

તદ્બાહ્યે નવ નાથાંશ્ચ નવ સિદ્ધાંશ્ચ ષોડશ ।
સનત્કુમારસનકસનન્દાદીન્ લિખેત્તતઃ

તૃતીયાવરણસ્યાન્તર્ ભિત્તૌ બ્રાહ્મ્યાદિમાતરઃ ।
ચતુઃષષ્ટિશ્ચ યોગિન્યો લેખનીયા યથાવિધિ

તદ્ભિત્તિબાહ્યે દેવેન્દ્રમુખા દિક્પતયઃ ક્રમાત્ ।
ગ્રહાશ્ચ ચન્દ્રસૂર્યાદ્યા અશ્વિન્યાદ્યાશ્ચ તારકાઃ

મેષાદ્યા રાશયો લેખ્યાઃ સાલઙ્કારાશ્ચ સાયુધાઃ ।
કુટીદ્વારવિપાર્શ્વે ચ ગણેશં ભૈરવં લિખેત્

દ્વિતીયાવરણદ્વારપાર્શ્વે દ્વૌ શઙ્ખપદ્મકૌ ।
ગરુત્મન્તં હનૂમન્તં તૃતીયાવરણસ્ય ચ

દ્વારસ્ય પાર્શ્વયોર્દેવિ વિલિખેદ્ભયભઞ્જનૌ ।
યસ્મિન્દેશે કુટી દિવ્યા કલ્પિતા યોગિસત્તમૈઃ

દેશો ધન્યતરઃ શ્લાઘ્યઃ પુણ્યક્ષેત્રં ચ પાવનમ્ ।
તત્રત્યાશ્ચ પ્રજા ધન્યાઃ સ્ફીતાર્થાઃ પુણ્યકર્મિણઃ

રાષ્ટ્રં સુભિક્ષમ્ આરોગ્યમ્ અનામયસુખાવહમ્ ।
ઈતિહીનં કાલવૃષ્ટિસહિતં ધાન્યસઙ્કુલમ્

તસ્કરોપદ્રવવ્યાઘ્રસર્પાદિભયવર્જિતમ્ ।
તત્ર તીર્થાનિ સર્વાણિ ગઙ્ગાદીનિ વસન્તિ ચ

ઇન્દ્રાદયોઽપિ વિબુધાઃ સૂર્યચન્દ્રાદયો ગ્રહાઃ ।
યોગિન્યો ભૈરવાઃ સિદ્ધા ગણેશગુહમાતરઃ

તત્રસ્થસ્ય મહીપસ્ય જયાર્થાવાપ્તિરાયુષઃ ।
સમ્ભવેચ્ચક્રવર્તિત્વં પુનર્નિત્યોત્સવોજ્જ્વલમ્

વન્ધ્યાનાં પુત્રસમ્પત્તિઃ કુટીસંદર્શનાદ્ભવેત્ ।
કુષ્ઠાપસ્મારભૂતાદિમહાવ્યાધિવિનાશનમ્

કુટીગતા ભવેયુસ્તે યે સેવન્તે રસાયનમ્ ।
સિદ્ધિં યાન્તિ સુખેનૈવ દેવાનામપિ દુર્લભામ્

<અમરીકલ્પઃ>
દેવિ ચિત્રં પ્રવક્ષ્યામિ દિવ્યં ગુહ્યતમં શિવમ્ ।
અમરીકલ્પમનઘં સુલભં નિજદેહજમ્

અણિમાદ્યષ્ટકૈશ્વર્યદેહલોહાદિસિદ્ધિદમ્ ।
વમનાદિવિશુદ્ધાઙ્ગો લવણામ્લવિવર્જિતઃ

કુટીગતસ્તુ દેવેશિ શિવતોયમુદારધીઃ ।
સ્થૂલસ્ય કતકસ્યૈવ દારુણા પાનપાત્રકમ્

કુર્યાચ્ચ ત્રિફલાં પિષ્ટ્વા લેપયેચ્ચષકાન્તરે ।
કર્ષં શિવામ્બુના રાત્રૌ પાત્રં ચાધોમુખં પ્રિયે

સ્થાપયિત્વા પુનઃ પ્રાતરાદ્યન્તં પ્રસ્રવં ત્યજેત્ ।
મધ્યધારાશ્ચ તત્પાત્રે ક્ષિપેત્તત્ત્રિફલાં તતઃ

લોડયેદમરીયુક્તં પિબેત્પ્રાગાનનઃ સદા ।
ઇષ્ટદેવાન્ગુરૂન્વૃદ્ધાન્ નત્વાર્ચિતગણેશ્વરઃ

મિતાહારો યુક્તચેષ્ટો વાતાતપવિવર્જિતઃ ।
એકમણ્ડલમાત્રેણ બાહ્યાન્તઃ શુચિભાગ્ ભવેત્

મણ્ડલેન દ્વિતીયેન સર્વકુષ્ઠવિનાશનમ્ ।
મણ્ડલેન તૃતીયેન ચતુર્વિધવિષાપહમ્

મણ્ડલેન ચતુર્થેન નાલિકેરામ્બુવદ્ ભવેત્ ।
આત્મતોયં પઞ્ચમેન મલદૌર્ગન્ધ્યનાશનમ્

ષષ્ઠમણ્ડલયોગેન દેહદૌર્ગન્ધ્યનાશનમ્ ।
સપ્તમણ્ડલયોગેન ભવેદિન્દ્રિયપાટવમ્

તતોઽષ્ટમે મણ્ડલે તુ રજનીચૂર્ણકર્ષયુક્ ।
સેવેત શિવતોયં ચ યાવદ્દ્વિઃ સપ્તમણ્ડલમ્

વલીપલિતહીનઃ સ્યાન્મહાવિષભયોજ્ઝિતઃ ।
મણ્ડલે પઞ્ચદશકે કર્ષાંશૌ શૃઙ્ગગન્ધકૌ

શિવતોયેન સમ્મિશ્રં પ્રપિબેદેકવિંશતિમ્ ।
મણ્ડલં ચ તદન્તે સ્યાત્સિદ્ધિભાગ્દેહલોહયોઃ

દ્વાવિંશન્મણ્ડલે દેવિ ચાભ્રકં વરયા યુતમ્ ।
એવં ભજેદ્યમી યાવદષ્ટાવિંશતિમણ્ડલમ્

મત્તહસ્તિબલોપેતો ગૃધ્રદૃષ્ટિરનામયઃ ।
એકોનત્રિંશતિ પ્રાપ્તે મણ્ડલે વરયા યુતામ્

સકાન્તચૂર્ણવિમલાં ગોધામપિ પિબેત્ પ્રિયે ।
પઞ્ચત્રિંશન્મણ્ડલાન્તં વજ્રકાયો ભવેન્નરઃ

ષટ્ત્રિંશન્મણ્ડલાદિ સ્વર્ણધાત્રીરજોઽન્વિતમ્ ।
આત્મગોધાન્વિતં પેયં તત્તુ યાવદ્દ્વ્યધિકમ્

ચત્વારિંશન્મણ્ડલાન્તં સશરીરઃ ખગો ભવેત્ ।
ત્રિચત્વારિંશન્મણ્ડલે તુ પ્રાપ્તે પારદસંયુતમ્

વરાયુતં પિબેદ્ ઊનપઞ્ચાશન્મણ્ડલાવધિઃ ।
અણિમાદિગુણોપેતો વજ્રકાયશ્ચ ખેચરઃ

સિદ્ધૈર્ યુક્તો નિરાતઙ્કો નિરપાયો નિરઞ્જનઃ ।
યદૃચ્છયા સર્વલોકે વિહરત્યેવ સર્વદા

આરભ્ય પ્રથમં દેવિ મણ્ડલાન્નિત્યમાચરેત્ ।
આત્મતોયેન ધુત્તૂરરસેન પરિલોડયેત્

ભસ્મ તેનૈવ સર્વાઙ્ગમસકૃત્પરિમર્દયેત્ ।
અન્યકાલસમાયાતમ્ આત્મતોયં વિશેષતઃ

મૂર્ધ્નિ નાસાપુટે કર્ણે દૃશિ પાદકરદ્વયે ।
શીલયેત્સતતં દેવિ શુદ્ધદેહો ભવેન્નરઃ

કદાચિદપ્યાત્મગોધાં ભૂમૌ ન વિસૃજેત્પ્રિયે ।
અમરીસેવિનઃ પુંસઃ શિવતોયેન જાયતે

સર્વલોહં ચ કનકં દિવ્યં મનુજદુર્લભમ્ ।
વિજયાસહિતાં ગોધાં પ્રતિવાસરમાપિબેત્