અહોરત્રવ્રતકથા · શ્લોક 1-20

અહોરાત્રવ્રતકથા
ઓં નમઃ શ્રીધર્મધાતવે ।
આકાશનિર્મલો ભૂતો નિષ્પ્રપઞ્ચગુણાશ્રયઃ ।
પઞ્ચસ્કન્ધાત્મકઃ શાન્તસ્ તસ્મૈ સ્તૂપાત્મને નમઃ

એવં મયા શ્રુતમ્ એકસ્મિન્ સમયે બુદ્ધો ભગવાઞ્ છ્રાવસ્ત્યાં વિહરતિ સ્મ જેતવને ઽનાથપિણ્ડદસ્યારામે મહતા ભિક્ષુસંઘેન સાર્ધમ્ અનેકૈર્ દેવનાગયક્ષગન્ધર્વાસુરગરુડકિન્નરમહોરગૈઃ સ્થવિરભિક્ષુવીતરાગસંઘૈર્ બોધિસત્ત્વશતસહસ્રૈઃ સંબહુલૈશ્ ચ શ્રાવકૈર્ દશભિર્ લોકપાલૈશ્ ચતુર્મહારાજકાયિકૈર્ અનેકૈશ્ ચતુર્વર્ણકૈર્ મનુષ્યૈર્ અનેકશતસહસ્રૈઃ પરિવારૈઃ પરિવૃતૈઃ । તસ્મિન્ સભામણ્ડલે સર્વે ધર્મશ્રવણિકા લોકા ભગવન્તમ્ અભિવીક્ષ્ય ચૈત્યવ્રતકથામ્ અનુધ્યાયન્તઃ સમાસ્થિતાઃ । અથ ખલુ સુભૂતિઃ સ્થવિરઃ સ્વાસનાત્ સમુત્થાયૈકાંસમ્ ઉત્તરાસઙ્ગં કૃત્વા ત્રિઃ પ્રદક્ષિણીકૃત્ય સવ્યજાનુબિમ્બં ભુવિ સ્થાપ્ય ભગવન્તં પ્રણમ્યૈતદ્ અવોચત્ ।
અહોરાત્રવ્રતં નાથ કસ્મિન્ કાલે પ્રવર્તતે ।
તદ્વિધિં ચ કથં બ્રૂહિ તત્ સર્વં જગતાં પ્રભો

ભગવાન્ આહ ।
સાધુ સાધુ સુભૂતે ત્વં શૃણુ સત્ત્વાનુકમ્પક ।
અહોરાત્રવ્રતં નિત્યં તદ્વિધિં કથિતં મયા

આસીત્ પૂર્વવિદેહેષુ નામ્ના ગન્ધવતી પુરી ।
તસ્યાં રાજા મહાતેજા ઇન્દ્રપૃષ્ટો મહાપ્રભુઃ

સો ઽન્તઃપુરે સભાં કૃત્વા વસુબન્ધું જગદ્ગુરુમ્ ।
પ્રણમ્ય સહસોત્થાય પપ્રચ્છ વિધિવન્ મુદા

શ્રોતુમ્ ઇચ્છામિ તત્ સર્વં યદ્ વ્રતાનાં સમુત્તમમ્ ।
યસ્ય પુણ્યપ્રભાવેન સત્ત્વા યાન્તિ સુનિર્વૃતિમ્

તત્ સર્વં ગદતાં ધીર સર્વસત્ત્વાનુકમ્પક ।
ભવતા ચાનુપાલ્યો ઽયં લોકશ્ ચ દુષ્કૃતાકુલઃ

વસુબન્ધુર્ ઉવાચ ।
શૃણુ રાજન્ મયા ખ્યાતં વ્રતાનાં વ્રતમ્ ઉત્તમમ્ ।
અહોરાત્રવ્રતં પૂર્વં વિપશ્યિના પ્રભાષિતમ્

અશ્વિનીપૂર્ણમાસ્યાં તુ વ્રતં કુર્યાદ્ મહોદયમ્ ।
ચૈત્યં સંપૂજયેચ્ છુદ્ધઃ ષોડશૈર્ વિધિભિસ્ તથા

ભોજનાન્તે ત્રયોદશ્યાં કુર્યાદ્ દન્તાદિશોધનમ્ ।
ચતુર્દશ્યાં વિશેષેણ ક્ષુરકર્માણિ કારયેત્

સ્નાનં કૃત્વા ચ તીર્થેષુ શુચિવસ્ત્રાવૃતઃ સુધીઃ ।
મધ્યાહ્ને પૂજયેચ્ ચૈત્યં પ્રદીપં ચ પ્રદાપયેત્

સૂર્યે ષષ્ઠગતે ભાગે પ્રાશયેચ્ ચ ક્ષીરોદનમ્ ।
પુનર્ શૌચાદિકં કૃત્વા ધર્મં ચ શ્રુણુયાન્ મુદા

પ્રત્યૂષે પૂર્ણમાસ્યાં તુ સ્નાત્વા વ્રતં સમારભેત્ ।
આદૌ ભૂમિતલં શોધ્ય ધર્મશાલાં પ્રકારયેત્

ગન્ધોદકૈઃ સુશીતૈશ્ ચ ચૈત્યપુંગવં સ્નાપયેત્ ।
ગોક્ષીરૈઃ પઞ્ચરત્નૈશ્ ચ શિલાભસ્માભિલેપયેત્

ચત્વારશ્ ચ ધ્વજાઃ સ્થાપ્યા વિતાનં સહ ચામરૈઃ ।
દિગ્માલા વિવિધૈઃ પુષ્પૈર્ લમ્બયેચ્ ચ જિનાલયે

તદનુ વ્રતમ્ આરભ્ય ગુરું વજ્રધરં નમેત્ ।
ત્રિરત્નશરણં કૃત્વા ધ્યાપયેદ્ ધર્મધાતુકમ્

ધર્મધાતુમયં ચૈત્યં જિનાનાં ગૃહમ્ ઉત્તમમ્ ।
અનાદિબુદ્ધ-મ્-આખ્યાતં સર્વતથાગતાલયમ્ ।
સર્વદેવાલયં ચૈત્યમ્ આરાધ્ય વ્રતમ્ આચરેત્

સહસ્રદલપદ્મસ્થં ચન્દ્રબિમ્બપ્રભાસ્વરમ્ ।
રક્તં ભોઃકારસંભૂતં ચતુર્મુખં વિરાજિતમ્

રક્તગૌરમુખં મૂલં દક્ષિણે કુઙ્કુમારુણમ્ ।
પશ્ચિમે પદ્મરક્તં ચ [!] ઉત્તરે પીતરક્તકમ્

અષ્ટભુજં વિરાજન્તં વાગીશ્વરં જગદ્ગુરુમ્ ।
ધનુર્બાણધરં દ્વાભ્યાં પાશાઙ્કુશધરં તથા ।
પ્રજ્ઞાપુસ્તં તથા ખડ્ગં વજ્રઘણ્ટાં તથાપરૈઃ