Agni Purana · Chapter 267

:e ity āgneye mahāpurāṇe maheśvarasnānalakṣakoṭihomādayo nāma
ṣaṭṣaṣṭyadhikadviśatatamo 'dhyāyaḥ ||
% Chapter {267}
:ś atha saptaṣaṣṭyadhikadviśatatamo 'dhyāyaḥ
nīrājanavidhiḥ
puṣkara uvāca
karma sāṃvatsaraṃ rājñāṃ janmarkṣe pūjayecca taṃ /AP_267.001ab/
māsi māsi ca saṃkrāntau sūryasomādidevatāḥ

:p 474
agastyasyodaye 'gastyañcāturmāsyaṃ hariṃ yajet /AP_267.002ab/
śayanotthāpane pañcadinaṃ kuryātsamutsavam

proṣṭhapāde site pakṣe pratipatprabhṛtikramāt /AP_267.003ab/
śivirāt pūrvadigbhāge śakrārthaṃ bhavanañcaret

tatra śakradhvajaṃ sthāpya śacī śakrañca pūjayet /AP_267.004ab/
aṣṭamyāṃ vādyaghoṣeṇa tāntu yaṣṭiṃ praveśayet

ekādaśyāṃ sopavāso dvādaśyāṃ ketumutthitam /AP_267.005ab/
yajedvastrādisaṃvītaṃ ghaṭasthaṃ(1) surapaṃ śacīṃ

vardhasvendra jitāmitra vṛtrahan pākaśāsana /AP_267.006ab/
deva deva mahābhāga tvaṃ hi bhūmiṣṭhatāṃ gataḥ

tvaṃ prabhuḥ śāśvataś caiva sarvabhūtahite rataḥ /AP_267.007ab/
anantatejā vai rājo yaśojayavivardhanaḥ

tejaste vardhayantvete devāḥ śakraḥ suvṛṣṭikṛt /AP_267.008ab/
brahmaviṣṇumaheśāś ca kārttikeyo vināyakaḥ

ādityā vasavo rudrāḥ sādhyāś ca bhṛgavo diśaḥ /AP_267.009ab/
marudguṇā lokapālā grahā yakṣādrinimnagāḥ

samudrā śrīrmahī gaurī caṇḍikā ca sarasvatī /AP_267.010ab/
pravartayantu te tejo jaya śakra śacīpate

tava cāpi jayānnityaṃ mama sampaṭhyatāṃ śubhaṃ /AP_267.011ab/
prasīda rājñāṃ viprāṇāṃ prajānāmapi sarvaśaḥ

bhavatprasādāt pṛthivī nityaṃ śasyavatī bhavet /AP_267.012ab/
śivaṃ bhavatu nirvighnaṃ śāmyantāmītayo bhṛśaṃ

:n
1 paṭasthamiti ka.. , ga.. , cha.. , ja.. , ṭa.. ca
:p 475
mantreṇendraṃ samabhyarcya jitabhūḥ svargamāpnuyāt /AP_267.013ab/
bhadrakālīṃ paṭe likhya pūjayedāśvine jaye

śuklapakṣe tathāṣṭamyāmāyudhaṃ kārmukaṃ dhvajam /AP_267.014ab/
chatrañca rājaliṅgāni śastrādyaṃ kusumādibhiḥ

jāgranniśi balindadyāddvitīye 'hni punaryajet /AP_267.015ab/
bhadrakāli mahākāli durge durgārtihāriṇi

trailokyavijaye caṇḍi mama śāntau jaye bhava /AP_267.016ab/
nīrājanavidhiṃ vakṣye aiśānyānmandiraṃ caret

toraṇatritayaṃ tatra gṛhe devānyajet sadā /AP_267.017ab/
citrāntyaktvā yadā svātiṃ savitā pratipadyate

tataḥ prabhṛti kartavyaṃ yāvat svātau raviḥ sthitaḥ /AP_267.018ab/
brahmā viṣṇuś ca śambhuś ca śakraś caivānalānilau

vināyakaḥ kumāraś ca varuṇo dhanado yamaḥ /AP_267.019ab/
viśvedevā vaiśravaso gajāścāṣṭau ca tānyajet

kumudairāvaṇau padmaḥ puṣpadantaś ca vāmanaḥ /AP_267.020ab/
supratīko 'ñjano nīlaḥ pūjā kāryā gṛhādike

purodhā juhuyādājyaṃ samitsiddhārthakaṃ tilāḥ /AP_267.021ab/
kumbhā aṣṭau pūjitāś ca taiḥ snāpyāśvagajottamāḥ

aśvāḥ snāpyā dadet piṇḍān tato hi prathamaṃ gajān /AP_267.022ab/
niṣkrāmayettoraṇaistu gopurādi(1) na laṅghayet

vikrameyustataḥ sarve rājaliṅgaṃ gṛhe yajet /AP_267.023ab/
:n
1 śekharādīti ka..
:p 476
vāruṇe varuṇaṃ prārcya rātrau bhūtabaliṃ dadet

viśākhāyāṃ(1) gate sūrye āśrame nivasennṛpaḥ /AP_267.024ab/
alaṅkuryāddine tasmin vāhanantu viśeṣataḥ

pūjitā rājaliṅgāś ca kartavyā narahastagāḥ /AP_267.025ab/
hastinanturagaṃ chatraṃ khaḍgaṃ cāpañca dundubhim

dhvajaṃ patākāṃ dharmajña kālajñastvabhimantrayet /AP_267.026ab/
abhimantrya tataḥ sarvān kuryāt kuñjaradhūrgatān

kuñjaroparigau syātāṃ sāṃvatsarapurohitau /AP_267.027ab/
mantritāṃś ca samāruhya toraṇena vinirgamet

niṣkramya nāgamāruhya toraṇenātha nirgamet /AP_267.028ab/
baliṃ vibhajya vidhivadrājā kuñjaradhūrgataḥ

unmūkānāntu nicayamādīpitadigantaraṃ /AP_267.029ab/
rājā pradakṣiṇaṃ kuryāttrīn vārān susamāhitaḥ

caturaṅgabalopetaḥ sarvasainyena nādayan /AP_267.030ab/
evaṃ kṛtvā gṛhaṃ gacchedvisarjitajalāñjaliḥ

śāntir nīrājanākhyeyaṃ vṛddhaye ripumardanī