અભિધર્મદીપ · શ્લોક 421-440

એતન્નિર્વેધભાગીયં ચતુર્ધા ભાવનામયમ્ ।
ષડ્ભૌમં ષોડશાકારં પઞ્ચસ્કન્ધા વિનાપ્તિભિઃ

પશ્ચાત્તુ ખલુનિર્વેધ આર્યમાર્ગાહ્વયસ્તતઃ ।
સ યસ્માન્નિશ્ચિતો વેધસ્તસ્માન્નિર્વેધ ઉચ્યતે

ધર્મજ્ઞાનરુચિર્દુઃખે નિર્મલં ધર્મદર્શનમ્ ।
તતસ્તત્રૈવાવધૃતિઃ ધર્મજ્ઞાનમનન્તરમ્

એવં ત્રિષ્વપિ સત્યેષુ તથૈવાન્વયધીર્દ્વિધા ।
અનન્ત્યાસ્તત્ર દૃઙ્માર્ગાઃ જ્ઞેયાઃ પઞ્ચદશક્ષણાઃ

ક્ષણો ઽન્ત્યો ભાવનામાર્ગાત્ ફલમેષો ઽર્થસિદ્ધિતઃ

ધ્યાનાનિ વ્યવકીર્યાતઃ પઞ્ચમસ્ત્વકનિષ્ઠગઃ ।
ચતુર્ધારૂપ્યગામ્યન્યો દૃષ્ટનિર્વાયકો ઽપરઃ

પુનસ્ત્રિધા ત્રિધા કૃત્વા ત્રીનતો રૂપગા નવ ।
તદ્વિશેષઃ પુનર્જ્ઞેયઃ કર્મક્લેશાક્ષભેદતઃ

ષડ્ધોર્ધ્વસ્ત્રોતસા સાર્ધં સપ્તધા સદ્ગતિર્મતા ।
સતિ વૃત્તેરનૈર્યાણાદુક્તૈષામેવ સદ્ગતિઃ

પરાવૃત્તભવો હ્યાર્યો નેહ ધાત્વન્તરોપગઃ ।
એષ ચોર્ધ્વગતિશ્ચૈવ નાક્ષમં ચારહાનિભાક્

અન્ત્યકામીર્યતે પૂર્વં સિદ્ધિર્દ્વિક્ષણમિશ્રણાત્ ।
ઉદ્ભવાર્થં સુખાર્થં ચ ક્લેશાશઙ્કાર્થમેવ ચ

તત્પાઞ્ચવિધ્યતઃ પઞ્ચ શુદ્ધાવાસભુવઃ સ્મૃતાઃ ।
ન જાતુ દૃષ્ટપૂર્વાસ્તાઃ સર્વૈરપિ પૃથગ્જનૈઃ

યો નિરોધસમાપત્તિમશ્નુતે કાયસાક્ષ્યસૌ ।
ભવાગ્રાષ્ટાંશહા યાવદર્હત્ત્વપ્રતિપન્નકઃ

યશ્ચાનન્તર્યમાર્ગે ઽન્ત્યે વજ્રૌપમ્યાહ્વયેસ્થિતઃ ।
તત્ફલાર્થં ક્ષયજ્ઞાનં તદેકાલમ્બનં ન વા

તદવાપ્તેરશૈક્ષો ઽસાવર્હંસ્ત્રૈલોક્યસત્કૃતઃ ।
સર્વક્લેશવિસંયુક્તઃ શિક્ષાત્રિતયપારગઃ

ભાવનાખ્યો દ્વિધા માર્ગઃ સમલામલભેદતઃ ।
દર્શનાખ્યસ્તુ વિજ્ઞેયઃ સર્વસ્યૈવ નિરાસ્રવઃ

આનુપૂર્વિકયદ્ભૂયોવીતરાગાવીતાવીતરાગિણામ્ ।
અશૈક્ષાખ્યોપિ બોદ્ધવ્યો નિત્યમેવામલીમસઃ

ભવાગ્રં નિર્મલો ઽત્યેતિ........

સવિશેષં યતસ્ત્યક્ત્વા ફલં પરમુપાશ્નુતે ।
શૈક્ષસ્ય ત્રિભિરક્ષાદ્યૈર્દ્વાભ્યાં સંપૂર્ણંતાર્હતઃ

વિજ્ઞાતવ્યઃ સમાસેન પુનમાર્ગશ્ચતુર્વિધઃ ।
આનન્તર્યવિમુક્ત્યાખ્યૌ પ્રારમ્ભોત્કર્ષલક્ષણૌ

તીક્ષ્ણેન્દ્રિયસ્ય મૌલેષુ ધ્યાનેષુ પ્રતિપત્સુખા ।
ક્ષિપ્રાભિજ્ઞાલ્પબુદ્ધેસ્તુ ધન્ધાન્યત્ર વિપર્યયાત્