वैशेषिकसूत्र · अध्याय 4.1

सद् अकारणवत् तन् नित्यम्

तस्य कार्यं लिङ्गम्

कारणभावाद् धि कार्यभावः

अनित्यम् इति च विशेषप्रतिषेधभावः

अविद्या च

महत्य् अनेकद्रव्यवत्त्वाद् रूपाच् चोपलब्धिः

अद्रव्यवत्त्वात् परमाणाव् अनुपलब्धिः

रूपसंस्काराभावाद् वायाव् अनुपलब्धिः

अनेकद्रव्येण द्रव्येण समवायाद् रूपविशेषाच् चोपलब्धिः

एतेन रसगन्धस्पर्शेषु ज्ञानं व्याख्यातम्

तदभावाद् अव्यभिचारः

संख्याः परिमाणानि पृथक्त्वं संयोगविभागौ परत्वापरत्वे कर्म च रूपिद्रव्यसमवायाच् चाक्षुषाणि

अरूपिष्व् अचाक्षुषत्वात्

एतेन गुणत्वे भावे च सर्वेन्द्रियज्ञानं व्याख्यातम्