सार्धत्रिशतिकालोत्तरागम · अध्याय 18

कालचक्रविधानं तु प्रवक्ष्याम्यनुपूर्वशः
कालचक्रमिति ख्यातं येन कालः प्रबुध्यते ॥

त्र्यहोरात्रप्रचारेण त्रीण्यब्दानि स जीवति
द्व्यहोरात्रप्रचारेण जीवेद्वर्षद्वयं तु सः ॥

अहोरात्रप्रचारेण अब्दमेकं स जीवति
अहरेकं व्रजेद्यस्य रात्रिमेकां तथैव च ॥

षण्मासाज्जायते मृत्युर् इति शास्त्रस्य निश्चयः
द्वितीयस्यानुचारेण अहोरात्रं स जीवति ॥

यथा चाद्या तथा वामा मध्यमा च तथैव च
कालचक्रं समाख्यातं पुत्रस्नेहाद्विशेषतः ॥