ऋग्वेद · अध्याय 9.017

प्र निम्नेनेव सिन्धवो घ्नन्तो वृत्राणि भूर्णयः ।
सोमा असृग्रम् आशवः ॥

अभि सुवानास इन्दवो वृष्टयः पृथिवीम् इव ।
इन्द्रं सोमासो अक्षरन् ॥

अत्यूर्मिर् मत्सरो मदः सोमः पवित्रे अर्षति ।
विघ्नन् रक्षांसि देवयुः ॥

आ कलशेषु धावति पवित्रे परि षिच्यते ।
उक्थैर् यज्ञेषु वर्धते ॥

अति त्री सोम रोचना रोहन् न भ्राजसे दिवम् ।
इष्णन् सूर्यं न चोदयः ॥

अभि विप्रा अनूषत मूर्धन् यज्ञस्य कारवः ।
दधानाश् चक्षसि प्रियम् ॥

तम् उ त्वा वाजिनं नरो धीभिर् विप्रा अवस्यवः ।
मृजन्ति देवतातये ॥

मधोर् धाराम् अनु क्षर तीव्रः सधस्थम् आसदः ।
चारुर् ऋताय पीतये ॥