ઋગ્વેદ · અધ્યાય 9.017

પ્ર નિમ્નેનેવ સિન્ધવો ઘ્નન્તો વૃત્રાણિ ભૂર્ણયઃ ।
સોમા અસૃગ્રમ્ આશવઃ ॥

અભિ સુવાનાસ ઇન્દવો વૃષ્ટયઃ પૃથિવીમ્ ઇવ ।
ઇન્દ્રં સોમાસો અક્ષરન્ ॥

અત્યૂર્મિર્ મત્સરો મદઃ સોમઃ પવિત્રે અર્ષતિ ।
વિઘ્નન્ રક્ષાંસિ દેવયુઃ ॥

આ કલશેષુ ધાવતિ પવિત્રે પરિ ષિચ્યતે ।
ઉક્થૈર્ યજ્ઞેષુ વર્ધતે ॥

અતિ ત્રી સોમ રોચના રોહન્ ન ભ્રાજસે દિવમ્ ।
ઇષ્ણન્ સૂર્યં ન ચોદયઃ ॥

અભિ વિપ્રા અનૂષત મૂર્ધન્ યજ્ઞસ્ય કારવઃ ।
દધાનાશ્ ચક્ષસિ પ્રિયમ્ ॥

તમ્ ઉ ત્વા વાજિનં નરો ધીભિર્ વિપ્રા અવસ્યવઃ ।
મૃજન્તિ દેવતાતયે ॥

મધોર્ ધારામ્ અનુ ક્ષર તીવ્રઃ સધસ્થમ્ આસદઃ ।
ચારુર્ ઋતાય પીતયે ॥