ऋग्वेद · अध्याय 9.016

प्र ते सोतार ओण्यो3 रसम् मदाय घृष्वये ।
सर्गो न तक्त्य् एतशः ॥

क्रत्वा दक्षस्य रथ्यम् अपो वसानम् अन्धसा ।
गोषाम् अण्वेषु सश्चिम ॥

अनप्तम् अप्सु दुष्टरं सोमम् पवित्र आ सृज ।
पुनीहीन्द्राय पातवे ॥

प्र पुनानस्य चेतसा सोमः पवित्रे अर्षति ।
क्रत्वा सधस्थम् आसदत् ॥

प्र त्वा नमोभिर् इन्दव इन्द्र सोमा असृक्षत ।
महे भराय कारिणः ॥

पुनानो रूपे अव्यये विश्वा अर्षन्न् अभि श्रियः ।
शूरो न गोषु तिष्ठति ॥

दिवो न सानु पिप्युषी धारा सुतस्य वेधसः ।
वृथा पवित्रे अर्षति ॥

त्वं सोम विपश्चितं तना पुनान आयुषु ।
अव्यो वारं वि धावसि ॥