ऋग्वेद · अध्याय 9.018

परि सुवानो गिरिष्ठाः पवित्रे सोमो अक्षाः ।
मदेषु सर्वधा असि ॥

त्वं विप्रस् त्वं कविर् मधु प्र जातम् अन्धसः ।
मदेषु सर्वधा असि ॥

तव विश्वे सजोषसो देवासः पीतिम् आशत ।
मदेषु सर्वधा असि ॥

आ यो विश्वानि वार्या वसूनि हस्तयोर् दधे ।
मदेषु सर्वधा असि ॥

य इमे रोदसी मही सम् मातरेव दोहते ।
मदेषु सर्वधा असि ॥

परि यो रोदसी उभे सद्यो वाजेभिर् अर्षति ।
मदेषु सर्वधा असि ॥

स शुष्मी कलशेष्व् आ पुनानो अचिक्रदत् ।
मदेषु सर्वधा असि ॥