Rig Veda · Chapter 9.017

pra nimneneva sindhavo ghnanto vṛtrāṇi bhūrṇayaḥ |
somā asṛgram āśavaḥ ||

abhi suvānāsa indavo vṛṣṭayaḥ pṛthivīm iva |
indraṁ somāso akṣaran ||

atyūrmir matsaro madaḥ somaḥ pavitre arṣati |
vighnan rakṣāṁsi devayuḥ ||

ā kalaśeṣu dhāvati pavitre pari ṣicyate |
ukthair yajñeṣu vardhate ||

ati trī soma rocanā rohan na bhrājase divam |
iṣṇan sūryaṁ na codayaḥ ||

abhi viprā anūṣata mūrdhan yajñasya kāravaḥ |
dadhānāś cakṣasi priyam ||

tam u tvā vājinaṁ naro dhībhir viprā avasyavaḥ |
mṛjanti devatātaye ||

madhor dhārām anu kṣara tīvraḥ sadhastham āsadaḥ |
cārur ṛtāya pītaye ||