ऋग्वेद · अध्याय 9.003

एष देवो अमर्त्यः पर्णवीर् इव दीयति ।
अभि द्रोणान्य् आसदम् ॥

एष देवो विपा कृतो ऽति ह्वरांसि धावति ।
पवमानो अदाभ्यः ॥

एष देवो विपन्युभिः पवमान ऋतायुभिः ।
हरिर् वाजाय मृज्यते ॥

एष विश्वानि वार्या शूरो यन्न् इव सत्वभिः ।
पवमानः सिषासति ॥

एष देवो रथर्यति पवमानो दशस्यति ।
आविष् कृणोति वग्वनुम् ॥

एष विप्रैर् अभिष्टुतो ऽपो देवो वि गाहते ।
दधद् रत्नानि दाशुषे ॥

एष दिवं वि धावति तिरो रजांसि धारया ।
पवमानः कनिक्रदत् ॥

एष दिवं व्य् आसरत् तिरो रजांस्य् अस्पृतः ।
पवमानः स्वध्वरः ॥

एष प्रत्नेन जन्मना देवो देवेभ्यः सुतः ।
हरिः पवित्रे अर्षति ॥

एष उ स्य पुरुव्रतो जज्ञानो जनयन्न् इषः ।
धारया पवते सुतः ॥