Rig Veda · Chapter 9.003

eṣa devo amartyaḥ parṇavīr iva dīyati |
abhi droṇāny āsadam ||

eṣa devo vipā kṛto 'ti hvarāṁsi dhāvati |
pavamāno adābhyaḥ ||

eṣa devo vipanyubhiḥ pavamāna ṛtāyubhiḥ |
harir vājāya mṛjyate ||

eṣa viśvāni vāryā śūro yann iva satvabhiḥ |
pavamānaḥ siṣāsati ||

eṣa devo ratharyati pavamāno daśasyati |
āviṣ kṛṇoti vagvanum ||

eṣa viprair abhiṣṭuto 'po devo vi gāhate |
dadhad ratnāni dāśuṣe ||

eṣa divaṁ vi dhāvati tiro rajāṁsi dhārayā |
pavamānaḥ kanikradat ||

eṣa divaṁ vy āsarat tiro rajāṁsy aspṛtaḥ |
pavamānaḥ svadhvaraḥ ||

eṣa pratnena janmanā devo devebhyaḥ sutaḥ |
hariḥ pavitre arṣati ||

eṣa u sya puruvrato jajñāno janayann iṣaḥ |
dhārayā pavate sutaḥ ||